Read Poumei Naga ISAIAH 53 Bible Online

ISAIAH 53 - Poumei Naga bible

ISAIAH 53

¹Maikhe mainou haibüa chila peilai, “Etao nou cho-a buyu haisü thaonou louchelai? Ae thaonou MAPAO vei bah thaithou-a vah soupeiyu sü zhingaoe?

²Daiolouzü puhsü puh nghoujü nou süübetou ali nou deithe hinou maa tsülouloua paopayu büa baie. Puh hisü thainüyu ae zhainga veiyu ali-a ha-e ae puh hisü hüveiyu ali koute-a ha-e.

³Puhye sü mainou ngaora-a pomoyu mai ali baie, veasho-a laiyu mai ali baie, ae sounou sou-a laiyu mai ali büa baie. Mai linoua puhye sü zhu chamoe, ae Etao nou puhye sü ngaora-a tsükhou peimoe.

⁴“Ana puhnou Etao thaosou Etao nou veahore ae soure sü pfüpeiwure. Sübüa buyuma Etao sü puhye Ramai nou tudee-a veahoyu ae sounou sü peia baie tea poloure.

⁵Ana Etao nou mahmo souyu donou puhye sü zhipeia baie, Etao vei vah ashi souyu vanou puhye dapeia baie. Puhye souvea peiyu donou Etaoye souveih peia baie, ae puhye zhimü soupa peiyu donou Etaoye souvei peie.

⁶Etao mai hrülai motayu zhaotu büre, Etao mai veishi hai lahkuku nou tanüyu hisü tare. Ana MAPAO nou Etao vei mahmo teitei sü puh pei hi pokakhai peiwure.

⁷“Puhye sü souveasho peie, ana puhnou peikhai timoa shamea loure. Zhaotu aliye dathayu buh hi hupoa tayu büa ae zhaotu ali mai sailai teanou mai saiyu mai nghoujünou paikhai toumoa buyu büa baie.

⁸Puhye sü nüloua souvea peia nou chikuyu buh hinou süthai poa tare, mai linoua puhye donou tea chopei moe. Etao mahmo donou puhye sü southawure.

⁹Puhnou vah ashi ali-a soumoyuma ae dayu chi ali-a paomoyuma, Puhye sü mai ashi maiye koa khüh ali hinou povu peiwure, puhye sü toungiyu maiye koa daovure.”

¹⁰MAPAO nou paoe, “Puhnou veahoyu sü avei leli-e; maikhe maiye khailu loure donou puhye sü posheela-a phasoua thaire. Südonou puhnou puhvei tyaosholea khesü ngaolai, puh hai hrüsho-a hrülai ae puh vanou avei leli ae choda khaitouyu khesü souche loulai.

¹¹Puhnou veayu thainou, savayu ae rukhayu sü ngaolai; puhnou veahoyu sü hamako hinou vea moe touyu sü süloulai. Checheyu avei kilaiwo nou maitaoli vei mah sü pfüa talai, süvanou maitao liye khailu peilai.

¹²Südonou Enou puhye sü aduso mai ae khouko buyu maiye koa khailu louyu buh hi khaipeilai, daiolouzü puhnou thaipeie, ae mai ashi mainou ngaore thaosü puhnou vea peie. Alia puhnou maitaoli vei mahmo sü pfüpeie, ae mahmo souyu maiye donou veachi paokha peie.”