Read Poumei Naga KOPAODOUWO 7 Bible Online

KOPAODOUWO 7 - Poumei Naga bible

KOPAODOUWO 7

¹Zhih aveih nanou muteiyu poukai nüveidzü ali jünou veipu hie; alia thaiyu teithe hainou nayu teithe jünou veipu hie.

²Khonüh nüyu ki hi veyu jüo dopfüyu ki hi tayunou veipu hie, daiolouzü haisü mai teitei vei akhaie, alia hria bumai nou süsü puletao vei lüthou hi khaipeilai.

³Leveayu hainou nühyu jünou veipue, daiolouzü veayu zhu nanou lüthouye sousa peiwe.

⁴Tsüveio vei tsüle hai dopfüyu ki hinou bue; ana voyu navei tsüle sü savayu ki hi bue.

⁵Voyu maili vei lou keilai jüwo tsüvei mai linou züa paodou peiyu sünou keiyua veipue.

⁶Daiolouzü voyu mai linou nühyu haio rai-shuh linou mei hinou paokhai khaiyu kho büa baie; hai-a hamako baie.

⁷Ne hai tsüvei-a buyuma, mai hi dazhu louzü, ne sü voyu mai ali büa baie. Nenou seihla po louzü, ne sü lah nevei hrü hai soushi loua baie.

⁸Ha alivei akhai nanou beih deiyu na jünou veipue. Shamya lousü nanou khaophu souyu na jünou veipu hie.

⁹Rarou haha souo, daiolouzü lekha hai vomai vei tsüle hinou buwe.

¹⁰“Daivanou raichoki teithetao hai chu jünou veipuge?” tea nouso. Daiolouzü nenou haibüa nouyu hai tsü aveih hinou moe.

¹¹Tsüavei hai kaathao louyu mai büa veie, alia teinghi kou ngaoyu mai büa zhou aveih bue.

¹²Daiolouzü tsüaveih vei vupa peiyu hai, sha nou vupeiyu büe; alia tsüaveih nanou hrü hai pokhai peiwe, hai hai hasü vei zhou avei nasüe.

¹³Ramai vei vahtao lichokhaio; puhnou soukhi khai tiyu hai thaonou souzü lousüe?

¹⁴Moulou veiyu teithe hisü asalo, alia veahoyu teithe hisü tsücholo; Ramai nou sühai khinou soupeie, maiye pa puh thailo daie palai tiyu sümore donoue.

¹⁵Avei hamako hrü hinou Enou hali hala sü ngaore; acheche maili sü puhvei acheche hinou thaiyu bue, ana mai-ashi liwo puhnou ashi soulikhu hria buloue.

¹⁶Südonou cheche laleso, alia ne lah neye pa tsüvei laleso; daisounou ne lah neye southalai touwe?

¹⁷Maishiyu hia laleso, alia voyu maili souwuso; daisounou ne teile mokinou thai shulai?

¹⁸Nenou haihai-a polouo alia alina-a ne bah phamoyu punou veilai; daiolouzü Ramai ye piyu maili sü sühai hinou veih loulai.

¹⁹Tsüaveih nou tsüveimai lihi khouko peiyu hai nuhdu lihi buyu vemai kirou nou peilou süyu jünou puhie.

²⁰Vuhzünou deiphao hi mah soukhai timoa vah avei souyu acheche mai li-a hae.

²¹Mainou paoyu teitei hi lepeiwuso, molouzü ne kilai nanou neye chaayu choulou shulai.

²²Nenou maikhe maiye bakha alao chaa peiwure touyu sü ne lah süwe.

²³Hai teitei hai Enou tsüavei nou poa süzhuwure; Enou paoe, “E tsüveilai,” ana süsü ahinou doushoa bubaire.

²⁴Hainare tiyu hai doushoa bue, alia thouwe, thoushowe, thaonou süsü phoupa lousüe?

²⁵Enou süloulai alia phoupa loure donou ae tsüavei phouloure donou, alia maiashi vei voyu süloure donou ae tsühayu avo sü daie tiyu süloure donou, alia hali hala sükhai loure donou ale peia phoue.

²⁶Süthai Enou süloue, süolouzü athai jünou shipuyu ali — naotumai vei shodo. Honapai nou leshi-a seiyu hainou neye rüh moa besah linou belouyu büa bailai, alia hopai bahnou neye kholouyu hai hurainou phulouyu büa bailai. Ramai jüpa soumai louzü tupa loulai, ana mah soumai louzü honapai nou nülou bailai.

²⁷Zhukhaio, Enou pfüphou süloure donou ali nou ali pei hi thoucho-a sülouyu sü haie, tea Kopaodouwo nou paoe.

²⁸Choda khaikhai-a atsüle nou phou-e, ana Enou ngaolou hoa baire. Enou poutumai theli hrohinou tsükhou louvei mai ali ngaoloue, ana naotumai hio mai ali koutea ngaolou moe.

²⁹Zhukhaio, Enou hailikhei süloua baie, süolouzü Ramai nou maiye cheche-a soupeie ana puhtaonou hatya tyali phoutare.