Read Poumei Naga SOLOMON VEI LOU 5 Bible Online

SOLOMON VEI LOU 5 - Poumei Naga bible

SOLOMON VEI LOU 5

¹Atupai, aleshipai, avei kipei hisü E vere, Enou avei kainüvei pou khesü pojülaire, Enou voudzü sü avei voudzüpho koa nou toulai, Enou rashidzü sü avei chonaodzü koa sho-e. Toukhaio, Oh aleshipu, alia ke khaio; lesha nasü nenou khamo koute ke khaio.

²E zütae, ana alesü kai-a bubaie. Keikhaio! Aleshipu nou kikhu sü khou-a bure. Eye kikhu houthou peio, atupai, aleshipai, Avei khao, avei chahche paire; daiolouzü apei sü vidzü nou chare, apeishu-a khei vei dzü zaoyu vanou chare.

³Ewo asahnü phawure; E kabüa süsü thoupulou khailai? Aphi-a dzü khüwure, E daisounou süsü nai napu khailai?

⁴Aleshipu nou kikhu hi puh bah thaithou deire, ae ale khevai sü sayu nou phoukhare.

⁵E-a aleshipu ye sü kikhu houthou peilai tea tashue. Abah sü kaiveipou nou naloue, ae abah teutu hisü kainüvei pou nou naloua kou kikhu khukhai touyu nasü phapeie.

⁶Enou aleshipu ye sü kikhu houpeie, ana aleshipu hai ta-a baire. E puh vei pai choloua lülou hoa baire. E puhye phouta-e, ana puhye ngaolou moe, E puhye la-e, ana puhnou khüpei moe.

⁷Nuh khomai taonou nuh sühao zhutayu phaki, puletao nou Eye ngaolou-a baire, puletao nou Eye dapeie, puletao nou Eye zipeie; romü khoyu maitao nou avei sahpu nasü soupha peia baire.

⁸Oh Jerusalem hi naotumai taore, E neletao hi khowe, neletao nou aleshipu ye ngaolouzü, E lesha vanou sou-a bure tea puh hi paopeio.

⁹Oh naotumai hrohinou hüvei khapaire, ne leshipu hai mai kukhe mai leshipu jünou daie kouyu bue? Ne leshipu hai mai kukhe vei leshipu jünou daie veipuyu bua ne Etao hi puh daikinou bue touyu paopeio touwe?

¹⁰Aleshipuo hüvei shoe alia khouko-a bue; puh hai mai thekirou hrohinou dopa khaitouyu mai alie.

¹¹Puh pei hai veikayu sana-e; puh peishu sü kheireireiwe, ae teivayu lütei büwe.

¹²Puh nghithou hai chonaodzü hinou theasha loua dzünghou hinou pa dadou-a buyu rahouh büa hüveie.

¹³Puh baitu hai kainüvei papeiyu pou kaivei kipei büa veie. Puh mütai hai kainüvei lily poupa dzü büe.

¹⁴Puh baokao sü sana nou ngasouthou khaitoua mutei chuh nou roukhai touyu büe, puh pfüphao hai muteiyu paongi nou veishoa souho khaitouyu büe.

¹⁵Puh phi haisü sana nou beikhei soua albaster chuh nou shokhai touyu deka büe. Puh zhurao hai Lebanon hi dopa khaitouyu sedar süübe kue.

¹⁶Puh chipao hai-a jühka-e, alia puh hai hali-hala hinou lichekhai toue. Aleshipu ae asamai nahai haibüe, Oh Jerusalem hi naotu maitaore.