Read Poumei Naga ISAIAH 30 Bible Online

ISAIAH 30 - Poumei Naga bible

ISAIAH 30

¹MAPAO nou paoe, “Paochi chouba-a khaitya laimai sü daizhou koute vealaisa! Puletao hai Enou aetimoyu vah haso nou soua baie, ae mah souyu pei hinou puletao sü mah soupu thoukhai khai-a bubaire.

²Puletao hai ahi noumoa Ejipt hi takou Pharoah veo hinou soukha peio tea khowe ae puletaoye vupeio tea khowe.

³Ana Pharoah veo sü neletaoye soukha loure khouko hazhie-a bailai, ae Ejipt mainou neletaoye sü vupei louhoa neletao hai haongu ngao-a bailai.

⁴Puletao vei süh-seitamaitao hai Ejipt maivei Zoan ae Hanes nuhdu hi velou buyuma,

⁵puletao mai hrülai sü dopfüa bailai, daiolouzü puletaoye donou viyu ae soukha lousü halia hayu tyahrü ali hi puletao vei louche buyu donou hraongu ngao-a bailai.”

⁶Ramai vei chipao, Negeb hinou hrüyu soukhaonatao donou haibüa chi paoyu ali bue: “Süh-seita maitao hai veasho-a nou tateisho-a buyu, khao-nghou nou phoutao-a buyu teidei sü puletao vei na muh teiyu taoli hai panou racho ae rheisüh nou pfüa poho puletaoye donou halia soukha peilou hoyu tyahrü nasü peie.

⁷Daiolouzü Ejipt mainou puletaoye soukha peiyu haisü hamako baie, ae muh-a hae, südonou Enou honapaiye sü ‘Maiye zhilai moyu khaonghou (Rahab),’ tea zhih sapeie.”

⁸Maikhe mainou kabüa hrüa bue touyu khesü larübvü ali hi rükhailo, sübüa puletao hai daizhou koute shisa touyu sü panou teisa bure donou khailo, tea Ramai nou ahi paoe.

⁹Daiolouzü puletao hai teisa nou khaitya-a Ramai ye du-a laibaie, teisa nou dahrührüa MAPAO vei doupeiyu khesü keiba-a baiwe.

¹⁰Puletao nou rachipaola-apei maitao hi paoe, “Etao hi kaozüyu ae dai-e souzüe touyu khesü paoso, Etao nou keinüyu chipao nou pao-a baio, cheche moyu tyanou Etao hi pao-a baio.

¹¹Etao ludu sü nusho, ludu vapeio, Etao nou Israel maivei Sheeyu Ramai vei chipao sü keinü moe.”

¹²Südonou Israel maivei Mashio nou haibüa paoe, “Neletao hai Enou paoyu avei chipao sü ngaophou more alia taidayu ae lali dayu nasünou louche-a bure.

¹³Südonou mahmo nasü neletao pei hi velai, neletao hai pekoroa buyu kivo büa sükhai moa buyu hinou pepota-a bailai.

¹⁴Neletao hai nailee deipesa khaitoua petao sü poa meithou vüthou loushiyu moyuma dzüa saolou shiyu büa bailai.”

¹⁵Khoukhoulai MAPAO, Israel maivei Mashio nou maikhe mai hi paoe, “Neletao ahi dakhai velo ae Eye louchelo, sübülouzü neletao hai pfüchi bulai ae kaozhou vei-a bailai.” Ana neletao nou süsü soubare.

¹⁶Süna thaosü neletao hai ngaobamai nghoujü nou tutare donou choda-a baire. Neletao hai tavei shoyu rhei pfüloua tutalou süe tea tutalai, ana neletaoye thaihu tayu maitao vei rhei-a taveipu laihie!

¹⁷Ngaobamai vei reihmai ali neletao nou ngaoyu phaki neletao hai mai theli tuta-a bailai, ae mai angou nou neletao mai hrülaiye sü hulaikhai-a sahra ali deichi matao vahi sheesoua hrakhai touyu büa thaowua tutakhai bailai.

¹⁸Anou chukoute-a MAPAO sü neletaoye zhuvea peilai tea kho-a bue, puhnou neletaoye khuleshi peilai tea bue. Daiolouzü MAPAO hai kaozü ae macha soupeio Ramai-e, MAPAO ye loucheyu ae puh vuh kholouyu maikhe sü shiha ngaolouyu mai soulai.

¹⁹Oh Jerusalem hinou hrüa buyu maitaore, neletao krayu paisü chouloua zhuvea peilai, ae neletao vei akho sü noupeilai.

²⁰MAPAO nou neletaoye panou veahoyu ae tateiyu ve doa-a buyuma, puhnou chuo neletaoye dou-apeio nasü soua koa bupeilai, neletao nou puhye sü phoutapu khailai more.

²¹Neletao nou tamah poa zhaolova moa nalova vetayu phaki, neletao vei thailo vanou pai ali nou “Ludu haihi bue, haihinou lou taloua baio” tea paopei-a bailai.

²²Süthaisü neletao nou shahu ae sana nou poa soukhai touyu bashara khesü sheemoyu na ali büa shilai bailai, alia neletao nou sütao hisü “Anghingao hinou talo” tea paolai.

²³Neletao nou taimou thouyu phaki, MAPAO nou teirü sü seive peilai, sübüa panou veihshoa chachi loulai, alia neletao vei kikhaorü khesü panou veishoa poudai sü toulai.

²⁴Alia neletao nou sa-a tatayu chode ae rheisüh khesü panou veikayu poudai sü toulai.

²⁵Neletaoye ngaobayu maitao vei reihbu khesü soupepo-a puletaoye nüloua southa cheyu teithe sü deichi ae deitao teitei hi buyu reitoutao hinou dzü kükoulai.

²⁶MAPAO nou puhvei maitaoye souveaho peiyu hinou zhilouyu zhimü khesü, puhnou souveih peiyu teithe zhousü khouh hai teinghi büa valai, ae teinghi va hai chujünou vu anai vapulai, teithe anai vakouyu büa va veih sholai.

²⁷MAPAO vei khouko ae aduso hai kadouyu hinou-a ngaolou süe. Mei ae meikhao sünou puhvei lekha rarou sü ngaoe. Puhnou rapayu chipao hai mei büa taowe.

²⁸Puhnou ssü haiyu hai, teikhai teirü ashi veyu phaki ha teitei soushi peiyu büa tyahrütaoye soushi peiwe, alia tsüdo ashi choda khaiyu veishi souhakhai peiwe.

²⁹Ana Ramai vei maitao, neletao louzü sheeyu khonüh nüyu phaki lou soua buyu büa lou soulai, alia mai ali shapoulei nghouyu kho chouloua sasho poa Israel maivei chuhdu, MAPAO vei Rathoki hi veyu büa asa sholai.

³⁰MAPAO nou mai hrülaiye sü panou tsükhou züyu puhvei pai sü choulai, alia khouko bushoyu puhvei lekha, mei taoyu meikei, teikhai teirü ashi, ae reithou kouyu sü panou ngaolai.

³¹MAPAO vei paikho choulouyu phaki, ae puhvei khouko bushoa tudeiyu hai Assaria mainou ngaolouyu phaki, puletao hai ngaopi sholai.

³²MAPAO nou neletaoye dayu hai poa lou souyu khubvü ae gaigou dayu kho bülai. MAPAO masha nou Assaria maiye dulai.

³³Asaria maivei vedei pothou mei deire donou buh ali daoh raichoki nou souda khaitoure. Buh sünasü thou-a thoushoe ae du-a dushoa soukhaitoue, alia meideire süü hai-a alao soudawure. MAPAO nou ssü haiyu meikei nou kou sünasü taoloulai.