Read Poumei Naga ISAIAH 19 Bible Online

ISAIAH 19 - Poumei Naga bible

ISAIAH 19

¹Chipao haisü Ejipt donou paoe. Taveih shoyu teihao phao nou MAPAO sü Ejipt mai hi ve-e. Ejipt maivei bashara khesü puh nghoujünou pia ngure, alia Ejipt maivei khuveih nasü hatare.

²MAPAO nou paoe, “Enou Ejipt mai hrohisü haivayu thoupeiwulai, sübüa panou thaihou ae jürai sü züveilai, kinapa ali nou aliye davalai, nuhdu ali nou ali pei hi soureih soulai, alia vedei alinou ali pei hi reih soulai.

³Ejipt mainou tsüchoda khaitouyu khesü Enou souhawulai, ae puletao sü chathai talai, puletao nou basharatao soukha phoulai keingumai ae thaimai rako hinou daisoulai tea noulai.

⁴Enou Ejipt maiye sü soushi shoyu ae lesha hayu veomai bah hi thoupeiwua panou puletaoye khasa-a hrülai. Haisü Khoukhoulai MAPAO Enou paopawe.”

⁵Nail reidzü sü thetalai, ae rei kukhetao-a dzü theta-a bailai.

⁶Lao khesü kai nushisho palai, alia Nail rei hi küve louyu reitou khesü shoshonou theta bailai, ae poudai khe-a kita-a bailai.

⁷Nail reipe hi thoukhai touyu shinamara teitei sü kita-a bailai, ae teikhai nou hülaikhai bailai.

⁸Nail rei hinou kha phoutoua hrüyu maitao sü dopfüa kralai, daiolouzü puletao vei khahsü ae khahbe khesü matsü laimoe.

⁹Pha souyu maitao ae lüh souyu maitao sü levea talai,

¹⁰ae sah daoyu maikhesü chathai talai, alia zho kutouyu maitao sü veaho talai.

¹¹Zoan hinou hrüyu peikhomaitao sü vore! Ejipt teidei hi tsüdo veikhayu maitao sü kaozü moyu hinou paodoupeia baire. Neletao kabüa veo hisü “Etao hai daoh raichoki hasüyu maitao ae veo maitao vei tyaosholea-e” tea paolouwe?

¹²Ejipt hi veowo, nevei hasüyu maitao sü daiki vetare? Puletao nou Khoukhoulai MAPAO nou Ejipt pei hi tudeire donou kabüa chodawe touyu khesü ne hi panou paopeio.

¹³Zoan ae Memphis hi süthai-apei maitao hai votare, puletao hai nuhmai ae rümaitaoye kaozü hinou süthaisa-a tapeiyu pha-e, anou kaomo hilo süthaisa-a tare.

¹⁴MAPAO nou puletao tsüle hisü chohayu peiwure, südonou puletao sü kaomoyu hinou paopeiwua Ejipt maiye sü panou zhaoh sozhiyu mai hinou rüpakhai touyu hinou pyaloua duyu büa puletao nou souyu vah veishi hisünou shita-a bure.

¹⁵Ejipt hi maitara linou-a, toungiyupu-a touhayupu-a, matsüpu-a ae matsümona-a soukha loure ludu hare.

¹⁶Sükuyu teile veyu phaki Ejipt mai hai naotumai büa natai talai, Khoukhoulai MAPAO nou puletaoye tudeire donou puh bah thaipayu sü ngaoloua ngaopi shopoa ngurürülai.

¹⁷Alia Judah maivei teidei hai Ejipt maiye donou ngaopi shoyu ali souwulai, daisounou toulouzü Khoukhoulai MAPAO nou puletaoye sü dure donou souda khaiwure.

¹⁸Teithe süna veyu phaki, Ejipt maivei nuhdu hisü Kanaan (Hebrew) mai la nou raolai, alia puletao nou Khoukhoulai MAPAO khehinou hrülai tea chaachou soulai. Nuhdu sütao hrohinou nuhdu ali zhih hai “Teinghi Nuhdu” tea kulai.

¹⁹Süzhou teithe sü Ejipt teidei hi MAPAO vei rathobuh bulai, alia Ejipt maivei deirai hisü MAPAO hi peithouwure touyu chuhsho khesü bulai.

²⁰Khoukhoulai MAPAO hai Ejipt maivei teidei hi bue touyu shee ae shaki sü hai nanou soulai. Souvea hoyu mai bah hinou soukha peio tea puletao nou paoyu phaki MAPAO nou puletaoye vupapeire donou mai ali seive peilai.

²¹MAPAO nou Ejipt mai hisü puh lah süngao peilai, alia süzhou teithe sü Ejipt mainou MAPAO ye sü süloulai, ae puhye tho-a meideiyu posheela nakhesü pove peilai, alia puletao nou MAPAO hi chaachou soukhai touyu khesü soupeilai.

²²MAPAO nou Ejipt maiye souvea peilai, ana süthaisü puletaoye souvei peilai, alia puletao nou MAPAO hi dakhai velai, ae puletao nou veachi paoyu khesü noupeilai ae souvei peilai.

²³Sübüyu teithe veyu phaki, Ejipt hinou Assaria hi koute hai ludu adu ali ae Ejipt mainou Assaria hisü talai, alia Ejipt mainou Assaria maiye koa ratholai.

²⁴Süzhou teithe sü, Israel mai-a Ejipt ae Assaria maiye koa sava-a hrülai, alia tyahrü haitao asü vanou deiphao mai hrülai nou shiha ngaolai.

²⁵Khoukhoulai MAPAO nou puhtao hisü shiha peia haibüa paolai, “Ejipt, avei maitao, ae abah nou soukhai touyu Assaria maitao, alia Enou dopa khaitouyu Israel maitao, neletao hisü Enou shiha peilai.”