Read Poumei Naga ISAIAH 21 Bible Online

ISAIAH 21 - Poumei Naga bible

ISAIAH 21

¹Babilon vanou paoyu chipao sü haitao-e. Negeb hinou teikhai teirü ashi hüveyu büa, ngaopisho-a buyu teidei ali hinou reihmai sü veloure.

²Enou avei zho hinou ngaopi shoyu ali haibüa ngaoe-e; shohdo souyu mainou shoh souwe, ae maiye soushiyu mainou soushi peiwe. Elam vei soureih maitao, reih hulou khaio! Media hi reihmaitao, nuhdu khesü talou soushi khaio. Puhnou maiye souvea hoyu teithe sü chuo Enou pa akhai soulaire.

³Avei zho kounou ngaoyu ae chouyu vanou Esü ngaopi shore alia apfüphao teitei sü sousho-a bure. Enou souyu hai naotumai ali nou nah nayu phaki souyu büa souwe.

⁴Apei sü vei-a bubaire ae ngaopiyu sünou nguhrührüre. Enou teimai louyu hai jüpa-a zhi-a bue, ana süsü veimoa nou shipu baire.

⁵Avei zho hinou puletao hai tousore donou buh souda loure, maikhe maiye panou bure donou soumai sah sü khuloure. Sübüa puletao nou touso-a buyu hinou, thashoa nou peikho maitao, “Neletao vei basei sü tuda lourao” tea paoe!

⁶Süthaisü MAPAO nou ahi haibüa paoe, “Taho reihkhaomai khailo, alia puhnou ngaoyu teitei sü panou paopeio.

⁷Puhnou rhei pfüa laiyu mai ngaolouzü, papa nou pfüa lailouzü, rheisüh ae racho pfüa laiyu ngaolouzü, soutaosou zhutou loua panou paopeio.”

⁸Reikhaopu nanou paoe, “Oh Paopuwo, Enou reihkhaobu hai hinou hea-khei lapoa nou kho-a bue.”

⁹Enou rheipfüyu mai, mai ahai ahai nou laiyu ngaoe. Reihkhaowo nou haibüa sha-a paore, “Babilon sü kaota laire, kaolaire! Puh vei bashara teitei sü deiphi hi soukou deikho khaiwure.”

¹⁰Oh avei maitaore, neletaoye sü chathai hinou thou taiyu/dayu büa nou bue, ana chuo Enou Khoukhoulai MAPAO, Israel maivei Ramai hinou chouyu ko aveih sü paosü peiwe.

¹¹Chipao haisü Edom (Dumah) vanou-e. Mai ali nou Eye Seir (Edom) hinou kuloua haibüa noue, “Reihkhaowo, khei teile sü kapha hinou chelaige?”

¹²Enou haibüa chila peie, “Tei thepa laire, anou khei kou daopu laihie. Nenou noupulai toulouzü dakhaive noupuloua bailai.”

¹³Chipao haisü Arabia maiye donoue. Oh Dedan maitaore, rachome koa chaobu soupoa tave Arabia vei radeiki hinou fühao souloua buyu phaki,

¹⁴reia laiyu maitao nou neletao hi veyu phaki dzü peia panou kelo. Tema hinou hrüa buyu maitao, shetu maitaoye touso soupeio.

¹⁵Daiolouzü maikhe maitao hai khoche mü hinou, voulouthou hinou, ae soureih shishoyu hinou tuvewe.

¹⁶Süthaisü MAPAO nou ahi paoe, “Po ali lüvai hinou Kedar maivei kathe khesü akhai soua bailai.

¹⁷Soureih souyu hi voulou poveih shoyu Kedar maikhe sü daotu shopeia bailai. Daiolouzü Israel maivei Ramai MAPAO Enou paowure.”