Read Poumei Naga SOLOMON VEI LOU 1 Bible Online

SOLOMON VEI LOU 1 - Poumei Naga bible

SOLOMON VEI LOU 1

¹Loutao vei Lou, haitao hai Solomon vei lou-e.

²Nenou Eye ne mümu nanou mütei peio! Daiolouzü ne lesha hai zhaoh jünou veipue,

³nenou noupeiyu theadzü taosü kainü veishoe, ne zhih sü lapa khaitouyu kainüvei theadzüe; südonou naotu maitao nou neye leshiwe.

⁴Eye ne thailao paikoulo, ahai koa thashoa ta-a bailai she. Ne avei veo soulo alia Eye ne kidü hi salou khailo. Ahai koa vashoa nou asalai, Etao nou asah soua ne leshaye zhaoh jünou pua paosholai; kaotou-a puletao nou neye leshiwe.

⁵Oh Jerusalem hi nah naotu maitaore, Ewo teishowe ana hüvei showe, Kedar sahpao büa tei-e, ana Solomon vei haosah büa hüveie.

⁶Eye sou teiwe tea ngaophou moa zhutei tiso, daivanou touyuo teinghi nou Eye phuh thewure. Apfü vei nahpoututao sü apei hi rarouwe, puhtao nou Eye darkha kipei khonapai pa soue; ana lah avei kipei sü Enou kholou moe!

⁷Ahi paopeio, ahrümai nou loua leshiyu nare, nevei zhaokhome pa daiki nou pou toulai, daikinou pa heako kouh dazüa bulaige? Daisounou Eye panou zhaokhome kukhe hinou neye phou-a laiwe?

⁸Oh naotu maitao hrohinou hüvei khapai, Nenou avei buh sümolouzü, zhaokhome vei bosü fülo, alia ne zhaotu tyoututao sü zhaokhowo vei sahpao pe hinou pa poutoulo.

⁹Aleshi pai, ne hai Pharaoh vei rheiluki pfüyu rheilou ali büa maiye souva peiwe.

¹⁰Ne baiva zaokouyu zhusanatao hai daizhou koute ngaoveisa, ne ngu hi mutei chuh raizaotao toupfüa laiyu hai daizhou koute hüveisa!

¹¹Etao nou neye sana nou tou soupeilai, alia shahu nou zhusanatao sou peilai.

¹²Veo nou züphao hi dazüyu phaki, avei poukaivei na kainüvei sü phapeie.

¹³Aleshiwo nou anao ahaiko hi buyu phaki, poukaivei myrrh bvü nahai ahi buyu büwe.

¹⁴Aleshiwo hai Engedi kipei hinou kainü veishoa pahyu henna poupa büe.

¹⁵Oh aleshipai, ne hai daizhou koute hüveisa, ne nghithou haisü khao nghithou büe!

¹⁶Oh aleshipu, ne-a daizhou koute hüveisa, cheche vujünou ne hai mainü hrüe. poudai sünou ahai vei züphao soulai;

¹⁷ahai vei ki deka khesü sedar süünou soulai, ahai vei kivo sü haosü nou khalai.