Read Poumei Naga KOPAODOUWO 2 Bible Online

KOPAODOUWO 2 - Poumei Naga bible

KOPAODOUWO 2

¹E lah ahi paoe, “Khe chuo, kabüa valai tiyu sü soulai; lah savalai.” Ana zhukhaio, hai-a hamako baie.

²Enou nühyu vanou paoe, “Hai hai voyu baie,” ae vayu vanou paoe, “Hai hai-a dai vayu bue?”

³A tsüvei nou süthai peia bulikhu, zhaoh nou kabüa apfüphao ye sousa peilaisa tea phoue. Enou tsücho-e, maili vei hrü hi teinghi khehnou phajü touli hrüa buki haina souyua veih kare.

⁴Enou vah dusho khesü soue; Enou ki tao-a soue alia lah adonou darkha be-a sho-e.

⁵Enou lah adonou kipei ae sobuhtao-a soue alia sütao hi rashibe tya teitei hai-a sho-e.

⁶Sühinou popa paopayu süübetao dzüzü peire donou Enou dzübvü hüe.

⁷Enou qilamai naotu poutu hai-a hrüloue, alia aki hinou nalouyu qila mai hai-a bue; A jünou rai-a Jerusalem hi buyu mai tarali vei jünou kou-a nou E sü kikhaorü ae zhaotu khome alao bue.

⁸Enou süthai-a, vemaivei ae vedei khemai vei shahu, sana alia kinitao hai-a pojülou-e; E hai lousou mai naotu-a poutu-a bue, alia ke-zhe jüpa soure donou khopfü alao bue.

⁹Ajünou rai-a Jerusalem hinou hrüyu mai hrülai jünou E-a dukae; alia avei tsüvei sü ahi bu baie.

¹⁰Nghithou nou jüpayu taralia Enou phakhai moe, ale hai vayu tarali hinou-a phakhai moe, daiolouzü alenou avei terouyu teitei hinou vayu ngaoloue, alia haitao hai avei teroua souyu teitei vei buu-e.

¹¹Süthaisü Enou a bahnou souyu veishi ae sütao hi Enou teroua souyutao vanou tsüchoe, alia zhukhaio, sütao teitei hai hamako baie alia teikhaiye thaihuyu büa baie, teinghi khenou halia patou loure ha-e.

¹²Süthai Enou reikhaive, tsüvei ae vavayu ae voyu vanou tsüchoe; daiolouzü vemai linou veyu thainou hrüveyu puhnou dai souloulai? Puhnou souwuyu tao likhei sou bailaie.

¹³Süthaisü tei vanou teizhi jünou veipuyu büa Enou tsüvei hai voyu jünou veipu-a ngaoe.

¹⁴Tsüvei mai sü puhvei nghithou hai tsü hinou pfüe, ana voyu maiwo teizhi hinou ta baiwe. Anou sütea bua, mai hrülai hai raibüa haka tayu hai Enou ngaoe.

¹⁵Süthai Enou lah ahi paoe, “Voyu mai hi vepayu nasü ahi-a pa-a bailai; südonou E daivanou alao sou tsüveiwe?” Alia Enou lah ahi paoe, “Hai hai-a hamako baie.”

¹⁶Daiolouzü tsüveio vanou-a ae avowo vanou-a licho peiyu ha-e, velaiyu teithetao hisü hai teitei nou ngaikhai bailai. Daibüa tsüvei mai hai avomai nou thaiyu raibüa thailai?

¹⁷Südonou Ehmai hrü hai Enou ngaora-e, daiolouzü Eye donou teinghi khenou souyu pfüphou hai levea shoyu vah baie; souyu vah teitei hai hamako baie alia teikhaiye thaihuhyu ali baie.

¹⁸Athai laonou velaiyu maitao hi Enou teinghi khenou teroua souyu atelai teitei hai puletao hi thaopei khaiwua bailai tiyu ngaoloua Enou ngaora-a baide.

¹⁹Alia thaonou süwe, puh hai tsüvei mai ali laiho avomai ali bailaisa? Ana Enou terou-a teinghi khenou tsüloua soukhai touyu teitei hisü puhnou paopu sou-a bailai. Hai hamako baie.

²⁰Südonou Enou thailao dakhouloua Enou teinghi khenou terouyu ae haso teitei donou choloua bouthaire.

²¹Daiolouzü chachaki mai kamai-a nou tsüvei, tsüsü ae dokai lou-a nou terou souyu hai thaodaiwua sühi terou moyu mai aliye pa savayu sou-a bailai. Hai-a hamako baie alia rako shiyu ali baie.

²²Mai alinou teinghi khenou teroua souyu ae veayu hinou daie ngaoyu bue?

²³Puhvei hrümai hai souhnouyu khaikho baie, alia puhvei vahtao sü rarou-a chomoroyu baie; khei hi koutea puhvei tsü hai showu moe. Hai hai-a hamako baie.

²⁴Mai ali donou-o puhvei teroua souyu vahtao vanou touso-a savayu jünou veipuyu halia hae. Hai hai-a Ramai bah hinou-e tiyu Enou ngaowe.

²⁵Daiolouzü Puh hinou moa thaonou touso-a sava lousüe?

²⁶Süolouzü puh jühpa souyu mai ali hisü Ramai nou tsüvei, tsüsü alia lesayu hai peiwe; ana mah maina hiolouzü, pojüyu ae poko khaiyu vah hai Ramai jühpa souyu mai ali hi peire donou baie. Hai-a hamako baie alia teikhaiye thaihuhyu vah baie.