Read Poumei Naga ISAIAH 47 Bible Online

ISAIAH 47 - Poumei Naga bible

ISAIAH 47

¹MAPAO nou paoe, “Oh Babilon, nevei vebuh hinou taokouloua kou deiphi hi chobulo. Ne sü raichokio mainou sabu-sazü khaitou moyu loumainah ali büa bue, ana chuo neye sü hrünowe ae chimoe tea paopu khailai more! Newo chuo qila mai soutare!

²Thou saoyu chuh sü polo ae sou saokhaio! Ne pah hosah nasü laopa-o! Nevei sabanü aveih khesü phakhaio! Reidzü kachore donou ne nü sü laokhelo.

³Nenou sabanü noumoa baitouyu sü maikhe maiye panou ngaolai, neye hraongu soupeiyu sü maikhe maiye panou zhingaolai. Enou khüngu sü phoutalai, mai ali koute-a shokhai peilai moe.”

⁴Etaoye khailu-apeio, Khoukhoulai MAPAO touyu sü puhvei zhih-e, Puh hai Sheeyu Israel maivei Ramaie-e.

⁵MAPAO nou Babilon mai hi paoe, “Ngasou teizhi hi sünou chobulo, daiolouzü mai linoua neye sü tyahrütao vei veopfüpai tea kupu khailai more.

⁶Enou avei maitao pei hisü rarou loure, avei kikaa thaore maitaoye sü ahrao soupeie: Enou puletaoye sü ne bah hi thoupeie, anou nenou puletaoye sü zhuvea peimoe; tsümai koute-a nenou koupo sü sühpua nou peia baie.

⁷Ne sü teisa nou veopfüpai soua bukoute-a bailai tea tsü choloure, südonou haibüyu khesü nenou tsücho lou moe, moa kabüa akhai soulaisa touyu hai-a tsücholou moe.

⁸“Südonou chuo haisü keilo khaio, asah ralea jüpa-a laiyu maitao, kaozhou ashi vepai moe tea vaphia-a nou haibüa tsücho-a buyu maitao, ‘E deinou, thaonou Eye raiyu busü; Esü meamaipfü ali soukhai toulai moe, moa nahmai-a thaisou sü soukhailai moe.’

⁹Ana nghimaisü ali hinou ae teithe ali hinou haina ahai kheinou ne hisü velai. Nenou kheikhupado tyatyali soulou süshoa buyuma nevei tounahtao ae maipuo sü ne hinou hata-a bailai.

¹⁰“Ne sü lah nenou souyu vah ashi khesü louche-a ‘Mai lia Eye ngaolou hoe’ tea paowe. Nevei hasü ae tsüvei sünou neye sü süthaimah poa tare, ae lah ne lekhe hinou haibüa tsücho-e ‘Esü Ramai-e, Eye büyu mai ali-a ha-e.’

¹¹Ana ashi sünou ne hisü velai, ae süsü nenou dotyali souyuma nukhailou laimoe, Veahoyu sü ne pei hi veloulai, ae sünasü nenou turei palou laimoe, alia nenou sükhai moa buyu hisünou hakayu sü ne hi velai.

¹²Nenou nahle-a bukinou soupayu kheikhupado khesü soutaosou khaitou toulo. Sükulouzü nenou veiloua malae, ae neye ngaobayu maiye soupi lailoua mala-e.

¹³Neye tyatyali soua paodou peiyu donou ne sü veapua baie. Teivu ae khouh ashu zhipoa vepare süyu maiye panou tave ne hi dai-e vepalai touyu khesü paopeio ae neye vupa peio.

¹⁴“Zhukhaio, puletao hai rouvao büa baie, mei nou puletaoye deilai bailai! Puletao hai lahnou lahye meikei hisünou khailupa loulai moe, mei vore meithou sü ali-a hare.

¹⁵Nenou nahle-a bukinou te-a vah soua laiyu ae puletao nou neye soukha peilou süyu sü sübüa baie. Neye mai linoua khailu peiloure ha-e, puletao mai hrülai sü lahkuku vei bo phouloua tuta-a bailai.”