Read Poumei Naga ISAIAH 48 Bible Online

ISAIAH 48 - Poumei Naga bible

ISAIAH 48

¹Oh Israel maitaore, haihai keilo, ae Judah maitya hinou hrüveyu maitao; MAPAO vei zhih hinou chaachou soukhai touyu maitao, ae Israel maivei Ramai ye thowe tea paoyu maitao — neletao hai acheche moa kaozü nasü soupfü more.

²Ana neletao hai khaophu soua sheeyu nuhdu hinou hrüyu maitao-e tea paowe, ae Israel maivei Ramai, Khoukhoulai MAPAO ye louche-a bue tea paoe.

³MAPAO nou Israel mai hi paoe, “Daoh raicho kinou Enou vepare khesü rai-a paodai peie; süthaisü thashoa Enou sükhesü panou vepa peie.

⁴Daiolouzü neletao hai maikho mairo züba-e touyu Enou süe, neletao vei ngu hai hu büa khou-e, ae neletao vei pu hai baosahu büa chiwe touyu Enou süe.

⁵Daoh raichoki nou sükhesü Enou paoda peiwure, sükhesü vepamo kinou neletao hisü Enou rai-a paosü peiwure, sübüa neletaoye panou neletao vei bashara ae zhurai soukhai touyu khenou soupeie tea panou paomore donou Enou rai-a paodakhai peiwure.

⁶“Enou rai-a vepalai tea paoyu teitei sü chuo vepare; sükhesü neletao nou ngaore ae süloure, südonou Enou paodayu khesü cheche-e tea neletao paolai movu? Chuo Enou neletao hi haithai vepare khesü raia paosü peilai.

⁷Chubünou hai khesü Enou pa vepa-a baie, haibüyu khesü raichoki vepakhai toumo hie. Raichoki haibüyu tya vepa-a bulouzü nenou ‘E-a hai khesü süwe’ tea paolou vei-e.

⁸Nenou hai khesü choumo hie, moa ngao-a ngaomo hie, daoh nou nevei noubei sü houpei moe. Daiolouzü ne sü maishiyu mai ali soulai touyu Enou süwe, ae neye nakouyu teithe hinou ne hai khaityalai touyu sü süwe.

⁹“A zhih shi more donou alekha sü khapoa bubaie, ae maikhe mainou Eye paoshore donou rapamoa bubaie, südonou neletaoye sü souha moa khaitoua bubaie.

¹⁰Shahu hai souveipu loure donou mei hi thou deiyu büa Enou neletaoye sü veahoyu nou seive souvea peia zhue, ana neletao hai veipu moe.

¹¹E lah Eye donou haisü soua baie, avei zhih sü daisounou maiye panou soushi shulai, moyuma avei kathe nasü Enou mai kukhe mai hi peilai moe.”

¹²MAPAO nou paoe; “Enou kulouyu Israel maitao, achi sü keilo! E hai raikayu ae nakayu Ramai nasüe!

¹³Abah nou deiphao sü soushu peie ae raki sü soutopa peie. Enou deiphao ae raki ye kuyu phaki, puhai ahai kheinou thashoa tave la-a bue.

¹⁴“Neletao mai hrülai sü tave jülo ae keilo! Thaonou hai khesü rai-a vepalai touyu sü paosü peie? MAPAO nou puhye leshi-e, Puhnou Babilon vanou tsüchoda khaitouyu nasü soupeilai, ae puhnou Kaldea maiye sü reih dulai.

¹⁵Enou puhye sü kuloue ae puh hi paopeie; Enou puhye sü save peie ae puhnou souyu khesü veilou ngaloulai.

¹⁶“Ahi takou nghilo ae Enou paoyu sü keilo. Arai railai hinou Enou kheikhei soua paomoe, dukhya-a paopeie, ae Enou paopayu khesü cheche-a vepa-a baie.” (Chuo Khoukhoulai MAPAO nou puhvei khouko sü ahi peie ae Eye seita peie.)

¹⁷Neletaoye khailu-apeio, Israel maivei Sheeyu Ramai MAPAO nou haibüa paoe, “E hai neletao vei Ramai MAPAO nasüe, neletaoye panou veiloure donou paodou apeio nasüe, ae neletao nou tare ludu hi süthaisa-a tapeiyu nasüe.

¹⁸“Neletao nou avei kharochi züloure toulouzü, kaozhou veiyu sünou neletao hisü reidzü küyu büa külai, ae neletao nou veilou ngalouyu sü zai hi dzü lüyu büa lüvelai.

¹⁹Neletao vei tyaonah khesü zai hi vünai zhoua poulai, puletaoye sü souhakhai toulai moe, moa anghoujü nou puletaoye sü soushi laimoe.”

²⁰Babilon hinou tapalo, Kaldea hinou tutalo! Ko hainasü asasoua shusoua nou shapao peikhaio, deiphao akhai hi koute paota peikhaio, “MAPAO nou puhvei kilai Israel maiye sü khailupa peire!”

²¹MAPAO nou puhvei maitaoye radeiki hinou sa-a tayu phaki, puletao hai dzü reimoe. Puhnou puletaoye sü chuhlya hinou dzü soupa peie, Puhnou chuh sü dakhopa sühinou pa dzü kü loue.

²²“Mahmno souyu maiye donou kaozhou aveih sü ha-e” tea MAPAO nou paoe.