Read Poumei Naga KOPAODOUWO 3 Bible Online

KOPAODOUWO 3 - Poumei Naga bible

KOPAODOUWO 3

¹Hali hala donou pha teile ali bue, alia teikhenou buyu na lily donou teile ali bue;

²Nah nare teile ae thaiyu teile; shore teile ae shokhaitou nasü paipare teile;

³Southare teile ae souveih peire teile; souphe-souphoure teile ae soushu palai teile;

⁴Krayu teile ae nühre teile; Dopfüre teile ae savare teile;

⁵Chuh khilaire teile ae chuh pove jüre teile; khore teile ae kho bare teile;

⁶Phoure teile ae hawure teile; pokhaire teile ae khilaire teile;

⁷Paiphyare teile ae rümure teile; pai hazhi tea bure teile ae chipaore teile;

⁸Leshire teile ae ngaorayu teile; reih soure teile ae kaonayu teile.

⁹Vah soumai nanou puhvei terouyu hinou patouyu dai bue?

¹⁰Ramai nou maiye pa zoha-a bure donou peiyu vah nasü Enou ngaowure.

¹¹Lahkuku vei teile hisü puhnou panou thao shore donou soupeiwure; alia puhnou maivei tsü hisü teile khaiha peiwure, ana arainou akhai koute Ramai nou daie soue tiyu hai puhye pa phoupalou hore hai soukhaiwure.

¹²Enou süwe süolouzü, puhtao donou hrüa busasü lesa-a ae va-a buyu jünou veipuyu halia hae.

¹³Alia mai lilinou puhvei teroua souyu hinou touso-a va-a bure hai Ramai vei sapeina alie.

¹⁴Enou süwe, süolouzü hatalia Ramai nou souyu nahai teisa nou bua bailai; halia sühi thoupulou hoe ae sühinou poa popa louhoe; Ramai nou maiye pa puhye pia bure donou sübüa souwure.

¹⁵Hataralia payu ae palaiyu hai rai-a nou soudawure. Ramai nou süsü panou papu khaikhaire donou soubaie.

¹⁶Süthai-a Enou teinghi khenou kaozü buhisü, ashi-a bua ngaowe, alia acheche buhisü, mai-ashi-a bue.

¹⁷Enou lah ale khenou paoe, Ramai nou acheche alia ashisü chikulai, daiolouzü puhnou hali hala donou alia vah alili donou paohkhai tiyu teile alili bue.

¹⁸Deiphao maiye donou Enou lah ale khenou paoe, süolouzü puletao hai khaona baie tiyu ngaopeire donou Ramai nou puletaoye süh zhuhyu souwe.

¹⁹Daiolouzü maili vei pfüpousao alia khaona li vei pfüpousao hai ali baie, ali nanou thaiyu büa alina-a thaiwe. Puletao nou ssü haiyu hai raibüa baie, mainou khaona jünou veipuyu hae; daiolouzü hai teitei nou hamako baie.

²⁰Hateitei nou buh alihi ve baiwe; na teitei nou nai hinou ve-e, ae sü teitei hai naihi dakhai tabaiwe.

²¹Thaonou süwe mai rako hai teipei pawe ae khaona rako hai deikhe louwe tiyu?

²²Südonou Enou ngaoyu mai aliye donou lah puhvei vah hinou savayu jünou veipuyu halia hae, daiolouzü süsü lah puhvei zha-e; thaonou puhye save puh thailo dai palai tiyu ngaopei lousüe?