Read Poumei Naga SOLOMON VEI LOU 4 Bible Online

SOLOMON VEI LOU 4 - Poumei Naga bible

SOLOMON VEI LOU 4

¹Aleshipai, ne hai daizhou koute hüveisa! Ne nghithou sü pahosah khenou khao nghithou büa bue. Ne peishu hai Gilead deishao hi takouyu nghitu khome ali büe.

²Ne huh hai zhaotu mai saiwua dzü khesha touloua tapayu büre, alia teitei nou pa-pa buyu, alikhei-a thaido moyu zhaokhome ali büre.

³Ne mütai hai homarayu phapo ali büa hüvei shore, Ne baitu sü touchü hinou lyavai khaitouyu vajüshihithou büa pahosah khevai nou bue.

⁴Ne ngu hai David veo nou reihna khaibu soua kushoa soukhai touyu ki, reih poa soure basei thethe khaiyu büre.

⁵Ne nao ahai sü kho pfüna büre, lily poupa hrohinou poutoua buyu shuh teutu ahai büre.

⁶Shona teikhai hümo koute, ae khungu hatamo sasü Ewo kaivei pou deichü hi alia kaivei theadzü deichi hisü bua bailai.

⁷Aleshipai, newo hali hala veikhai toua baie, ne hiwo chaa taoyu ali-a hae.

⁸Enou nyalaiyu napaire, Eye koa Lebanon hinou ta-a baikhe! Eye koa Lebanon hinou ta-a baio. Kipeikhaodu alia shirakhao nou buyu buh Amana deichitao hinou, Senir alia Hermon deichi hinou tavai talo.

⁹Nenou Alesü sousasho peiwure, atupai, Enou nyalaiyu pfüpai, Ne nghithou Eye bakhali zhupeiyu nanou, alia nevei touh mutei chuh alinou Alesü sousa-vasho peiwure.

¹⁰Atupai, Enou nyalaiyu pai, nevei lesha nahai daizhou koute jüh-e! Nevei leshiyu nahai zhaoh jünou veipu shohie, alia nevei kaiveipou hai kaiveipou kukhe jünou veipu shohie.

¹¹Aleshipai, ne mütai hio voudzü buyu büe, voudzü alia chonaodzü hai ne mali khehi buyu büre; Nevei sahbanü hi kaivei hai Lebanon hi buyu kaiveipou tao bucheyu büre.

¹²Atupai, aleshipai, ne hai bokha khaitouyu kipei ali büre, khangi khaitouyu dzühla ali büe.

¹³Ne hai vajüshithou alia rashibe aveih tyanou doloua shokhai touyu kipei büre, alia kainüvei henna ae nard paitya hrüyu kipei büe.

¹⁴Sühisü saffron, kalamus, ae sinnamon, sütao koa kaiveipou ae kaivei theadzü, kainüvei na matsütao teitei nou sühisü koa buche-e.

¹⁵Ne hai dzühla payu kipei-e; hriyu dzükhao, alia Lebanon deichi hinou kükouyu reitou alie.

¹⁶Kaishulo, Oh reilo teikhai, alia tave-o, khelo teikhai! Avei kipei hi ve hüpeio, panou puhvei kainüvei nasü pfüa vakou raolai. Aleshipu ye panou la puhvei peida hi vewo, alia puhnou jüpayu rashi khesü ve touwuo.