Read Poumei Naga ISAIAH 20 Bible Online

ISAIAH 20 - Poumei Naga bible

ISAIAH 20

¹Assaria hi veo Sargon nou puhvei reihmai peikho naye seive Philistin maivei Ashdod nuhdu hi soureih soulou polouyu po nahi,

²Amoz nahpoutu Isaiah ye sü MAPAO nou sabanü phawua baitoua tawo tea paoe. Puhnou paoyu chi züa sabanü ae phikha noumoa baitaoua ta-e.

³Süthaisü MAPAO nou paoe, “Avei kilai Isaiah nou po asü hai sabanü banoumoa ae phikha thoumoa baitoua tayu büa Ejipt alia Ethiopia (Sudan) mainou talai.

⁴Assaria hi veo nou Ejipt maitao ae Ethopia maitaoye sü nahmai tsümai sümoa baitoua panou haongu soupeia nüpoa talai.

⁵Ethopia maiye louche-a buyu maitao alia Ejipt vanou khaophu soua buyu maikhe sü ngaopi talai ae hrao talai, puletao vei areih khesü hatalai.

⁶Sübüyu teithe veyu phaki, Philistin maivei zaipe hinou hrüa buyu maitao haibüa paolai, ‘Zhukhaio, Assaria mai bah hinou Etaoye panou vupa peiloure donou ae Etaoye soukha peiloure donou etao nou zhia buyu mai hisü haibüa vepare! Chuo Etao daipha soulai?’ ”