Read Poumei Naga ISAIAH 54 Bible Online

ISAIAH 54 - Poumei Naga bible

ISAIAH 54

¹Oh nahapfüpai, nahmai hrümoyu naotupai, khya soukhai toumoyu naotupai, sasho-a nou lou sü shusoua soukhaio. Daiolouzü mainou thaokhaiyu naotupai sünou maipu mainou koa teisa nou sabuyu na jünou nahmai ngaopou laire, tea MAPAO nou paoe.

²Nenou buyu nevei sahpao nasü soudupu palo; sahpao haoyu rai sü soucholo, ae sahpao kayu süü khesü soutaosoua veachü toulo.

³Daiolouzü chuo neletao vei deiraih sü soudu palai, ae neletao vei tyaosholea khenou chu tyahrü kukhe nou hrüa buyu teidei hisü buloulai, alia mai hrümoa thaokhai touyu nuhdu khesü chuo maikhe mainou ve füsho khai touloulai.

⁴Ngaopiso, daiolouzü neye sü hraongu peipu kheilai more, ae soutai sounou peipu khailai more. Daiolouzü nahle-a buki nenou hraongu ngaoyu khesü ngaiwulai, ae mimea maipfü ali büa veahoyu khesü lichopu khailai moe.

⁵Daiolouzü neye Sou-apeio sünou nevei maipou ali büa sabu peilai, Khoukhoulai MAPAO touyu sü puhvei zhih-e. Sheeyu Israel maivei Ramai nou neye sü khailupa peilai, puh hai deiphao teitei vei Ramai nasüe.

⁶Oh Israel, ne hai nahle shoa bukinou maipou mainou hulaiwua veasho-a lah likhei buyu naotupai büre. Ana MAPAO nou neye sü puh hi kudakhai veloua haibüa paoe,

⁷“Phateile jütouli hai Enou neye sü hulaiwure, ana chuo Enou neye sü leshi shoa podakhai loulai.

⁸Teile katouli hai Enou rarou shopoa ne hinou tavai tare, ana chuo Enou neye sü teisa nou leshi peilai,” tea neletaoye khailu apeio MAPAO nou paoe.

⁹“Noha vei teile hi Enou deiphao sü dzüdu panou souhapu khailai more tea chaachou soupeie. Chuo Enou neletao hi chaachou souwe, süolouzü Enou neletao hi raroupu khailai more, ae neletaoye züa chaa pupei khailai more.

¹⁰Deichi ae deitaoh khenou pepoa tayuma Enou neletaoye leshiyu sü hakhai toulai moe, Enou neletaoye koa kaonayu vo soukhai touyu nasü pfütho laimoe,” tea neletaoye leshi peiyu MAPAO nou paoe.

¹¹MAPAO nou paoe, “Oh veaho shoyu paire, teikhai teirü ashi nou souvea shopeia buyu nare, neye sü mai linoua sousava peire hayu Oh Jerusalem, Enou neye sü mutei chuh nou poa soushu dakhai peilai.

¹²Enou nevei ki peitaoh khesü mutei kayu rubi chuh nou poa soupeilai, nevei robomü khesü sana nou soupeilai, ae kivo teitei sü mutei chuh nou poa soupeilai.

¹³“Enou neletaoye sü doupeilai, alia neletao hisü vasayu ae kaonayu sü peilai.

¹⁴Acheche ae kaozü nasünou neletaoye soushu peilai, neletaoye souveayu ae souchoroyu sü bupu khailai moe, neletao nou ngaopi laimoe, ae pirayu sü neletao hi velai more.

¹⁵Mai taralia neletaoye dulouzü, puh sü ahinou ve moe; mai taralia neletaoye züveia dulouzü puh sü kaodu ta-a bailai.

¹⁶“Hu kua reih basei soupayu maitaoye sü Enou soupeie, ae reih basei sütao poa maiye southayu reihmai-a Enou soupeie.

¹⁷Ana reih basei tarali noua neletaoye sü soushilou laimoe, ae chikuyu hi mai tara linoua neletaoye paoshia mah dukayu teitei hinou neletao nou veiloua bailai. Enou avei kilai nasü vupeilai ae veilouyu sü puh hi peilai,” tea MAPAO nou paoe.