Read Poumei Naga ISAIAH 14 Bible Online

ISAIAH 14 - Poumei Naga bible

ISAIAH 14

¹MAPAO nou Israel maiye zhuvea peilai, ae puletaoye puhvei mai soure donou dodakhai loua panou lah vei teidei hisü dakhai ve panou hrüpu loulai. Shetumai-a puletaoye koa ve hrüzholai.

²Tyahrü taoli nou Israel maiye soukha peilai, sübüa neletao ye MAPAO nou peikhai touyu teidei hisü panou dakhai ve hrüpu loulai, ae tyahrü kukhe maiye puletao vei qila panou soua hrülai. Puletaoye nüpoa tayu maitao sü puletao nou nüloua puletao vei hukhamai soulai, ae puletaoye souveayu maitao pei hinou neletao nou khasa-a hrülai.

³Neletao panou veaho shoa ae chorosoua tateishoyu vah souyu hisü MAPAO nou neletaoye soyu peiyu phaki,

⁴neletao nou Babilon veo hisü haibüa nou konülai: “Zhaipou ashi veo sü kaotare! Puhnou maiye sü souvea souchoropu khailai more.

⁵MAPAO nou ashi hinou nuh teidei khoyu maiye khouko sü souha peiwure,

⁶Lekha rarou hinou maikhe maiye tudeiyu ae zhaipou shishoa maikhe maiye souvea souhoyu peikho maiye sü souhawure,

⁷Chuo deiphao teitei sü asashoa shoyu ae kaonayu sü ngaoloure, mai hrülai sü sasho-a lou soua bure

⁸Lebanon hi haosüü ae sedar süübe khenou sashoa ne pei hi haibüa paoe, ‘Nenou kaodu tayu thai Etaoye chuo mai linoua vilai more.’

⁹“Rabedushao nou neye daore donou ne velouyu vuzhia bure. Deiphao hinou maiye khosa-a buyu ae tyahrü tya tya li hinou veo maitaoye Rabedushao sünou chalai tea puh buh hinou kushu bure.

¹⁰Puletao mai hrülai nou ne hi haibüa paolai, ‘Chuo ne-a Etao büa lelou hore! Ne sü chuo Etao bütoua baire!

¹¹Neye sü maikhe mainou shapoulei, gaigou ae poa lou souyu basei nou tsükhoua lou sousho peie, ana chuo ne-a thaimai buh hisü vere. Shikhao sünou nevei zü khuyu ae bazüyu sah soure.’

¹²“Oh Babilon hi veo, vavei shoyu shona teivu, kabüa nou ne sü raki vanou dekou tare? Raichokio tyahrü kheye nenou veiloua buwe, ana chuo ne sü deiphi hi kaolou tare.

¹³Ne le hinou, ‘E rakiva kheloua Ramai vei teivutao pei hi pa avei vebuh soulai, ae ramaitao nou vejüa buyu reilova buyu deichi hinou veo mai büa Enou bulai.

¹⁴E teihao pei hi taopa bulai, alia kukulaio raibüa sühisü bulai,’ tea ne tsüchoe.

¹⁵Ana neye sü thoukayu thaimai buh hisü polou khaiwure.

¹⁶“Thaimaitao nou neye zhutei touloua haibüa tsücholai, ‘Deiphao soulüyu ae vedeitao soungu peiyu sü mai haina movu?

¹⁷Nuhdutao souhawua panou radeiki büa datayu ae hukha maiye phapei bayu sü mai haina movu?’

¹⁸Deiphao hi veo mai hrülai hai lahlah vei khü hinou tsükhou shoa vukhai toupeie,

¹⁹ana newo louzü khü ha-e, nevei thaiphao sü tangiyu na ali büa laidu khaiwure, soureih souyu hinou thaiyu thaiphaotao koa nevei thaiphao sü lyaqulu hi laithou khaiwure.

²⁰Veo mai ali büa neye louzü poa vupei more, daiolouzü ne hai lah nevei teidei sü soushi khaiwure alia lah nevei maitaoye sü southare. Ashi souyu nevei sholya hrülai sü panou mai ali koute-a hrilai moe.

²¹Mah souyu donou puletao panou deiphao hisü hrüpulai moe alia deiphao hinou nuhdu khesü panou soupapu laimoe.”

²²Khoukhoulai MAPAO nou paoe, “Enou Babilon sü dutalai alia souhawulai, sübüa nahmai ali koutea panou hrilai moe.

²³Enou Babilon teidei sü rekhaona buh soupeiwulai, ae zaidzü soudawulai. Phai nou poa phailaiyu büa Enou souhakhai touwulai,” tea Khoukhoulai MAPAO nou paoe.

²⁴Khoukhoulai Ramai MAPAO nou haibüa chaachou souwure, “Enou souda khaitouyu thaipfü haisü vepalai, alia Enou tsücho khaitouyu thaipfüa soulai.

²⁵Enou Assaria maiye sü avei teidei hinou souhawulai alia puletaoye sü avei deichi hinou aphikhe taidei thou khaiwulai. Assaria maivei phaodao nasü avei maitao phao hinou laokou peilai, ae avei maitao vei kousüh nasü polai peilai.

²⁶Deiphao teitei donou soudayu sü haire ae tyahrütaoye souveare donou abah sü thaipawure.”

²⁷Daiolouzü Khoukhoulai MAPAO nou haibüa soulai tea tsüchodawure, ae hainasü thaonou kha lousüe? Puh bah sü thaipawure, ae haisü thaonou nulousüe?

²⁸Veo Ahaz thaiyu po hinou paopeiyu chipao sü hai haie.

²⁹Oh Philistin maitaore, neletaoye dayu süda nasü chatare tea asah souso, daiolouzü nghou ali thaitayuma süna thaosü shipuyu nghou ali pabaiwe, alia nghoudzü hinou shishoyu nghou alao kopa peiwe.

³⁰MAPAO nou touha sohayu puhvei maitaoye sü vupa peilai, ana Philistin maitao hiolouzü tokaayu seive peilai, alia thaihao moa shokhai touyu maitao sü puhnou southawulai.

³¹Oh Philistin nuh teidei hi hrüa buyu mai hrülai, kra-a dopfü loukhaio! Oh Philistin mai hrülai, ngaopi lou khaio! Daiolouzü reilonou reihmai sü meikhaoyu büa laire, puletao hio khuhayu mai aliro laimoe.

³²Etao nou Philistin maivei kopomai hisü kabüa chila peilai? MAPAO nou Zion nuh sü soushupeie, ae veahoyu puhvei maitao nou buh sühinou kaozhou veia hrüloulai tea chila peilai.