Read Poumei Naga ISAIAH 24 Bible Online

ISAIAH 24 - Poumei Naga bible

ISAIAH 24

¹Chuo MAPAO nou deiphao hai souhawulai, ae haihai panou sakhai-a bubai laire. Puhnou deiphao sü podavou bailai, alia mai khesü panou raroupoa ta bailai.

²Mai hrülai sü raibütoua bailai, maisoua ae napao maitao, qila maitao ae paopu maitao-a, zhoyu mai ae hülouyu maitao-a, poupao peiyu maitao ae pou louyu maitao-a, toungiyu na-a alia touhayu maina-a raibüa bailai.

³Deiphao hai soushi souhawulai, daiolouzü MAPAO nou haibüa soulai tea chi paopawure.

⁴Deiphao sü thetare ae kitare; teideiphao teitei sü shitare alia kitare, raki-a deiphaoye sü koa shitare.

⁵Deiphao hi hrüa buyu maikhe mainou souzhaiwure, daiolouzü puletao nou chikha khesü pfüthore alia kharochi khesü züpei more, teisa donou vo soukhai touyu nasü soukho laiwure.

⁶Südonou Ramai nou deiphao sü chaa peiwure. Deiphao hi hrüa buyu maikhe maisü puletao vei mah vanou veahoyu sü ngaowe, südonou deiphao mai sü shoshonou hatare, mai daotu shopei-a baire.

⁷Zhaoh sü thetare, darkhabe sü kitare. Raichoki sava shoa buyu khesü chuo veahoyu ae leveayu nasü baire.

⁸Puletao nou asah soua poa lou souyu khubvü ae lanabvü kayu kho khesü choumo tare.

⁹Lou soupoa mailiro zhaoh sü sopu more, veishoyu zhaoh khesü zhaoh somaiye donou khatao-a baire.

¹⁰Nuhdu teitei sü bürarou loure, ae ki khesü khu-a mai lia kikha hi loulou hore

¹¹Maikhe maisü zhaoh hayu donou kijü kinou shusoua sha-a laire, savayu sü deiphao hinou hatare.

¹²Nuhdu khesü soushi khaiwure, alia robomü sü pepo takhaire.

¹³Haibüyu hai deiphao hi buyu tyahrü hrülai hisü vepakhai toulai. Süsü kabülai toulouzü oliv süübe vanou rashithou haikhai toulouyu büa ae darkhabe hinou rashithou haikhai toulouyu büa bailai.

¹⁴Thaimoa nou shokhai touyu maitao nou sashoa nou lou soulai. Teinghi loulova hrüyu maitao nou MAPAO ye daizhou due tea paosholai,

¹⁵alia teinghi palova buyu maitao-a puhye paosholai, ae zai pehao hinou hrüyu maitao nou Israel maivei Ramai MAPAO zhih sü paosholai.

¹⁶Deiphao kainghou hinou hrüyu mainou checheyu tyahrü, Israel maiye lou soushoyu paisü choulai. Ana Enou paoe, Eye donou savayu ae areih sü halia hare! Ewo shilailai ta-a baire, E hai daizhou koute avea sü dusa! Daiolouzü maikhe mai hai do ashi vah soua paochi zübare, puletao hai shipukhai shipukhai ta-a baire.

¹⁷Deiphao mai hrülai hisü pirayu, kaobvü hekhai touyu alia rüh soukhai touyu khaikho baire.

¹⁸Maiye pirayu kho chouloua tutayu maikhe sü kaobvü hi deloua bailai, alia kaobvü hinou tupa louyu maisü shorüh hinou muloua bailai. Raki vanou teirü sü ngaopisoua nou rükoulai ae deiphao vei beikhei sü pepotalai.

¹⁹Deiphao sü peposasa ta-a bailai.

²⁰Deiphao hai zhaoh sozhiyu mai ali büa bure, ae repao ali teikhai ashi nou hüpoa tayu büa hüpota bailai. Deiphao maivei mah hai sühleyu donou deiphao sü pfülouhoa kaodu ta bailai, alia kushupu loulai moe.

²¹Süzhou teithe veyu phaki MAPAO nou khouko pfüshoa buyu adusho maitao alia veo maitao sü tudei peilai.

²²Ramai nou puletaoye sü hukhamai büa raobvü ali hi thou bekhailai, teithe taoli thainou puletaoye sü tudeilai.

²³Süthaisü khouh nou zhita bailai, ae teinghi-a vamo ta-a bailai, daiolouzü Khoukhoulai MAPAO nou Jerusalem hi buyu Zion deichi vanou veo soua puhnou khosa-a hrülai, alia maikhe mainou puhvei khouko ava sü ngaolai.