Read Poumei Naga ISAIAH 26 Bible Online

ISAIAH 26 - Poumei Naga bible

ISAIAH 26

¹Judah teidei hi haibüa lou soure teithe sü velaire: Etao vei nuhdu hai khouko bue! Ramai vuzünou kivo soukhai touyu büa kho peilai.

²Robomü sü houpeio sübüa chilee cheche-a buyu tyahrü nasü panou loulo, kaozü soua buyu tyahrü nasü pa loulo.

³Neye tsüle ae hrümai nou peiyu mai hisü nenou kaonayu sü peie, kaonayu sü daivanou ngaoloue toulouzü puletao nou neye loucheyu donoue.

⁴Teisa MAPAO Ramai ye louchelo, sükoulouzü teisa nou puhnou Etaoye vupeilai.

⁵Khaophu souyu maiye sü puhnou souna taikou khaipeiwe, duso shoa buyu nuhdu khesü puhnou souha peiwe, ae puhnou nuhdu vei kivo khesü deiphi hi soupepokou khaipeiwe.

⁶Touha sohayu mainou ae veaholai mainou chuo süsü puletao phi nou taideipoa tayu sü soure.

⁷MAPAOwo nenou mai aveih maivei ludu sü souveih peie, ae acheche maivei ludu sü souchi peiwe.

⁸Oh MAPAOwo, Etao nou nevei leli hisü talai, ae Etao vei areih sü nebaie, nevei zhih aveih sü Etao nou jüpa kayu nasüe.

⁹Khei teile hi avei tsüle teitei nou neye thainüwe, avei hrümai teitei nou neye phouwe. Nenou deiphao maiye chikuyu phaki deiphao hi hrüa buyu mainou acheche nasü süloulai.

¹⁰Nenou mai ashimaiye zhuvea peiyuma puletao nou kaozü nasü doulou chamoe. Acheche maivei teidei hi-a puletao nou vah ashi sü soua bubaiwe, ae nevei aduso nasü tsükhou peibae.

¹¹Neye ngaobayu maitao hai nenou puletaoye tudei peilai touyu sü sümoe. MAPAOwo, puletaoye sü ahrao soupeio, alia nenou tudeilai tea souda-a buyu veahoyu nasü panou puletao hi vetheo. Ana nenou nevei maitaoye daizhou koute leshi peiwe touyu nasü panou puletao-a ngaolo.

¹²Oh MAPAOwo nenou Etaoye savayu sü peie, Etao nou soupfü louyu teitei sü nenou soukha peiyu donou baie.

¹³Oh Etao Ramai MAPAOwo, paopu kukhe maitao nou Etaoye khasa-a hrüwe, ana Etao MAPAO hai ne likhei baie.

¹⁴Chuo puletao hai thaitare, puletao hai hri dakhaipu laimore, puletao vei rako sü kushupulai more, daiolouzü nenou puletaoye sü tudei peiwure alia souhare. Puletaoye sü mai lia lichopu khailai more.

¹⁵Oh MAPAOwo, nenou Etao vei tyahrü sü souduso peie, nenou Etao vei deirai sü kainghou adai teitei hinou soukapa peie, südonou neye sü khuhaowe.

¹⁶Nevei maitaoye nenou tudei peiyu phaki, veahoyu donou puletao nou neye phouve-e, ae puletao nou ne hisü veachi paoe.

¹⁷Naotumai ali nou nalaiyu phaki khya soua krayu büa Oh MAPAOwo, Etao nou ne nghoujü nou kra-e.

¹⁸Ehnou khya soue, ana halia nalou moe, Ehnou deiphao hinou ngalouyu sü ali-a ha-e, ae deiphao hi hrüloure donou-a haliro soulou moe.

¹⁹Thaitayu nevei maikhesü hrishupu loulai, deiphao hinou züzhi-a buyu maitao, kushulo alia savayu lou sü soukhaio. Daiolouzü vidzü nou kou dei theyu hi shopeiyu büa MAPAO nou raichoki nou thaitayu maikhe sü soukaishu peilai.

²⁰Avei maitaore, neletao kikhahi lou kikhu sü khuloua bulo, Ramai vei lekha rarou sü khaitamo koute phateile daotu kikha nou tutsüa buwo.

²¹Deiphao mainou mahmo souyu donou puletaoye takou tudeire donou MAPAO sü rakiva puh buh sü thao-a tapare. Deiphao hinou maiye southayu maisü pongao peilai, ae southa khaitouyu maikhesü dei nou pokupu lou laimoe.