Read Poumei Naga ISAIAH 36 Bible Online

ISAIAH 36 - Poumei Naga bible

ISAIAH 36

¹Veo Hezekiah nou vekou louyu po kiadai kou sü Assaria hi veo Senakherib nou Judah nuhdu taoli soureih soulou poloure.

²Süthaisü Assaria hi veo nou Lakhish hinou reihmai peikhowo Rabshakeh ye reihmai me aduli noupu koa Jerusalem hi veo Hazekiah hisü seita-e. Puletao nou reilo dzükhao dzü poa ratayu buh ae sabanü saoyu mai douhi tayu ludu pe hinou buloure.

³Veo vei fühao hi peikhowo Hilkiah nahpoutu Eliakim, rü-apeio maitao peichana Shebna ae larü rü-apeio Asaph nahpoutu Joah puletao nou taho puhye sü daoe.

⁴Rabshakeh nou puletao hi paoe, “Assaria veo nou Hezekiah hi haibüa paoe tea nou paopeio. Ne daivanou haizhou koute le dua bue?

⁵Chipao likhei sünou soureih souyu hisü dokai ae pfüchi baivu? Ne thaoye louche-a apei hi reih soulai touwe?

⁶Zhukhaio, nenou Ejipt ye sü louchewe, ana süsü shuh pfüyu süü ali nou poa süüpo souyu raibüa bailai, mai taralia sünasü poa süüpo souyu mai bah sü khrüpeia bailai. Pharaoh veoye loucheyu maisü sübüa bailai.”

⁷Assaria maivei reihmai peikhowo nou paopu peie, “Neletao nou ahi haibüa paolaiwu: Etao nou Ramai MAPAO ye sü louchewe, veo Hezekiah nou rathobu ae posheelabu khesü souhawua Judah ae Jerusalem mai hi haibüa paomovu: ‘Neletao nou posheelabu haina likhei hinou ratho-a bailai.’

⁸Chuo takou apaopu Assaria veo sü reih souo; neletao nou rhei pfülou süyu mai bulouzü Enou neletaoye rhei thehai peilai.

⁹Neletao hai Ejipt hinou rheiluki ae rhei pfüyu maiye lüa bulukhu kabüa avei paopu kilai maitao hrohinou taikayu reihmai peikhowo ali koute-a dulou khailai?

¹⁰Süpei nou Etao nou teidei hai hi velou soushire hai MAPAO loumoe tea nou chovu? MAPAO nou ahi paoe, ‘Tave teidei hai nasü soushi laiwo’ touwe.”

¹¹Süthaisü Eliakim, Shebna ae Joah nou Rabshakeh hi paoe, “Zhuvea nou ne kilai Etao hi Aramaik la nou paopei baio, daiolouzü Etao nou süsü süwe. Etao hi Hebrew mai la paopeiso, kivo phao buyu maitao haia süsü chouwe.”

¹²Rabshakeh nou chila peie, “Chipao haitao sü avei paopu nou neletao veo ae neletao hi likhei pao-a baio tea Eye seive baivu? Moe, chipao hai khesü kivo vanou keia buyu maitao, neletaoye koa lah vei ba toure ae la vei züdzü kere maitao hrülai donoue.”

¹³Süthaisü Rabshakeh nou lashuloua Hebrew mai la hinou shusoua haibüa paoe, “Assaria hi veo vei chipao khesü keilo!

¹⁴Veo nou haibüa paowe, Hezekiah panou neletaoye souvo sho, daiolouzü puhnou neletaoye khailupa peilou hoe.

¹⁵Hezekiah panou neletaoye haibüa jülouso! MAPAO ye louchelo, puhnou neletaoye khailu peilou süe, nuhdu khesü Assaria mai bah hi thoupeilai moe.

¹⁶Hezekiah vei chi sü keiso daiolouzü Assaria hi veo nou haibüa paoe, ‘Neletao nou Eye chavei lathaolo, ae ahi tapalo, sükulouzü neletao mai hrülai panou lahkuku vei darkhabe ae doushibe vanou rashithou sü haitoulai, alia neletaoye panou lahkuku vei dzükhao hisü nou dzü potoulai.

¹⁷Enou velou neletao vei teidei büa veiyu thoudzü, darkha dzü ae raokhao alia darkha kipei buyu teidei hi save loumo koute panou sübüa hrülai.

¹⁸MAPAO nou Etaoye khailupa peilou süe tea Hezekiah panou neletaoye süthai mahso, tyahrü kukhe maitao vei rah ali nou-a Assaria veo vei bah hinou vupa peiyu buvu?

¹⁹Hamath ae Arpad rah sü daiki bue? Sepharvaim rah sü daiki nou bue? Puletao nou Samaria sü abah hinou khailupa peiwu?

²⁰Nuh teidei tao vei rahtao nou thaovei nuh teidei sü abah hinou khailupa peie? Neletao daisounou Jerusalem sü MAPAO nou abah hinou khailupa peilai tea tsüchowe?’ ”

²¹Ana puletao mai ali noua puhye sü chila pei moe, daiolouzü veo Hezekiah nou puletao hi haibüa kharochi peiwure, “Puhye chila ali-a peiso.”

²²Süthaisü Eliakim, Shebna ae Joah puletao nou dopfüa puletao vei sabanü khesü paiphawure alia taho veo Hezekiah hisü Rabshakeh nou paoyu chipao khesü paopeie.