Read Poumei Naga ISAIAH 10 Bible Online

ISAIAH 10 - Poumei Naga bible

ISAIAH 10

¹Kaozü moyu hinou zhai soupeiyu maitao ae maikhe maiye souchoro peire donou chikha rüpeiyu mai sü daizhou koute vealaisa!

²Veahoyu mainou ngaozü-a buyu puletao vei zü nasü porei laiyu maitao, ae mimea maipfü ae pfüpuo hayu maivei nangi poloua lahvei soulouyu Emaikhe sü daizhou koute vealaisa!

³Ramai nou neletao ye tudei veyu teithe, ae buh doukou nou teikhai teirü ashi veyu teithe neletao dai soulai? Neletao daikinou ve soukha kholaige? Alia neletao vei kini khesü daiki khailaige?

⁴Neletao sü panou soureih souyu hinou thaitawulai moyuma hukha mai soua panou nüsata khaitouwulai. MAPAO vei lekha rarou sü chukoute-a khaita mohie, puh bah sü lapoa puletaoye tudeipure donou buhie.

⁵MAPAO nou paoe, “Oh Assaria! Enou neye avei lekha-rarou vei süüda sou-a poa vah soulai.

⁶Enou neye seiho Ramai ye louche moyu tyahrü ae avei lekha soupayu maitao vei nangi khesü panou shaoloulai alia puletaoye sü maisou ludu hi buyu naihü büa panou deisasa khaiwulai.”

⁷Ana Assaria veo vei tsüle hiolouzü tyakua nou vah ashi soure donou tsücho da-a bue, puhvei tsüle hiolouzü tyahrü taoliye souhare donou tsücho-a bue.

⁸Puhnou khaosoua haibüa paoe, “Avei peikhomai hrülai hai veo mai khaitou mowu?

⁹Kalno ae Karkhemish, Hamath ae Arpad, Samaria ae Damaskas nuhdutao hai Enou reih veiloue.

¹⁰Jerusalem ae Samaria hi buyu basharatao jünou pou-a thoyu vedeitaoye souveare donou abah thaipa-e.

¹¹Enou Samaria ae sühi buyu basharataoye souhayu büa Jerusalem ae sühinou tho-a buyu basharatao sü souhawulai.”

¹²Ana MAPAO nou paoe, “Zion Deichi hi ae Jerusalem hi Enou soure vahtao souche louzü, Assaria veoye sü puhnou khaophu souyu vanou puhye tudei-a souvea talai.”

¹³Assaria veo nou haibüa khaophu chipaoe, “Avei khoukho nou haitao teitei sü souloue, avei khoukho, tsü aveih ae dokai nou tyahrü khevei deirai sü souda laipeie, ae puletao vei kini khesü shaoloue, alia nuh teidei sühi hrüa buyu maitaoye chode büa Enou deisasa peie.

¹⁴Deiphao hi tyahrütao vei kini khesü Enou raohou phe vaongi louyu büa poloure; mai ali koute-a Eye soupire donou puletao shouh sü pha moe, moa mü-a ngepa ramoe.”

¹⁵Ana MAPAO nou paoe, “Marei nanou puhye poa daoyu mai na jünou dupu hie tea khalou süvu? Süva hai poa süü vayu maina jünou kopu hie tea paolou süvu? Süüda nanou maiye pochamoe, ana mai nou süüda nasü polou-a baiwe.”

¹⁶Südonou Khoukhoulai MAPAO nou pfüphao aveih reihmaitao hisü sounou ashi seive thoupeilai, alia puletao vasou hisü mei deiyu büa panou deilai.

¹⁷Ramai, Israel maivei ava nasü mei ali datawulai, ae Israel maivei Amasheeo Ramai sü meikei ali vitawulai, sübüa süna sünou süü, shube ae na teitei sü teithe ali hinou deihawulai.

¹⁸Sounou ali nou mai aliye soushi peiyu büa MAPAO nou veihshoa buyu vaobü, pounghou süübe ae shinamara veishoa shipeiyu teidei teitei sü soushi khaiwulai.

¹⁹Puhvei veihshoa buyu vaobü hisü süübe daotu shokhai peia bailai, süsü nahmaitu ali koute nou phouloua bailai.

²⁰Shokhai toua buyu Israel maitao hai puletaoye souhalai tea buyu tyahrü taoye louchepu moa Israel maivei Amasheeo, MAPAO sü acheche hinou loucheyu teithe sü velaire.

²¹Shokhai toua buyu Israel mai daotu hai Khoukhoulai Ramai hi dakhai velai.

²²Daiolouzü Israel mai hai chuo louzü zai hi vünai zhoua buyuma, mai daotu dakhai ve-a bailai. Puletaoye souhare donou soudachewure.

²³Cheche vuzünou Khoukhoulai MAPAO nou paoyu thaipfüa tyadei sühi hrüyu mai hrülaiye sü souha khaiwulai

²⁴Khoukhoulai MAPAO nou Zion hinou hrüa buyu maitao hisü paoe, “Oh Zion hinou hrüa buyu avei maitao, Ejipt mainou souyu büa Assaria mai nou neletaoye souveayu sü ngaopiso.

²⁵Phajütou thaisü avei lekha-rarou nasü neletao hinou latawulai, süthaisü avei rarou sünou puletaoye tudei talai.

²⁶Khoukhoulai MAPAO Enou Midia maiye Oreb chuhdu hinou dayu büa puletaoye sü dapeilai, ae Ejipt maiye souveayu büa Assaria maiye sü soupeilai.

²⁷Süzhou teithe sü Enou neletaoye panou lahdo souyu ngaoloulai, Assaria maivei khakhe hi sünou pa bupu khailai moe.”

²⁸Ngaobayu reihmai nou Ai nuhdu nasü poloure! Puletao nou Migron tacho poa taloue! Mikmash hi puletao vei nangi khesü khaire donou buh souda khaiwure.

²⁹Puletao ludu sü tapoa velou süzhou khei hai Geba hi bure. Ramah nuhdu hi hrüa buyu maikhe sü ngaopi shoa bure, alia Saul Veo vei Gibeah nuhdu hi buyu maikhe sü tutare.

³⁰Shakhaio, Oh Gallim hi maitao! Oh Laishah hi maitao, kei khaio! Oh Anathoth hi maitaore, chila sü peikhaio!

³¹Madmenah ae Gebim hinou hrüa buyu maitao sü tutsü tare.

³²Zhou teithe hai ngaoba mai nou Nob nuhdu hisü ve buloure, ae puletao nou Zion Deichi alia Jerusalem nuhdu ye sü bahzü züloua soupi-a bure.

³³Khoukhoulai MAPAO nou puletaoye sü süübe hinou süübo daodeyu büa daode laiwulai. Khaophu soukayu maitao ae kukulai hinou buyu puletaoye sü daode pokou hraongu soupeilai.

³⁴MAPAO nou puletaoye sü vaobü hinou süübe viyu büa vilaiwulai, Lebanon hi süübe veikayutao vilaiyu büa vilai bailai.