Read Poumei Naga SOLOMON VEI LOU 6 Bible Online

SOLOMON VEI LOU 6 - Poumei Naga bible

SOLOMON VEI LOU 6

¹Ne leshipu sü kalao vetare, Oh naotu maitao hrohinou hüvei kayu paire? Ne leshipu hai ludu kalova vetare, Eh hi paopeio; Etao-a neye koa puhye sü phou talai.

²Aleshipuwo puhvei kaiveipou buyu kipei hi hotare, puhvei zhaokhome ye panou pou toure donou alia lily poupa khaire donou tare.

³Aleshipu hai aveie, ae E-a aleshipu veie. Puhsü puhvei zhaokhome ye sa-a lily poupatao hrohinou pou daitouwe.

⁴Aleshipai, ne hai Tirzah büa hüveie, Jerusalem büa ngaoveie, sahra polaiyu reihmai büa ngaopi shoe.

⁵Ne nghithou ahinou phereita peio, daiolouzü sünanou ale dairei baire. Ne peishu hai Gilead deishao hinou nghitu khome ali nou takouyu büre.

⁶Ne huh hai dzü khüsha loua tapayu zhaokhome ali büa kaapha toure, teitei nou papa buyu, alikhei-a thaido moyu zhaokhome ali büre.

⁷Ne baitu hai touchü nou lyavai khaitouyu vajüshithou büa pahosah khevai nou nga veishoa bue.

⁸Veo ye sü panou vemaipfü rairou, khusoupfü raicha, alia kilai maipfü chosha louho soua buwu!

⁹Ana Ewo mai alikhei leshi-a baie, puhsü khao büa hüvei shoe. Puh hai puhpfü vei nah naotu alikhei soua ae puh pfünou jüpakayu nah ali soue. Kilai maipfü taonou puhye ngaoloua lesayu pai tea kuwe; vemaipfüa ae khusoupfü tao-a puhye paoshowe.

¹⁰Teithe payu zhai büa buyu, khouh büa hüveiyu, teinghi büa vaveiyu, reihmai nou sahra polaiyu büa ngaopi-a buyu hai nahai thaowe?

¹¹Enou thaoye touyu zhure donou rashi kipei hi takoue, deikho vei poupatao zhure donou, darkhabe tao hai lahpa pamoyu zhure donou, vajüshithou pa pahpa mosa touyu zhure donou.

¹²Enou sülou mojünou, Eye hra-a buyu naotupai nou Eye sü rheiluki ali hi veo nahpoutu mai ali büa pothou khaiwu baire.

¹³Dakhai velo, dakhai velo, Oh Shulam naotumai nare, Etao-a pa neye zhure donou khaivelo, khaivelo. Neletao daisounou Eye reihme ahai nghoujü hinou hrosouyu zhulai touwe?