Read Poumei Naga KOPAODOUWO 5 Bible Online

KOPAODOUWO 5 - Poumei Naga bible

KOPAODOUWO 5

¹Nenou Ramai ki hi talouyu phaki ne phika leikeilo; nghiki takouloua kei louyu nanou avo mainou posheela peiyu jünou veipu hie; daiolouzü puletao nou vah ashi souwe tiyu hai sümoe.

²Ne mü pousouo, alia Ramai hi theasho-a nou chaachou souso, daiolouzü Ramai hai raki hinou bue alia ne sü deiphao hi bua baie; südonou nevei chipao hai panou chi-a baio.

³Daiolouzü nenou tsücho poulouzü, veayu hai-a daopou-a bailai, alia nenou lapai poulouzü, voyu chipao hai-a alao paopa-a bailai.

⁴Südonou nenou Ramai hi chaachou soulouzü, sünasü soupeimoa nou ponawuso; daiolouzü puhsü avo maiye jüpa moe. Soulai tea chaachou soukhai tiyu nasü soupeio.

⁵Nenou chaachou soukhaitoua soumoyu jüwo chaachou soukhai moyua veipu hie.

⁶Ne müye panou neye mah hisü süthai thouwuso, alia kopomai nghoujü hi ne paomahre tea paoso; daisounou Ramai ye pa ne pai chouloua rarou shulai, alia puhye pa ne bahnou soukhaitou vah sü souha shulai?

⁷Me alao sou mukhai-e, thouloumo chipao hai alao pa baiwe; ana newo louzü Ramai ye pilou baio.

⁸Deide ali hinou touha maiye souvea-a alia acheche ae kaozü nahai soumoa buyu nenou ngaolouzü, süna vanou ne khupawuso; daiolouzü aku vahbuh buwo ye sü kupuyu alinou zhua bue, süthai-a süjü kupuyu linou puletaoye-a zhua bue.

⁹Dei hinou patouyu hai mai hrülaiye donoue: veo koutea sühinou zha ngaowe.

¹⁰Sha jüpayu mai nasü sha nou khalai moe; kini jüpayu na-a nangi vanou khalai moe. Hai-a hamako baie.

¹¹Na hai pupakhai-e, sütaoye toulaiyu mai-a pupa-a baiwe; alia paopu hai dai viyu bue puh nghithou nou na sütaoye ngaoyu baimoa nou?

¹²Vah soumai ali hai, puhnou toupouyuma moa touchiyuma vasho-a zhilou baiwe; ana toungiyu maili vei kouliyu haina vanou puhye pa zhilai moe.

¹³Enou teinghi khehnou ashi ali ngaoe: kini hai paopuye souveare donou khai-a baie,

¹⁴ana kini sütaosü vah humahyu ali donou ha-a baiwe; alia puhsü puh nahmaitaoye donou halia shokhai peilai moe.

¹⁵Puhpfü nabvü hinou kouyu büa puhsü sakhai-a dakhai ta-a bailai, baitou tea veyu büa baitoua ta-a bailai; puletao nou teroua soukhai tiyu taohai haliro poa talai moe.

¹⁶Hai-a levea shoyu ashi alie: puhnou veyu bütou tea puhsü ta-a bailai; puletao nou terou-a teikhaiye thaihuhyu vanou daie vilouyu bue?

¹⁷Süpeinou, puletao vei teile teitei hai teizhi ae leveayu, rarouyu, sounou alia lekha moyu hinou souhawure.

¹⁸Mai liye donou veiyu alia kaoyu hai daie tea Enou ngaolouyu sü, Ramai nou puhye teile chitea teinghi khehnou hrüwuo tea peiyu tao hinou puhnou terou-a soukhai touyu hinou, puhnou touso-a sava-a ngaolouyu haire, daiolouzü hai sü puhvei zha-e.

¹⁹Mai lili hai Ramai nou kini-a peie, paopu sou-a peie alia sütao poa sava loure vei khouko-a peie ae puh zha-e tiyu aeti lousü ae puhvei terouyu hinou sava lousüe tea peikhai tiyutao hai Ramai vei sapeina-e.

²⁰Daiolouzü puhnou puhvei teile hai li-a chosho laimoe, daiolouzü Ramai nou puh tsü hai pa lesayu nou phou-a bulouwe.