Read Poumei Naga ISAIAH 33 Bible Online

ISAIAH 33 - Poumei Naga bible

ISAIAH 33

¹Oh maiye soushi souha apeio, newo lahye soushi souha loumoe; Oh maiye shodo ashi sou apeio, louchelou ashio, neletao hai daizhou koute vealaisa! Nenou maiye soushi souha moa soyu phaki, neletaoye sü soushi souha-a bailai, neletao hisü shodo ashi soupeilai.

²Oh MAPAO, Etaoye zhuvea peio, Etao vei areih sü ne baie. Teithetsü Etaoye vupeio, ae veahoyu teile veyu phaki Etaoye khailupa peio.

³Nenou Etaoye donou reih soupeiyu phaki, reih vei paikho sü choulou khaie, maikhe mai hai tuta-a baiwe; nevei khouko aduso nghojü hi tyahrü khesü porarou tabaiwe.

⁴Soushi khaitouyu puletao vei na khesü khaongaoshuru nou vejüyu büa pojü khailoue, ae puletao hai khazü nou chotayu büa mainou potalai.

⁵MAPAO hai daizhou koute dusa! Puhnou ha veishi hinou khasa-a bue. Puhnou Jerusalem sü kaozü ae acheche nasü peilai.

⁶Neletao vei hümai teitei hisü puhnou kaozhou aveih, khailu peiyu ae tsü süyu sü soupeilai. MAPAO ye piyu ae puhye tsükhouyu sünou Zion vei dukayu kini soulai.

⁷Kei khaio! Khuvei mainou soukha peio tea shusoua sha-a bure; kaonayu pove peilai tea vah souyu maikhe sü kradu kra-a bure.

⁸Duva khesü mai lia tamore, vo soukhai touyu sü pfüthowure, ae-ao soua chaachou soukhai touyu khesü ngaophou more, maiye tsükhouyu sü hatare.

⁹Teidei sü kra-a dopfüa bure. Veisho-a buyu Lebanon vaobvü sü kitare, Sharon deikho aveih nasü radeiki büre, alia Bashan ae Karmel Deichi sü puletao vei süünghou raitare.

¹⁰MAPAO nou tyahrütao hi paoe, “Chuo E kushuloua vah souta laire, alia E hai daizhou koute khouko bue touyu sü soungaolai.

¹¹Neletao nou tsüchodayu ae souyu vah veishi sü hamako baie. Enou ssü haiyu hai mei büa neletaoye sü deihawulai.

¹²Maikhe maiye sü naika deiyu büa ae shuhbe jüloua mei deilaiyu büa soupeilai.

¹³Buh dousho-a hrüyu maitao pa Enou souyu vah khesü keilo, ae buh nghia buyu maitaoye sü panou avei khouko sü sülo.”

¹⁴Zion hinou mahmo soua buyu maikhe sü ngaopire ae Ramai ye louche moyu maikhe sü ngure. Puletao nou haibüa paoe, “Etao hrohi thao mainou mei tao-a buyu buh hi bulou süe? Etao hrohi thaonou teisa mei tao-a buyu mei hisü bulou süe?”

¹⁵Mai taralia acheche hinou hrüyu mai, kaozü hinou paopeiyu mai, veahoyu maiye souchoro moyu mai, seihla pomoyu mai, hashi souyu hi koa tsü chozho moyu mai ae ashi vahtao zhumoyu maitao hai hriloulai.

¹⁶Sübüyu maitao sü kaozhou veia hrülai, alia puletao vei baibu sü chuhdu sünou veihshoa soupeilai; ae puletao vei touso sü ngaotou ngaoso vuzüloulai.

¹⁷Neletao nou veih shoyu veo mai ali vedei dusho-a nou khosa-a hrüyu sü ngaolai.

¹⁸Raichoki neletao hai vakou mainou ve kikha khayu ae reikeih pomaiye ngaopi-a buyu khesü konüa licho-a bailai.

¹⁹Neletao nou sülou hoyu la nou rao-a khaophu souyu vakou maiye ngaopu laimoe.

²⁰Etao nou sava-a khonüh nüyu Zion nuhdu nasü zhukhaio! Jerusalem nuhdu sü zhukhaio! Sü hisü kaonaphi tea nou ae zhoukao vei-a hrüloure buh-e! Sünasü kaodu lou hoyu sahpao ali bülai, veakha khaitouyu süütao hai paizhou paloulai moe, moa sünavei rai phukhai touyu khesü detalai moe.

²¹Ana sühisü MAPAO nou puhvei khouko ava sü Etaoye ngaopeilai. Etao nou reitou ae rei adu vei pehao hinou hrüa bulai, ana Etaoye ngaobayu maivei dzüluki khesü velou laimoe.

²²Daiolouzü MAPAO nou Etao pei hi chiku-apeio, ae kho-apeio sü soulai. MAPAO nou Etao vei veo soulai, ae puhnou Etaoye khailu peilai.

²³Dzülukitao vei peitaoh hi khikhai touyu rai teitei sü pheitare, ae dzüluki hüpoa tayu sah khesü hapalou more. Etao nou ngaobamai vei kini teitei shaolou zhiloulai, alia phi chayu mai koute-a shaolouyu natao sü puletao vei zha-a ngaoloulai.

²⁴Etao teidei hinou hrüyu mai ali koute-a sounouyu sü bupulai moe, alia mai hrülai vei mahmo khesü khaipeiwulai.