Read Poumei Naga ISAIAH 44 Bible Online

ISAIAH 44 - Poumei Naga bible

ISAIAH 44

¹MAPAO nou paoe, “Chuo keilo khaio, Oh Israel maitao, avei kilai maitao, Enou dopa louyu maitao, Jakob vei tyaosholea maitao.

²Neletaoye sou-apeio, ae ne pfüpuo hinou neletaoye sou-apeio ae neletaoye soukha peiyu nasü MAPAO Enoue. Enou leshia-a dolouyu avei kilaiwo, ngaopiso!

³“Daiolouzü rei-a buyu deiphao hisü Enou dzü lazü peilai, ae dei theyu phao hisü pa reidzü kü peilai. Enou neletao vei nahmaitao hisü avei rako seikou peilai, ae neletao vei tyaosholea hisü Enou shiha peilai.

⁴Puletao hai dzü veishoyu buh hinou paopayu poudai büa paopalai, ae reipe hinou paopayu süübe bülai.

⁵“Mai alili nou haibüa paolai, ‘E hai MAPAO vei-e.’ Puletao hai Israel mai soure donou tave zholoulai. Mai hrülai sü puletao bah hi ‘MAPAO vei baie’ tea rüpfülai, ae Israel maivei zhih nou sapfülai.”

⁶MAPAO, Israel maivei Veo ae Khailupa-apeio, Khoukhoulai MAPAO Ramai nou haibüa paoe, “Enou arai nasüe ae akhai na-a E baie, E baimoa ramai kukhe ali-a ha-e.

⁷Thaonou Eye raiyu bue? Puletaoye panou paopa peikhaio, ae anghoujü nou paopei khaio. Thaonou rai-a vepare khesü paosü peilai touyu bue, alia haithai vepare khesü Etao hi pa paopei khaio.

⁸Ngaopiso, moa maiye piso, Enou vepare teitei sü raichoki nou neletao hisü paopei movu? Neletao hai avei shaki soure maitao-e! E baimoa rah kukhe-a bupu hivu? Rah kukhe bupu hie touyu halia E sümoe.”

⁹Bashara souyu maikhesü hamako baie, ae sükheye paosho-a asayu sü viyu ae koyu ali-a ha-e. Puletao nou tho-a buyu rah khesü nghicha-e alia halia sümoe, südonou puletao sü hraongu ngao-a bailai.

¹⁰Bashara moyuma hu nou zhurai souloua ramai-e tea thoyu sü vei moe.

¹¹Mai taralia bashara thoyu mai sü hrao ngaolai. Bashara sü mai nou soua baie. Puletao mai hrülaiye panou chikuyu hisü tave jülou khaio, puletaoye mai nou soumo soupeilai ae hraongu soupeilai.

¹²Hu kuyu mainou hai nasü mei deiloua hubao nou poa zhainga deithou loua baie. Puhnou haibüa vah souyu phaki, puhsü hou-züwe, ae veaho tawe.

¹³Shara souyu mainou süü sü douloua rüsüü (pencil) nou poa sha zü loue ae campas nou shee souloua dao nou chaloua hüveih shoyu mai zhurai ali sü daoloua ki hi khaire donou soukhaitoue.

¹⁴Puhnou vaosüü (sedar) moa haosüü moa phesüü ali vaohro hinou haina poa vah soure donou vi louwe. Moyuma puhnou vaosüübe ali sholoua teirükou shopeia panou vipayu sü khowe.

¹⁵Süthaisü mainou süübe sünasü dapolo hai poa meideiwe ae dalilo hai poa bashara souwe. Puhnou haina hai dalilo poa meidei vo-a raokhao khaotouwe, ae dapolo hai bashara souloua thowe.

¹⁶Süü dali pha hai meidei-e, mei hisünou sou rouloua touwe ae khyayu sü ngaoloue, puhnou mei vo-a “Daizhou koute lüveisa!” tea paowe.

¹⁷Süü buyu kukhe taosü puhnou bashara souloua süna phi hi nakou khurüa thowe. Puhnou süna hisü haibüa veachi paowe, “Ne hai avei ramaie, Eye khailupeio!”

¹⁸Haibüyu maitao hai voleyu donou puletao daie souwe touyu sü sülou more. Daiolouzü puletao vei nghithou sü souhore ae puletao vei tsüle sü soumewure. Südonou puletao nou ngaolou more ae puletao nou sükulou more.

¹⁹Bashara souyu mailia tsücholoua sükuloua haibüa paolou süyu mai hare, “Süü haitao hai Enou meidei-a sou routouwe, ae raokhao khaolouwe, alia dalilo hai Enou bashara souloua sünaye sü nakou khurüa thowe!”

²⁰Puhnou vounai touyu büa puhvei voyu tsü sünou puhye süthaimah peiwure, ae puh hai lah puhye khailupa louhore, moa puh bah zhoulo nou poa buyu bashara nasü dayu ramai baie touyu pao-a paopalou hore.

²¹MAPAO nou paoe, Oh Israel maitaore, hai hai licholo; neletao hai avei kilai-e touyu licholo. Enou neletaoye sü panou avei kilai soure donou soupei khaitoue-e, Enou neye sü ngaikhai toulai moe.

²²Enou neletao vei mah khesü teihao büa vailai peiwure, alia neletao vei mah sü vidzü büa phuthe peiwure. Ahi dakhai velo, daiolouzü Enou neletaoye sü khailupa peiwure.

²³Oh ratei, deiphao hinou thousho-a buyu buhtao, shusoua shakhaio! Oh deichitaore, shurasoua lou soukhaio, ae vaohro hinou buyu süübe veishi! Daiolouzü MAPAO nou puhvei aduso sü puhvei Israel maitaoye khailupa peiyu sünou soungao peiwure.

²⁴“Neletaoye pfüpou hinou sou-apeio MAPAO, neletaoye khailupa apeio nou haibüa paoe, Ha veishi soupeipu, raki houpa peipu ae mai soukha ali-a loumoa deiphao sou-apeio MAPAO sü Enou-e.

²⁵Enou keingumai ae prousouyu maiye souvo peie. Enou tsüveiyu maiye soulu peie, ae puletao vei tsüdo aveih nasü voyu hi southou khaipeie.

²⁶Ana avei kilai-o nou vepare rai-a paosü peiyu phaki, Enou kopaomaiye seive avei tsüchoda khaitouyu khesü paongao peiyu phaki, Enou vepare paosü khaitouyutao ae tsüchoda khaitouyu khesü panou vepa vuzülai. Enou Jerusalem hisü maikhe maiye panou ve hrüdakhailai tea paopei khaitoue, ae Judah vei nuhdutao sü panou soushu dakhai loulai. Nuhdu sütao sü soushi khaitouyu hinou soushu dakhai loulai.

²⁷Zaidu ae reidzü khesü Enou kharochi peia southe peie.”

²⁸Enou Sairas hisü paoe, “Ne sü Eye donou nuh teidei khasa-a hrülai; Enou jüpayu vah khesü nenou soulai, nenou Jerusalem sü soushu dakhailo tea kharochi peilai, ae Rathoki nasü beikhei soushulo tea paopeilai.”