Read Poumei Naga ISAIAH 46 Bible Online

ISAIAH 46 - Poumei Naga bible

ISAIAH 46

¹“Babilon hi ra khesü hainou akhai soure! Bel ae Nebo hai daoh vuli hio mainou tho-e, ana chuo puletaoye sü chokhaorü phao hinou pfüa tare, veasho poa chokhaorü nou pfüa tare.

²Bashara khesü lahnou lahye khailu palou more, puletaoye sü nüloua hukhamai soua nüpoa tare. Babilon hi ra khesü hainou akhai soure!

³“Oh Jakob vei tyaosholea maitao, Enou paoyu kei peio. Shokhaitoua buyu Israel mai hrülai, Enou neletaoye sü pou pfüa bukinou chukoute hai kikoa laipeie.

⁴Nenou tsüpa-a peipao payu koute Esü nevei Ramai baie ae neletaoye kikosa-a laipeilai. Enou neletaoye soupeie ae neletaoye khosa-a laipeilai, Enou neletaoye sü soukha peilai ae vupa peilai.

⁵“Nenou Eye thao raiwe tea paona dalai?” tea MAPAO nou paoe. “Eye raibüyu mailia buhage?

⁶Maikhe mainou poushabvü hisünou sana sü popa louwe, sühdouyu hisünou shahu sü doulouwe. Puletao nou sana souyu maiye ngaloua panou bashara sü soulouwe, süthaisü puletao nou süna phi hi nakou khurüa thowe.

⁷Puletao nou sünasü phao hi popaloua pfütawe, puletao nou khaibuh hi khaipeie, ae buh sühi sünou la-a bubaiwe; buh sühi sünou lüa tacha moe. Mai ali nou shusoua rao-a buyuma chila peicha moe, puhnou maikhe maiye sü veahoyu hisünou khailupa peimoe.

⁸“Mahmo soua buyu maitao hainasü licholo; Enou daie soupei khaitouyu khesü licho khaio.

⁹Daoh raichoki daie vepare touyu khesü licho khaio; daiolouzü E hai Ramai nasüe, ra kukhe alia ha-e, ae Eye raiyu ramai kukhe ali-a ha-e.

¹⁰Soushu arai nou akhai koute vepare khesü Enou paosüpa peiwure; daoh raichoki nou vepare sü paopeiwure. Enou lichoda khaitouyu khesü vepalai; ae Enou soulai tea buyu khesü souvete vuzülai, tea Enou paopeiwure.

¹¹Teinghi palova nou, kadoukou buyu mai ali Enou lichoda khaitouyu khesü panou souvete loure donou kupeiyu phaki, puhsü raohou ali nou zhaoveyu büa velai. Enou paokhai touyu khesü souvete loulai, Enou lichoda khaitouyu khesü soupeie.

¹²“Tsüle khoushoa buyu maitao, khailupa loure hinou doushoa buyu khemai, achi keilo.

¹³Khailupa loure nasü Enou poa laire, hai nasü kadou more, ae Enou khailu peire nasü shomore. Enou Zion ye sü khailupa peilai, ae Israel maiye sü panou aveih aduso nasü soulai.”