Read Poumei Naga ISAIAH 1 Bible Online

ISAIAH 1 - Poumei Naga bible

ISAIAH 1

¹Judah hi veo Uzziah, Jotham, Ahaz ae Hezekiah mai haitao nou veo souyu phaki Amoz nahpoutu Isaiah hi Judah ae Jerusalem donou zho ngaoyutao sü haitao-e.

²MAPAO nou paoe, “Oh raki ae deiphao, Enou paoyu sü kei pei khaio! Enou kiduso papei khaitouyu nahmaitao nou chuo Eye dutare.

³Kikhaorü louzü lah puletao vei paopuye süwe, alia rheisüh-a lah paopu nou to peiyu buh ngaowe. Ana Israel mai-o louzü sülou more, avei maitao hai tsü sükulou more.”

⁴Oh mah souyu tyahrü, vah ashi soua laiyu neletao hai daizhou koute vealaisa! Neletao vei mahmo nanou neletaoye sü paikhaowure! Neletao nou sheeyu Israel maivei Ramai MAPAO ye malaiwure, ae neletao hai puh hinou tarei tare.

⁵Neletao daidonou puhye dupuwe? Daidonou neletao hai chua panou souveapu peiyu sü jüpawe? Nevei pei teitei nou zhimü khaibaire, ae nevei tsüle sü souloure.

⁶Nevei pei hinou poa phi hi koute hai veiyu ali-a hazei toure. Zhimü payu, soukao pfüyu ae zhe küpayu zhimü khaitoure. Zhimü taosü soushee loumoe, moa sah nou zülou moe, mokhaia darü-a thoulou more.

⁷Nevei nuh teidei khesü hazei toure, nevei nuhdu veishi sü mei nou dei hazeiwure. Ne nghoujü hinou nevei teidei sü shetumai nou poloure, alia soushi khaiwure.

⁸Jerusalem nuhdu likhei shokhaitoua bubaire, nuhdu sünasü darkha kipei hi repao ali büa ae rekou hi sahpao haobuyu ali büa duloure buh ali-a hazei toure.

⁹Khoukhoulai MAPAO nou kamai-a panou hria phapei moyu thaio, Jerusalem nuhdu hai Sodom ae Gomorrah büa souhazei laire.

¹⁰Oh Jerusalem, nevei peikho maitao ae nevei mai hrülai hai Sodom ae Gomorrah hi mai büre. MAPAO nou neletao hi paopeiyu chi khesü keilo, ae Eletao Ramai nou neletao hi paodou peiyu khesü leloua keilo.

¹¹MAPAO nou paoe, “Neletao nou natyatyali nou Eye pove sheela peilouzü E-a na sütao hai jüpa shulai tea neletao tsüchovu? Neletao nou zhaotu ae kikhaorü hübo veitya nou Eye meidei-a posheela peiyu sü khare. Ewo chode, zhaotu ae nghitu zhe khesü jüpa more.

¹²Neletao nou tave Eye thoyu phaki, thaonou neletao hi na haipaitya pove peio tea paopeige? Thaonou neletaoye avei Rathoki sü haibüa tainasasa peio tea paopeie?

¹³Hamako hinou Eye pove sheela peipu khaiso. Neletao nou poukai nüvei meidei-a Eye thoyu hai Ewo kai hüthoulou hore. Khouh Ashu Nüh nüyu, Soteithe reiyu alia maisou nou tave jüa buyu teitei sü Ewo zhu thoulou hore, daiolouzü sütao teitei hai neletao vei mah nou souzhai khaiwure.

¹⁴Neletao vei Khouh Ashu Nüh ae Sheeyu Khonüh khesü E ngaorae. Khonüh sütao hai Eye donou kou süre ae sütao pfüyu hai Eye donou vealere.

¹⁵“Neletao nou bah lapoa veachi paoyuma Enou zhu peilai moe. Neletao nou shusoua veachi alao paoyuma Enou keipeilai moe, daiolouzü neletao vei bah hisü zhe khai-a bubaie.

¹⁶Neletao lah soushee-a bulo, neletao hai anghingao hinou vah ashi souyu teitei sü thaokhai touwo. Vah ashi souyu nasü bailo,

¹⁷ae vah aveih souyu khesü doulo. Kaozü nasü soulo — mainou souvea souhoyu maiye soukha peio, pfüpuo hayu mai vei zü zhupeio, alia mimeapfüye vupeio.”

¹⁸MAPAO nou paoe, “Tavelo, Etao koa nou tsülou-a chi phazho laikhe. Neletao vei mah hai homara-a buyuma Enou vüra jünou soukaapu peilai, ae zhe büa hothou teiküa buyuma Enou phakaa büa soukaa peilai.

¹⁹Neletao nou süsü ae-ao tea achi zü louzü, neletao nou teidei hi pa-a buyu haveih khesü ngaotou loulai.

²⁰Ana neletao nou khaitya-a Eye dulouzü, neletaoye sü souha bailai. Daiolouzü MAPAO Enou haisü paopawure.”

²¹Raichokio louchelou veiyu nuhdu nasü chuo khakhapfü ali büre. Raichokio kaozü soua hrüyu ae acheche mainou phoutao-a buyu nuhdu nasü chuo maiye southayu mai khaitoure.

²²Jerusalem, ne hai raichokio shahu büa bue, ana chuo huba datare; ne hai raichokio darkha zhaoh veitya büe, ana chuo dzü büre.

²³Neletao vei süthai-apei maitao hai maishi tare, ae avao maiye koa samai khamai soutare. Puletao hai seihla züpa tare alia sapeina khesü thaihu tare. Puletao hai vearou nahtouye sü vupei more alia mimeapfütao nou paoyu chi sü keipei bare.

²⁴Südonou chuo Khoukhoulai MAPAO, Israel maivei khoushoyu Ramai nou haibüa paoyu sü keikhaio, “Eye ngaobayu maitao hisü khüngu phouta laire, ae neletao nou Eye souveapu laimore.

²⁵Enou neletao pei hisü abah thaithou talaire. Enou neletaoye sü hu hai pothou meidei-a sousheeyu büa soushee peilai alia neletao hi sheemoyu veishi sü soushee peikhai touwulai.

²⁶Enou neletao hisü raichoki büa peikhoyu mai ae paodou apei maiye sü peilai. Süthaisü Jerusalem hai chilee checheyu ae louche louveiyu nuhdu tea kulai.”

²⁷Daiolouzü MAPAO hai acheche nasüe, südonou puhnou Jerusalem nuhdu ae sühinou leda louyu mai hrülaiye sü vupa peilai.

²⁸Ana puhnou mah souyu maitao ae puhye khaityayu maitao sü souhawulai; puhye malaiyu mai hrülaiye sü puhnou southawulai.

²⁹Daiolouzü neletao hai süübe taoye thoyu donou alia jüpasho-a sheeyu kipei. soulai tea dokupa khaitouyu donou hraongu ngaolai.

³⁰Neletao hai süünghou raita-a kitayu phüsüübe büa thaita-a bailai, alia dzü züpei moyu kipei ali büa bailai.

³¹Rouvao hai meipa ali nou dei louyu büa khouchi shoyu maitaoye sü puletao vei vah ashi nanou lah souhawu bailai, ae mai linoua puletaoye sü vupa peilou laimoe.