Read Poumei Naga ISAIAH 41 Bible Online

ISAIAH 41 - Poumei Naga bible

ISAIAH 41

¹Ramai nou paoe, “Zaipe hinou hrüa buyu maitao, neletao nasei tea nou bulo ae Enou paoyu pai sü keilo! Maikhe maiye panou puletao vei pfüchi sü soukhoupulo; puletaoye sü panou tave chi paolai; chikuyu buh hinou ve daolai khe.

²“Thaonou teinghi palova nou reih veilouyu naye süve peie, ae puhye panou tayu buh liki sü reih veiloue? Thaonou puhye veo maitao ae tyahrütao jünou veilouyu sü peie? Puhnou puletaoye sü naihü büa puhvei khoche nou daode peie, ae puhvei voulouthou nou puletaoye sü rouvao büa soupo rarou peie.

³Puhnou puletaoye sü thaihu tae, ae kaozhou shi daomoa hulailoue, puhnou taveiyu hai puh phi kou dei taiyu zhingao moe.

⁴Thaonou haibüa vepayu khesü soupeie? Emai hrü arai nou chukoute haibüa hrükou louyu sü thao vanoue? MAPAO, Esü araikha hinou bue, alia akhai hi-a Enou bulai.

⁵“Teidei kadou kounou hrüa buyu maikhe sü Enou souyu vah haso khesü ngaoloure, puletao nou ngaoloua pishi-a nou nguhrührüa bure. Südonou puletao sü tave jüloua nou veloure.

⁶Puletao hai mai alinou aliye soukhare, ae alinou ali hi haibüa paoe, ‘Khuveilo!’

⁷Shara souyu mainou sana souyu maiye paoshowe, ae hubao poa bashara dachiyu nanou hu deikhayu na hisü ‘Hai hai deikha veishore’ tea paoe, ae bashara sü pa lümore donou hushu nou veakha peiwe.

⁸“Ana akilai maitao, Israel neye sü Enou dopa louyu maitao-e, ae asawo Abraham vei tyaosholea maitaoe.

⁹Enou neye sü deiphao kainghou hinou poloue, ae kadou shoyu teidei hinou kuloue, alia ne hi Enou paoe, ‘Ne hai avei kilai-e.’ Enou neye sü malai moe, ana neye doloue.

¹⁰Ngaopiso, daiolouzü Enou neletaoye sü salai peilai, hataralia panou neletaoye soupiso, daiolouzü Esü neletao vei Ramai-e. Enou neletaoye soukhou peilai, ae soukha peilai, Enou neletaoye vupeilai alia khailupa peilai.

¹¹“Ne pei soureih souyu mai hrülai sü hraoyu ngao-a bailai, neye ngaoba-a hraiyu mai sü hakata-a bailai.

¹²Neye ngaoba-a hraiyu maiye sü phoutalai, ana nenou puletaoye ngaoloulai moe. Ne pei hi soureih souyu maitao sü hazhotu lia moa nou hakata-a bailai.

¹³E hai neletao vei Ramai MAPAO nasüe, ‘Ngaopiso, Enou neletaoye soukha peilai.’ ”

¹⁴MAPAO nou paoe, “Shikhaotu büa lülohoa buyu Israel maitao, ngaopiso, Enou neletaoye soukha peilai. E hai neletaoye khailupa apeio, Israel maivei Sheeyu Ramai nasüe.

¹⁵Enou neletaoye sü huh pfüyu, hei veishoyu alia sheetou touyu dou poa thou dayu süü ali soupeilai. Neletao nou sübüa deichi sü daphe dapho loulai, ae deichi khesü thouba büa soulai loulai.

¹⁶Neletao nou puletaoye sü thou thaoyu büa thaolaiwulai, ae teikhai nou puletaoye sü hüpo talai, alia teikhai teirü ashi sünou puletaoye sü soupho rarou peiwulai. Süthaisü neletao nou asalai, daiolouzü E hai neletao vei Ramai donou, ae Israel maivei Sheeyu Ramai, Eye neletao nou paosholai.

¹⁷“Touha-soha laimai ae veahoyu mainou touso hayu phaki, ae houzüyu donou puletao vei mülee thekeikei-a buyu phaki, MAPAO, Enou puletao vei veachi sü keipeilai; Israel maivei Ramai Enou puletaoye sü thaowu laimoe.

¹⁸Enou kushoyu deichi vanou reidzü sü kükou peilai, ae deikho toutsü hinou pa dzüla palai; Enou vaohro hisü nou dzübvü hepeilai, alia radeiki hinou pa dzühou küpa peilai.

¹⁹Enou hiphao hisü panou vaosüü, haosüü, chesüü ae oliv süü khesü hrülai, alia radeiki sü panou vaobvü data-a haosü ae süübe aveih tyatyali panou paopalai.

²⁰Hai khesü Israel maivei sheeyu MAPAO, Enou soupeie touyu sü maikhe mainou ngaoloulai alia süloulai.”

²¹Israel maivei veo, MAPAO nou haibüa paoe, “Tyahrütao vei ratao, neletao vei chikure nasü popa khaio, neletao vei zü khesü daie bue, paokhaio.

²²Puletaoye panou bashara khesü pove-o, ae daie vepalai touyu sü Etao hi paopeio. Raichoki daidai vepare touyu khesü Etao hi paopeio, sübüa Etaoye panou süvanou tsücholoure donou, moa vepare khesü süloure donou paopeio.

²³Haithai daie vepalai touyu khesü paopeio, sütoulouzü Etao nou neletao hai ramaie-e touyu süloulai! Haveih moyuma ashi vah sü soungao peikhaio, sükoulouzü Etao nou ngaopia bulai.

²⁴Neletao sü hazholia moe, ae neletao vei vah haso sü haliro ha-e; neye thoyu mai sü ngaorayu mai baie.

²⁵“Enou teinghi palova buyu mai aliye dopa loure, Enou puhye saveloua panou teidei reilova nou hukoulai. Leekhao souyu mainou deinai deiyu büa puhye panou nuh teidei khasa-a hrüyu maitao sü deipeilai.

²⁶Etaoye panou süloure donou rai-a thaonou paopa peie? ‘Puhnou paoyu sü macha-e’ tea Etaoye panou paopeire donou thaonou rai-a vepare khesü paopeie? Mailia paopa peimoe, mai ali-a shangao moe, nenou paoyu chi sü mailia choumoe.

²⁷MAPAO, Enou ko nasü raikhai-a Zion hi paopa peie, ae Enou Jerusalem hisü kopomaiye seive ‘Nevei maitao sü velaire! Puletao hai ki hi velai tea laire’ teanou ko aveih nasü paopeie.

²⁸Enou rah khesü zhuyu phaki, rah khesü ali-a ngaomoe, puletao hai chipao ali koute-a paore ha-e; Enou chi nouyu phaki, chila ali-a pao moe.

²⁹Rah haitao teitei sü hamako baie, puletao nou halia soulou hoe, bashara haitao sü khouko lia ha-e.”