Read Poumei Naga ISAIAH 42 Bible Online

ISAIAH 42 - Poumei Naga bible

ISAIAH 42

¹MAPAO nou paoe, “Enou jüpa-a dolouyu avei kilai nasü hainare, Enou puhye sü soukhou peikhai toue, ae avei rako sü puh hi thoupei khaitoue. Puhnou tyahrü hrülai hi kaozü nasü soupeilai.

²Puh sü shusoua raolai moe, moa ludu kinou shura soua shalai moe.

³Khi-a buyu doube ali koute-a puhnou soucha laimoe, ae ngheinonoa buyu meivabvü ali koute-a puhnou sounghei laimoe. Kaozü nasü puhnou acheche hinou soupeilai.

⁴Puhnou deiphao hi kaozü nasü souche loumo koute, puh hi areih sü halai moe, moyuma chathai talai moe. Kadou sho-a buyu teidei khenou puh vu zhisho-a nou bure.”

⁵Raki soupeia paitopa khai-apeio, deiphao zhainga southou apeio ae sühinou buyu na veishi soupeipu, ae mai hrülaiye ssü nghouthou apeio, alia maikhe maiye rako soupeiyu Ramai MAPAO nou puhvei kilai nahisü paoe,

⁶“MAPAO, Enou neye acheche hinou kupa dopa loure, Enou neye sü süthaisa-a tapeilai. Ne vanou Enou mai hrülaiye sü koa vo ali soupeilai, alia tyahrü teitei hi Enou ava sü seive peilai.

⁷Nghichayu maiye sü nenou souvei peilai, hukhaki hi buyu maiye sü nenou popa peilai.

⁸“E likhei nevei Ramai MAPAO sü baie, Avei kathe sü ra kukhe liye zhipei lai moe; Eye koa nou bashara taoye paosho laimoe.

⁹Raichoki Enou vepalai tea paoyu khesü cheche-a vepare. Chuo Enou ne hi ashu nakhesü vepamo jünou rai-a ne hi paopeiwe.”

¹⁰MAPAO hi lou ashu ali soukhaio, deiphao hi hrüyu mai hrülai puhye paosholo! Zai hinou ta-a buyu ae sühinou hrüa buyu veishi puhye paosho khaio, zai pehao hinou buyu mai hrülai ae kadou kounou hrüyu mai hrülai puhye lou sousho khaio!

¹¹Radeiki hinou hrüyu nuhdu khesü panou Ramai ye paosholo! Kedar hinou buyu nuh khesü shusoua shakhaio! Sela nuhdu hinou hrüa buyu maikhe sü panou deichi peitaoh hi paloua asah soua lou sü soukhaio.

¹²Kadou kounou hrüa buyu mai hrülaiye panou MAPAO vei kathe sü paosholo.

¹³MAPAO nou khouko bushoyu mai ali büa tapa-e, soureih souveih shoyu mai ali büa puhnou lekha soua tapa-e, puhnou soureih soure donou tudaloua shusoua reihvo soue, ae puhye ngaobayu mai hi puhvei khouko sü soungao peie.

¹⁴Ramai nou paoe, “Teile taoli Enou ngasoua bure; Avei maitaoye chila ali-a peimoa ngasou bure. Chuo Enou soure vahtao sü naotumai ali nou nah nare phaki khyasoua rayu büa rapa laire.

¹⁵Enou puletao vei deichi ae deitao khesü soushi souhawulai, ae puletao vei süübe ae poudai khesü panou kita-a raitalai. Enou reidzü küa buyu deikho khesü radeiki hi soudathou peiwulai, ae dzü de-a buyu zaibvü khesü southe khaiwulai.

¹⁶“Nghicha-a buyu avei maitaoye sü puletao nou sümoyu ludu hinou Enou süthaisa-a tapeilai, puletao nghoujü hinou zhitei-a buyu nasü Enou ava hi soudapa peilai, thou-tao soua buyu dei khesü Enou souchi peilai. Haitao hai Enou soupeilai, ae Enou neletaoye sü thaokhaiwu laimoe.

¹⁷Basharaye loucheyu mai hrülai, ae zhurai soukhai touyu naye ramai-e tea buyu mai teitei sü Enou hraongu alaosou soupeilai.”

¹⁸MAPAO nou paoe, “Noubei peyu maitao, keilo! Nghichayu maitao, soutaosoua zhulo!

¹⁹Avei kilai maina moa nou thaonou nghichayu bue? Enou seitayu kopaomai moa nou thaonou noubei peyu bue?

²⁰Oh Israel, nenou ha alao ngaoloure, ana sütao hai neletao donou daitouwe? Chouloure donou neletao hai noubei pfüwe, ana neletao nou daie sülou keilouwe?”

²¹MAPAO hai maiye khaipei nüshoyu Ramaie-e, südonou puhnou puhvei chikhatao, ae dou-apei khesü puhvei maitaoye panou tsükhouyu nasü jüpawe.

²²Ana maikhe maivei nangi khesü soushi souhawure, puletao mai hrülaiye sü deibvü hi ae hukhaki hi thoube khaiwure. Puletaoye mailinoua khailupa peiloure hade, soushi-souha khaitouyu nakhesü mai linoua “Podakhailo” tea paopeire hare.

²³Neletao hrohi thaonou haisü keinou peilai, ae haithai vere teile taohi thaonou hai khesü lenoua keinou peilai?

²⁴Thaonou Israel maiye maivei shaotou shaosoyu mai bah hi thoupeie? Eletao nou mahmo souyu donou, puhnou jüpayu ludu hi talou moyu donou, paochi züba-a ae chikha khesü zülou moyu donou hainasü MAPAO nou baie.

²⁵Südonou puhnou Eletao pei hisü puhvei lekha rarou nasü mei souyu büa lakou peie, mei taoyu büa puhvei lekha sünou Israel mai hrülaiye deipeie, ana Eletao nou haisü daisousa touyu tsü sükulou moe, Eletao nou hai vanou halia doupu loumore.