Read Poumei Naga SOLOMON VEI LOU 8 Bible Online

SOLOMON VEI LOU 8 - Poumei Naga bible

SOLOMON VEI LOU 8

¹Oh, ne hai apfü nou naopa peikhai touyu aprou mai ali tousarou! Süthaio, E neye vakou nou daoyuma, Enou neye kholoua mümu peiyu phaki maili noua Eye jüphilai moe.

²Enou neye süthai poa apfü ki hi sa-a loulai, alia Eye hrülouyu puhvei kide nahi sa-a loulai. Enou neye kaivei pou nou thou souyu rashidzü pa solai, alia avei vajüshidzü sü panou kelai.

³Oh nevei bah nalao nanou apei khehi thoulo, alia nevei bah zhoulao nahai Eye khopeio!

⁴Enou neletao hi chaachou soupeio tea khowe, Oh Jerusalem hi nah naotumai taore, süolouzü neletao nou leshaye panou la puh jüpa souloumo koute puhye soushu moa soukai laimoe teanou.

⁵Rükou nou leshipai ye khopoa laiyu hona hai thaoe? Phobe phinou Enou neye soukai peiwure, buh tehinou nepfü sü veashowure, buh sühinou neye nyapeiyu paisü veashowure.

⁶Eye sü nevei lethou pei hi sheesao soua khaipeio, alia ne baokao hinou shee ali soua khaipeio, daiolouzü lesha hai athai büa khouwe, sounüyu hai khüh büa pou shiwe. Puhvei meikei hai-a mei vei meikei büe, chachih shoyu meikei ali büa taowe.

⁷Lesha vei meikei nahai dzü alao lathouyuma souhi louhoe, dzüdu hai-a puhye maolou hoe. Mai tarali nou puhvei kini nou poa lesha ye hrülai toulouzü puhye sü mainou ngaora shoa bailai.

⁸Etao hi nahle shoyu tupai ali bue, alia honapai hai naonao-a titouli bai hie, khemainah nou puhye ve koa bulouzü Etao daisou peilai?

⁹Honapai hai bouvo aliyu thaio, Etao nou puh pei hi nou shahu nou soushu peilai, mokhaia honapai hai kikhu aliyu thai-o, puhye sü sedar sünou lukhao souloua dakha peilai.

¹⁰Esü bouvo alie, alia anaonao hai kushoyu ki alie. Aleshipuye koa bukhai-e Ale khayu ae kaonayu hai bue touyu puhnou süwe.

¹¹Solomon hai Baal Hamon hinou darkha kipei bue, puhvei darkha kipei sü kho-apei mai hi ngapeiwe; mai ali nou puhye sü shahu thelili pove peiwe.

¹²Avei darkha kipei sü avei vuzü baie, süsü la Eye donou baie; Veo Solomon ye sü panou theli butheo, alia rashi kipei kho-apei mai panou kraihai butheo.

¹³Oh Aleshipai, ne paisü Eye panou keio; Avei samaitao-a ne paisü keinüa kho-a bure.

¹⁴Aleshipu, kaiveipou hrüyu deichi hinou tayu kho-shu ali büa mokhai-a nahleyu kho-lü ali büa ahi kou khaio.