Read Poumei Naga ISAIAH 37 Bible Online

ISAIAH 37 - Poumei Naga bible

ISAIAH 37

¹Hezekiah veo nou ko sü choulou khaie, levea loua puhvei sabanü khesü paiphawure, ae ngulousah baloua MAPAO vei Rathoki hisü tare.

²Puhnou veo vei fühao hi peikhowo Eliakim, rü-apeio maitao hi peikhowo Shebna alia tsüsoua buyu napao maitaoye sü panou soukousah banouloua Amoz nahpoutu rachipaolawo Isaiah hisü seive-e.

³Puletao nou puh hisü paoe, “Veo Hezekiah nou haibüa paowe, ‘Zhou teithe hai veahoyu, mainou züpeiyu ae hraongu soupeiyu teithere, nah nare teile hi pfüchi hayu donou nakoulou hoyu büre.

⁴Assaria veo nou seive-a buyu Rabshakeh nou hria buyu Ramai MAPAO ye konüa paoyu chipao khesü nevei Ramai MAPAO ye panou choulouyu sü soulo, ae nevei Ramai MAPAO nou choulouyu chipao vanou puletaoye sü tudei peiyu sü soushulai. Südonou shokhaitoua buyu etao maitaoye donou veachi paopeio.’ ”

⁵Hezekiah veo vei kilai maitao nou ve Isaiah hi chipao haitao paopeiyu phaki,

⁶Isaiah nou puletao hi haibüa chila peie, “Neletao vei paopu hisü paopeio, MAPAO nou haibüa paowe: Assaria veo vei kilai nanou Eye paoshia neletaoye paopiyu chi khesü chouloua ngaopiso.

⁷E vuzünou puh hisü rako ali thoupeilai, sübüa puhye panou dayu ko ali chouloua lahvei ki hisü dakhai talai, ae Enou puhye sü panou lahvei khoche vanou thailai.”

⁸Süthaisü Rabshakeh hai dakhai tare, ae Assaria hi veo sü Libnah maiye soureih soua bushe touyu ko süloure, alia veo sü Lakhish nuhdu nasü thaokhaiwua tare touyu chouloure.

⁹Chuo Assaria veo nou Ethopia (Sudan) hi veo Tirhakah nou puh pei hi reih soulai tea tare touyu ko süloure. Puhnou ko hainasü choulou khaie, Judah hi veo Hezekiah hisü haibüa seiko sü seive-e:

¹⁰“Nenou louche-a buyu Ramai nou neye panou Jerusalem hai Assaria veo bah hi thoupeilai moe tea paoyu donou pa neye lawuso.

¹¹Nenou süwe, süolouzü Assaria veo nou soushi souhawulai touyu tyadei teitei sü souha khailoua baiwe. Ne abah hinou tupa lousüe tea tsüchovu?

¹²Avei puopao mainou souha peikhai touyu Gozan, Havan, Rezeph ae Telassar hinou hrüyu Betheden maitaoye puletao vei Ramai nou khailupa peivu?

¹³Hamath, Arpad, Sepharvaim, Hena, ae Ivvah nuhdutao vei veo maitao sü daiki vetare?”

¹⁴Hezekiah nou seiko nasü kopomai na bah hinou poloua phouloure, süthaisü puhnou seiko nasü poloua Rathoki hi pove MAPAO vei nghoujü hi khailoua

¹⁵haibüa veachi paoe,

¹⁶“Khoukhoulai Israel maivei Ramai MAPAOwo, shouh pfüa buyu khaona cherubim peivanou vebuh abuo, ne likhei Ramai sü baie, ne likhei deiphao veo mai hrülai pei hi veo baie. Nenou raki ae deiphao sü soupeie.

¹⁷Oh MAPAO, ne noubei sü pfüa keipeio ae ne nghithou hepa zhupeio. Hria buyu Ramai, neye ngaophou moa nou Senakherib nou paoyu chipao khesü keipei khaio.

¹⁸Oh MAPAO, Assaria veo nou tyahrü taoli souhawure ae puletao vei teidei sü soushiwure touyu sü cheche-e,

¹⁹alia puhnou puletao vei rah khesü meidei laiwure, daiolouzü puletao sü Ramai moe, ana bah nou soukhai touyu süü-chuh baie, südonou puletaoye sü souhawure.

²⁰Südonou chuo, Oh MAPAO, Eletao Ramai, puh bah hinou Etaoye khailupa peio, sükulouzü deiphao hi buyu tyahrü hrülai nou ne likhei Ramai sü baie touyu süloulai.”

²¹Süthaisü Amoz nahpoutu Isaiah nou veo Hezekiah hi Israel maivei Ramai MAPAO nou haibüa paoe: “Nenou Assaria hi veo Senakherib donou veachi paoyu sü,

²²MAPAO nou puh vanou haibüa paoe, ‘Jerusalem nuhdu hinou hrüa buyu maitao nou neye sü ngaora-a kronüa bure.

²³Nenou ngaophou moa jünüyu sü thaowe? Nenou paoshiyu nasü thaoge? Nenou ngaophou moyu nasü Israel maivei Sheeyu Ramai-e.

²⁴Nevei kilai maiye panou ve MAPAO ye sü konüre,’ alia haibüa nenou paore, ‘Avei rheiluki khesü pfüloua Enou deichi kuyu hisü paloue, Lebanon deichi kukayu hi koute-a taopa loure; Enou sedar süübe kukayu ae haosüübe veikayu khesü viloue, alia vaobvü touchü hi koute-a talou loure.

²⁵Enou vakou maivei teidei hia dzükhao heloua dzü sü ke-e, ae Ejipt teidei hi buyu reidzütao sü avei reihmaitao nou taithe peie.’

²⁶“Haitao teitei sü Enou daoh nou choda khaiwure touyu sü ne sümovu? Enou raichoki nou tsü chodayu khesü chuo panou vepawe. Enou neye panou veisho-a soukhai touyu nuhdu khesü soushi loure khouko peia baie.

²⁷Nuhdu sütao hinou hrüa buyu maikhe sü khouko ha-e, chathai tare ae hraore. Puletao hai dou hi buyu poudai büa baie, alia hiphao vanou poube tsüpa-a buyu khesü dupalou moa bukinou teinghi nou phuthayu büa baie.

²⁸“Nenou kushuyu ae kou buyu, nenou palouyu teitei, alia nenou apei hi rarouyu sü Enou süwe.

²⁹Nenou Eye paoshiyu ae nenou khaophu souyu sü anou hi chouve loure, südonou Enou ne nghou sü vouwulai alia ne mü sü phuloua nenou veyu ludu hisünou neye panou dakhai talai.”

³⁰Süthaisü Isaiah nou veo Hezekiah hi paoe, “Neye donou shee sü haibüa soupeilai; khai ae daoko po hiolouzü lanou paopayu shinamara nou toua bailai, ana thaikou louzü neletao hai taimou thouloua chachi loulai, ae darkhabe sholoua rashithou haitoulai.

³¹Judah teidei hi thaimoa shokhai toua buyu maitao sü beima veishoa dei hi tsülouloua rashithou alao shipeiyu süübe büa bulai.

³²Jerusalem ae Zion Deichi vanou shokhai touyu maitao sü vakou tapalai, daiolouzü Khoukhoulai MAPAO nou haibüa panou vepare donou soudawure.

³³“MAPAO nou Assaria veo donou haibüa paoe: Puhnou nuhdu levai sü talou laimoe, voulouthou ali koute-a kathou laimoe, moa nuhdu nghiki sü reihmai ali koute-a rü pfüa takou laimoe, moa soureih soure donou sahpao ali koute-a soukhai laimoe.

³⁴Puhnou veyu ludu na hinou puh sü dakhai ta-a bailai, nuhdu levai sü talou laimoe, süsü MAPAO Enou paoe.

³⁵Daisounou toulouzü avei kathe donou ae Enou avei kilai David hi chaachou souyu donou nuhdu hainasü Enou vupeilai alia khopeilai.”

³⁶MAPAO vei rakivamai nou takou Assaria mainou fühao soua buyu hisünou reihmai 185, 000 southawure. Thainesho shona sü buh sühisü thaiphao khaikho baire.

³⁷Süthaisü Assaria veo Senakherib vei kilai nasü dakhai ve Nineveh hisü chaore.

³⁸Teithe ali puhnou puh rah Nisrokh ye rathoki hinou ratho-a buyu phaki, puh nahpoutu ahai, Adrammelekh ae Sharezer nou puhye sü khoche nou daothawure, ae puhai sü Ararat teidei hi tuve tare. Puh nahpoutu Esarhaddom nou puh thaosü veo kouloure.