Read Poumei Naga KOPAODOUWO 9 Bible Online

KOPAODOUWO 9 - Poumei Naga bible

KOPAODOUWO 9

¹Hai teitei hai Enou soutaosou tsücho-e, kabüa achechena-a ae ashina-a alia puhmai vei vahtao-a Ramai bah hi bue tiyu; maiye leshiyu-a moa ngaorayu-a lia sümoe. Puhmai nghoujü hi bu teitei hai hako baie.

²Daiolouzü acheche mai hia ashimai hia, veiyuna hia shiyuna hia, sheeyuna hia sheemoyu na hia, posheela peiyu na hia sheela peimoyuna hia raibütoua ve-a bailai. Veiyu maina hi büa mah souyu na hia, alia chaachou souyuna hia chaa thoubayu na hia raibüyu rahdzüsao baie.

³Pfüpousao alinou mai hrülai hi veyu hai teinghi khehnou soupfüyu teitei hinou haihai shiyu alie. Süthai-a mai hrülai lüthou hisü ashinou phou-a bue, alia puletao nou hria buki hai voyu-a bue, alia süthai puletao nou athai hisü hota baiwe.

⁴Ana hriyu taoye koa hrücha-a buyu nawo areih bue, daiolouzü hriyu sei alinou thaiyu kipeikhaodu jünou veipu hie.

⁵Ahriwo nou thailai tiyu hai süwe, ana thaimai louzü halia sümoe; puletaowo buu ngaopure ali-a hare; ae puletaoye lichoyu-a hare.

⁶Puletao vei lesha, puletao nou ngaorayu ae ngaoraiyu hai hatare, alia teinghi khehnou souyutao hinou puletao vei zha hai teisa nou hade.

⁷Taho nevei raokhao toura-o ae sava-a bulo; alia ne zhaoh sü lesayu nou koa sokhaio; daiolouzü nenou souyu teitei hai Ramai nou raikinou aetou peiwure.

⁸Nevei sabanü sü panou teisa kahlo; ne pei hisü panou theadzü chejüa buso.

⁹Puhnou neye teinghi khehnou hamako vei hrümai peiyu sasü, nenou leshiyu nevei chapfüye sa-a savalo, daiolouzü süsü nevei hrü hi ne zha-e alia teinghi kheh hinou nenou terou-a souyu vei souyu zha-e.

¹⁰Nenou soua buyu vah sü eihtea soukhaio; daiolouzü nenou talaiyu rabedushao hio vah lia hae, moa tsüchoyu, moa tsüsüyu, ae tsüveiyu-a hae.

¹¹Süthai-a Enou ngaoe, teinghi kheh hio tuvayu hai tuveiyu navei souwumoe, moa reih hai khouko aveih navei soutumoe, moa raokhao hai tsüveio vei souchamoe, moa kini hai kaiyu maivei souwumoe, moa jüva souyu hai dokaisüo vei souwumoe; ana teile ae rako thaifüa mai hrülai hi pa-a baiwe.

¹²Daiolouzü mainou puhvei veayu teile vere sümoe. Khah hai besah ashi lihinou belouyu büa, alia raohou lihai rüh hinou mulouyu büa, maihrü touhai-o teile ashili hinou sükhai timoa belou bailai.

¹³Enou nada haina-a teinghi kheh hinou ngaolure, alia süsü Eye donou dushoyu büe.

¹⁴Süsü nuhdu taitu ali hi mai chitea hrüa bue. Nuh sünasü dushoyu vemai alinou talou poloure donou souda loure.

¹⁵Nuhdu sühisü touhayu tsüvei mai ali bua ngaoloue, alia puhnou puhvei tsüavei nou nuhdu nasü vupaloue. Ana mai alinoua touhapu sünaye sü licho peimore.

¹⁶Südonou Enou paowe, “Tsüavei hai khouko jünou veipu hie, ana touhayu maivei tsüvei hai-o mainou ngaophou moe, alia puhvei chipao hai mai linou-a keipei moe.”

¹⁷Tsüvei maili vei chi nasha-a keiyu-a vemai linou pai rasou-a avomai hrohi paoyu jünou veipue.

¹⁸Tsüvei hainou reih vei baseitao jünou veipue, ana mah souyu mai linou havei alao soushi baiwe.