Read Poumei Naga SOLOMON VEI LOU 2 Bible Online

SOLOMON VEI LOU 2 - Poumei Naga bible

SOLOMON VEI LOU 2

¹Ewo Sharon hinou buyu rose poupa alie, alia deikho hinou pahyu lily poupae.

²Aleshipai nou naotu maitao hrohinou buyu hai lily poupa alinou shube hrohinou buyu büa baie.

³Aleshipu nou nahle maitao hrohinou buyu hai Phobe linou vaohro hinou buyu büa baie, Lesa shoa E puh khunghu khe hinou bue, alia puhvei rashithou sü Eye donou touvei shoe.

⁴Puhnou Eye sa-a nünüyu ki hi save-e, alia puhnou ape hinou lesha sah sü hrapae.

⁵Eye kikhai touyu darkha thou nou vaih peio, alia phoshi nou ale souhrü peio; daiolouzü lesha vanou Esü lelou hore.

⁶Oh, puhvei bah nalao nou apei khe thaithou, alia puh bah zhoulao nou Eye khopeie.

⁷Oh Jerusalem hi buyu naotu maitao, E neletao hi khowe, taveiyu kho-shu zhih hinou: lesha nahai lah puh jüpa souche loumo koute neletao nou puhye daishu moa daikailai moe tea chaachou soupeio.

⁸Oh, A leshipu vei pai sü Enou choou-e! Zhukhaio, puh sü laire, deichi hinou chopo-a, deitao pei hinou kapoa laire.

⁹Aleshipu hai nahleyu kho-shu ali büe. Zhukhaio, puhsü bouvo thailao nou lawe, puhnou vabomü hinou phithouwe, ki chayu hinou chozhua bue.

¹⁰Aleshiwo nou ahi paoe. Tashulo, aleshipai, avei jüpapai, tapalo;

¹¹daiolouzü zhukhaio, chuo teisai sü latare, teiro sü chere alia tare.

¹²Poupa khesü pahpare, lou souyu teile sü laire, Chingu paisü Etao teidei hi chou-a bure.

¹³Doube nou doushithou shikoure, alia darkhabe taosü pah pare; puhtao nou kai veihsü peipare, tashulo, aleshipai, avei hüveipai, tapalo.

¹⁴Ne hai lya qulu hinou tuchüa buyu khrao büre, Oh aleshipai, Eye pa nepa ngaowuo, Eye pa nepai chouwuo, daiolouzü nepai sü keivei shoe, alia ne pasü ngaovei shoe.

¹⁵Darkha kipei ve soushi-a buyu lakhaotao, Lakhao taitya Eye nüpeio, daiolouzü Ahai vei kipei hisü darkha pah papha-a bure.

¹⁶Aleshipu sü aveie, alia Esü puh veie, puhnou puhvei zhaokhome sü lily poupatao hrohinou pa poutouwe

¹⁷Shona teikhai hümo koute alia khungu hatamo koute. Aleshipu, nahleyu kho-shu alinou Bether deichi hinou tayu büa ahi dakhai vepeio.