Read Poumei Naga ISAIAH 49 Bible Online

ISAIAH 49 - Poumei Naga bible

ISAIAH 49

¹Oh zaipe hinou hrüa buyu tyahrütao, Enou paoyu keilo, ka doukou nou hrüa buyu maitao apai sü keilo! MAPAO nou Eye apfü pou hinou kuloure, apfü pou hinou puhnou azhih sü sapeie.

²Puhnou amü sü hei veishoyu khoche ali büa soupeie, puhnou puh bah sünou Eye vupa peie. Puhnou Eye voulouthou pei southou tsüphi khaitouyu ali büa soupeie, puhvei voulouthou pfüyu bvü hinou puhnou Eye poku peie.

³Puhnou ahi paoe, “Oh Israel, ne hai avei kilai na-e, ne vanou maikhe mainou Eye paosholai.”

⁴Ana Enou paoe, “E sü hamako hinou ru-a vah souwure! Enou halia moyu ae komoyu hinou avei pfüchi sü souhawure.” Ana Enou soupfü khaitouyu khesü MAPAO donou baie, ae Enou soupfü khaitouyu sü avei Ramai nou Eye buu peishulai.

⁵Alia chuo MAPAO nou paoe, puhvei kilai panou soure donou Eye apfü pou hinou puhnou soupeie, puhvei maitao hai puh hi sa-a dakhai vepeire donou ae Israel maiye puh hi save jüloure donou Eye kuloue. Daiolouzü MAPAO vei nghingao hinou Eye tsükhou peie, ae Ramai nou avei pfüchi sü soupeie.

⁶MAPAO nou ahi haibüa paoe, “Avei kilaiwo, Enou neye panou dupuyu vah sü soulai. Shokhaitoua buyu Israel maitaoye nenou kupoa dakhai ve kiduso peiyu likhei bailai moe, neye panou tyahrü hrülai vei ava ali soulai, sübüa deiphao teitei sü panou khailu louyu sü ngaoloulai.”

⁷Sheeyu Israel maivei Ramai ae puletaoye khailupa apeio nou tyahrü hrülai nou jüpamoa ngaora sho-a buyu ae nuh teidei kho-a buyu maitao vei kilai na hisü haibüa paoe, “Veo maitao nou neletaoye phapeiyu sü ngaolai, ae puletao nou lashu neletaoye tsükhou peilai; veo mai nahtao-a neletaoye ngaoloua puletao nou deiphi nakou neletaoye khurülai.” Daiolouzü neletaoye sü puhvei kilai panou soulai tea dolouyu vanou louchelou veiyu Israel maivei Sheeyu Ramai MAPAO nou puhvei apaopei khaitouyu nasü soupeilai.

⁸MAPAO nou puhvei maitao hi haibüa paoe, “Neletaoye khaipeiyu teithe veyu phaki, Enou neletaoye jüpayu sü ngaopeilai ae neletao nou kra-a soukha khoyu paisü Enou keipeilai. Enou neletaoye kho peilai alia vupeilai, ae neletao vanou deiphao mai hrülai hisü Enou koa vo ali soupeilai. Chu mai hrümoa soushi khaitoua buyu teidei hisü Enou neletaoye panou dakhai ve hrüpu loulai.

⁹Enou hukhaki hi buyu maitao hisü ‘Tapalo!’ ae azhi hi hrüa buyu maitao hisü ‘Ava hi tapalo!’ tea paopeilai. Puletao hai hiphao hinou pou tou-a buyu zhaotu büa bulai.

¹⁰Puletao hai hou-zü laimoe, moa radeiki hi teisouyu ae teinghi noua puletaoye sü phushi loulai moe. Daiolouzü puletaoye sü zhuvea apeio sünou süthaisa-a tapeilai, ae puletaoye sü dzüla aveih hi süthaisa-a vepeilai.

¹¹“Enou deichi teitei hisü duva vapeilai, ae ludu sütao hisü panou avei maitaoye talai.

¹²Avei maitao sü kadoukou nou veloulai, kamai-a reilova nou velai ae kamai-a teinghi loulo vanou velai, kamai-a nou khelo nou buyu Aswan (Sinim) hinou veloulai.”

¹³Oh raki, lou soukhaio! Asah sounou lou soukhaio, Oh deiphao! Deichi khesü panou shusoua lou soukhaio! Daiolouzü MAPAO nou puhvei maitaoye sousava peiwure, ae veaho-a buyu puhvei maitaoye sü puhnou zhuvea peie.

¹⁴Ana Jerusalem hi mainou paoe, “MAPAO nou Eye thaowure, Puhnou Etaoye mangaiwure.”

¹⁵Südonou MAPAO nou chila peie, “Naotumai ali nou puhvei nahtouye ngailou süvu, ae honapai nou nakhai touyu nahtou naye leshi laimowu? Honapai nou nahtouye ngaiyuma Ewo louzü neletaoye ngaikhai toulai moe!

¹⁶Oh Jerusalem, Enou neye mangaikhai laimoe! Enou nevei zhih sü abahla hi rüthouwure.

¹⁷“Neye soushupu peire mai nasü thashoa laire, ae neye soushiyu maikhesü talaire.

¹⁸Ne pei pfüla loua zhuhaove khaio, nevei maitao sü tave jüloua ki hi veloure! E hai hriyu Ramai chekhaoyu thaipfüa nenou nevei maitao donou khaophu soulai, nghire naotumai ali nou zhusana tutoupfüa khaophu souyu büa ne-a khaophu soulai.

¹⁹“Soushi khaitouyu nevei tyadei ae thaowua buyu teidei khesü, chuo nevei maitao nou tave hrüre donou teidei sünasü taileshu laire. Neye soushi khaitouyu maikhesü panou kadou sho-a tashu laire.

²⁰Mainou nüpoa taho vakou maivei teidei hinou nalouyu nahmai khenou ne hi haibüa paolai, ‘Teidei haina hai Etaoye donou taiyu lere, Etao panou bure donou füdei peipu peio.’

²¹Süthaisü ne le hinou haibüa tsücholai, Mai haitao hai thaonou Eye napeie? Esü nahmai hrülai nou hazei toudao, ae nahapfü ali soua soureih hinou nüpoa hukhamai ali soua vakou saho khaiwure, ana chuo thaonou mai haitao hai kikopa peisa? Eye sü lah likhei khaipeia baie, ae chuo mai haitao hai daikinou vege?”

²²Ramai MAPAO nou paoe, “Enou tyahrütao hisü shee ali soungao peilai, ae puletao nou neletao vei nahmaitao sü ki hi save peilai.

²³Veo maitao nou neletaoye kiko peiyu puo ali soulai, ae vemai pfütao nou neletaoye kipeiyu pfümai soulai. Puletao nou neletaoye nakou khurülai ae neletaoye khuhao-a tsükhou peilai. Süthaisü E hai MAPAO nasüe touyu neletao nou süloulai; Avu rei-a Eye khoyu mai taralia hraongu ngaolai moe.”

²⁴Soureih souyu hinou shaolouyu natao sü reih souvei shoyu mai bah hinou shaopalou süvu? Moa zhaipou shiyu mai bah hinou nüpoa tayu hukhamaiye khailu palou süwu?

²⁵MAPAO nou haibüa chila peie, “Khouko bushoyu reihmai nou nüpoa tayu hukhamai koute-a popa loulai, ae zhaipou shishoyu mainou soureih hinou shaolouyu kinitao-a shaopa loulai. Neletaoye reih soua duyu maikhe sü Enou dulai, ae Enou neletao nahmaitaoye khailupa peilai.

²⁶Enou neletaoye souvea souchoroyu maitaoye sü panou lah puletao vei sou sü toulai, ae zhaoh sozhiyu büa panou puletaoye sü lah puletao vei zhe kelai. Süthaisü deiphao mai hrülai nou E hai MAPAO, neletaoye khailupa-apeio ae neletaoye panou lahdo soulouyu Ramai nasüe touyu süloulai.”