Read Poumei Naga ISAIAH 51 Bible Online

ISAIAH 51 - Poumei Naga bible

ISAIAH 51

¹MAPAO nou paoe, “Khailu-apei jüpayu mai ae Eye phou laiyu mai sü Enou paoyu keilo. Neletaoye daokho palouyu chuhdu nasü licholo, ae neletaoye pojükhai touyu chuhkho nasü zhulo.

²Neletao puo Abraham ae neletaoye napeiyu Sarah ye zhulo; daiolouzü Enou puhye kulouyu phaki, puh sü nahmai ha-e; ana Enou puhye shiha peie ae tyaosholea alao peie.

³“Enou Jerusalem sü zhuvea peilai, soushi khaitouyu füdei hi hrüa buyu maikhe maisü Enou sousava peilai. Enou hiphao khesü Eden kipei büa soupeilai, radeiki khesü MAPAO vei kipei büa soupeilai. Savayu sü honapai vanou ngaolai, asa-a kalo pao-a Eye lou soushoa bulai.

⁴“Avei maitaore, Enou paoyu sü keilo, ae avei tyahrü taore, Enou doupeiyu sü polo, daiolouzü ahi nou chikha sü palai, ae avei kaozü nasü maikhe mai hi ava ali soulai.

⁵Enou khailupa peire teile sü nghire, Enou veilou ngaloure teile sü thasho-a laire. E vuzünou tyahrütaoye khasa-a hrülai. Kadou sho-a buyu maikhe mainou E vere vuzhia nou bue, ae Enou khailupa peire sü puletao nou zhishoa bure.

⁶Ne pei pfülashu rakiva sü zhukhaio, ae deiphao-a zhukhaio! Raki sü meikhao büa hata-a bailai; deiphao sü sabanü büa pata-a bailai, ae sühinou hrüa buyu maikhesü khaomai büa thaita-a bailai. Ana Enou khailupa peiyu nasü teisa nou bulai, avei khailu peiyu sü akhai bulai moe.

⁷“Acheche süyu maitao, Enou paoyu keilo, neletao vei tsüle hi avei chikha pothou khaitoua buyu maitao, mainou neletaoye paoshi-a züyu sü ngaopiso, ae puletao nou cha-a züpeiyu vanou neletao chathai taso.

⁸Daiolouzü puletao hai sabanü ali büa rüh nou touloua bailai, ae soumaisah ali büa khu nou touloua bailai. Ana avei khailu peiyu sü khapao teitei vei soulai.”

⁹Oh MAPAOwo, kaishuloua Etaoye khailupa peio! Daoh raichoki büa tashuloua nevei khouko sünou popa Etaoye khailu peio! Rahab ye doade sasa peiyu nasü nenou movu? Zai hi buyu maitoukhao nasü nenou southa peimovu?

¹⁰Zai dzü southe peiyu, ae zai toutsü hinou ludu soupeia khailupa louyu maitaoye panou tachopa louyu nasü nenou movu?

¹¹MAPAO nou khailupa louyu maitao sü ki hi dakhai velai, puletao nou asasho-a lou soupoa Zion hi ve loulai. Teisa savayu sü puletao hi bulai, puletao nou asah sü ngaolai, ae veahoyu alia dopfüyu sü bupu laimoe.

¹²MAPAO nou paoe, “Enou neletaoye soukhou peiyu nasüe. Neletao thaita-a bailaiyu maiye sü daisounou ngaopiwe?

¹³Neletaoye sou-apeio, raki ae deiphao soupeiyu MAPAO ye neletao nou ngairevu? Neletaoye souvea souchoroyu mai, ae soushilai tea buyu maitaoye daisounou neletao ngaopi koute-a laiwe? Neletaoye souvea souchoroyu maivei lekha rarou sünou neletaoye soushi louhoe.

¹⁴Hukhaki hi buyu maiye sü thasho-a phapei laire, puletao hai thai moa hrüsho-a hrülai ae touso-a hakhai toulai moe.

¹⁵“E hai neletao Ramai MAPAO nasüe. Enou zai dzü sü soulü peia panou kho rapawe. Khoukhoulai MAPAO touyu sü avei zhih-e.

¹⁶Avei chipao khesü Enou neletao mü hi thoupeie, ae abah nou neletaoye sü pokupeie, raki ae deiphao sü Enou soupeie, alia Enou Zion ye ‘Neletao hai avei maitao-e’ tea paopeie.”

¹⁷Oh Jerusalem, kaishulo! Neletao lah kaishulo ae kushulo! MAPAO vei lekha rarou hinou tudeeyu chapai nasü neletao nou keloure; neletao nou sünasü keloua chaorara poa lua bure.

¹⁸Mai linoua neletaoye süthai peire mai sü hare, nevei maitao hisü mai linoua neletaoye bah nou süthaipoa sata peire mai hare.

¹⁹Veahoyu ahai sü neletao hi velai: Thaonou neletaoye sousava peilai? Souhayu ae soushiyu, tokaa ae khoche— haitao hinou thaonou neletaoye sousava peilai?

²⁰Nevei nahmaitao hai lülou hoa sheatare, puletao hai ludu kinou züa bure, shu ali rüh hinou mulouyu büa züa bure, puletao hisü MAPAO vei chaa ae Ramai vei rarouyu sünou phoutao-a bure.

²¹Veaho sho-a nou buyu Jerusalem maitao, zhaoh sozhiyu büa chaorara-a laiyu maitao,

²²neletao Ramai MAPAO nou neletaoye vupeie ae haibüa paoe, “Avei lekha rarou hinou peikhai touyu pai nasü neletao hinou polaiwulai. Neletaoye panou sünasü keloua zhipu khailai more.

²³Enou pai sünasü neletaoye souvea-a haibüa paoyu maitao hi peiwulai, ‘Takou dazülo, Enou neletao phao hinou talai,’ ae neletao vei phao sü deiphi büa pa mainou neletao phao nou ta-e.”