Read Poumei Naga ISAIAH 2 Bible Online

ISAIAH 2 - Poumei Naga bible

ISAIAH 2

¹Chipao haitao hai Ramai nou Amoz nahpoutu Isaiah hi Judah ae Jerusalem donou paopeie:

²Haithai naki haibüa nou vepalai, süolouzü MAPAO vei Rathoki soukhai touyu deichi nasü deichi teitei jünou kupulai, ae deitao kukhe jünou taopulai. Tyahrü hrülai nou hai hisü tobai soumoa tave loulai.

³Maikhe mainou taveloua haibüa paolai, “Khe, Etao MAPAO vei deichi peiva Israel maivei Ramai ye thoyu Rathoki hisü tave laikhe. Etaoye panou daivah souyu jüpawe touyu puhnou Etao hi dou peilai; ae puhnou dopa peikhai touyu ludu hisü Etao nou talai. Daiolouzü MAPAO vei dou-apei nasü Jerusalem hinou vepawe, Zion hinou puhnou puhvei maitaoye chaku peiwe.”

⁴Puhnou tyahrütao kohinou lou chiku peilai, ae maikheye acheche hinou chiku shee peilai. Süthaisü puletao vei khoche hai dathou phou souloulai, ae puletao vei heung sü pothou tatayu shi souwulai. Tyahrü ali nou ali hi soureih soupu laimoe, mokhai-a reih soure donou soudapu khailai moe.

⁵Oh Jakob vei tyaosholea maitaore, chuo Etao MAPAO vei ava hinou tabai laishe!

⁶Oh Ramai, nenou Jakob vei tyaosholea maitao, nevei maitaoye sü malaiwure. Chuo teidei haihio teinghi palova mai ae Philistin mai büa keingumai nou phouloure. Maikhe mai hai vakou maivei zhaidou hinou hrüta khaire.

⁷Puletao vei teidei hi hai shahu ae sana nou phoutao bure, ae puletao vei kini khesü akhai hare. Puletao vei teidei hisü rhei khaitoure, alia rheiluki hai-a akhai ha-a nou bure.

⁸Puletao vei teidei hisü bashara nou phoutao buloure, ae puletao hai lah puletao bah nou soukhai touyu nakhesü thotare.

⁹Mai hrülaiye sü hraongu soupeilai. Puletaoye sü khaipei khaiso, Oh MAPAOwo!

¹⁰Puletao nou MAPAO vei lekha rarou ae puhvei khouko alia kathe nasü ngaopi-a deichi hi buyu lyaqulu kinou ae deibvü raoloua tuchü tuvai talai.

¹¹Khaophu souyu maiye panou akhai soure ae khaityayu maiye souhawure teile sü velaire. Süzhou teithe sü MAPAO ye likhei paosho-a bailai.

¹²Süzhou teithe sü Hali-hala Soulousüo MAPAO nou khaophu souyu mai ae aduso mai hrülaiye sü sounakou khaiwulai.

¹³Puhnou Lebanon hi kushoa buyu sedar süübe ae Bashan hinou veishoa buyu phesüübe khesü souhawulai.

¹⁴Puhnou deichi ae deitao kuyu teitei,

¹⁵kushoa soukhai touyu ki teitei ae kaopo soua pokhai touyu kivo veishi sü souchivü tea khaiwulai.

¹⁶Puhnou dushoa soukhai touyu dzüluki teitei ae hüveishoa soukhai touyu shamara veishi sü souhawulai.

¹⁷Süzhou teithe sü khaophu souyu mai ae vah ashi souyu mai hrülai hai souha khaiwulai. Basharatao-a ngaomo ta-a bailai, alia MAPAO ye likhei paosho-a bailai.

¹⁹MAPAO nou deiphao hai ngulü poa veyu phaki, puhvei lekha rarou hinou tureipa loure donou ae puhvei khouko ae kathe hinou tuchü loure donou maikhe mai hai deichi hi tupa lyaqulu kinou ae deibvü vouloua tuchü talai.

²⁰Teithe süzhou sü puletao nou shahu ae sana nou soukhai touyu bashara khesü zhao ae bailou hi shilai peilai.

²¹MAPAO nou deiphao ngulü poa soupi soura veyu phaki puhye ngaopiyu donou ae puhvei aduso nasü ngaopiyu donou maikhe mai hai lyaqulu ae deibvü kinou tuchü talai.

²²Thai-a bailaiyu mai hisü neletao vei lü hai khaipu khaiso. Puletao hai dai-e koyu bue?