Read Poumei Naga ISAIAH 55 Bible Online

ISAIAH 55 - Poumei Naga bible

ISAIAH 55

¹MAPAO nou paoe, “Tavelo, rei-a laiyu maitao, dzü hi tavelo! Pousha ha-a buyu maitao, tave touso sü hüloua tou khaio! Tave zhaoh ae chonaodzü kelo, pousha polai moe, ae muhma-a polai moe!

²Daisounou neletao hai toulou shiyu touso hinou pousha souhawe? Ae rukha moyu vah haso hinou neletao daisounou hazho dowe? Enou paoyu sü keilo, ae sübüa neletao nou vah soulouzü neletao hai sava-a nou touso veih kayu tyanou toua bulai.

³“Enou paoyu jülo, ae ahi velo; sükulouzü neletao nou hriyu sü ngaoloulai. Enou neletaoye koa teisa vei soure vo ali soulai, ae David hi apaokhai touyu tobai soumoa leshi peiyu nasü neletao hi peilai.

⁴Enou puhye panou tyahrütao vei süthai-apei ae peikhowo sü soupeie, alia avei khouko khesü puh vanou maikhe mai hi ngaopeie.

⁵Chuo neletao nou sümoyu tyahrütaoye neletao hi kupoa velai, ae neletaoye sümoyu tyahrütao nou neletao hi tupoa velai. Daiolouzü sheeyu Israel maivei Ramai MAPAO, Enou neletaoye sü souduso peiwure.”

⁶MAPAO ye sü ngaolou süa bukinou phoulo, ae puh nghiki bukinou kulo.

⁷Mai ashi maiye panou puletao vei ludu nasü thaokhaio, ae cheche moyu maiye panou puletao vei tsüle ashi nasü thaowo. Puhye sü panou Eletao Ramai MAPAO hi dakhai velo, sübüa puhye sü panou puh vei zhuvea leshi ae khailu peiyu nasü ngaolo.

⁸MAPAO nou paoe, “Avei tsü hai neletao vei tsü raimoe, ae avei ludu hai neletao vei ludu jünou tyaku-e.

⁹Raki hai deiphao jünou kuyu bütoua avei ludu hai neletao vei ludu jünou ku hie, ae avei tsüle hai neletao vei tsüle jünou kupu hie.

¹⁰“Daiolouzü avei chipao hai vüra ae teirü büwe, ae sünanou deiphao hi kou dzü züpeiwe. Sübüa shinamara khenou paopalouwe ae thoutai vuyu mai hi thoutai peiwe ae maikhe maiye touso peiwe.

¹¹Sübütoua amü hinou paopa khaitouyu chipao khesü ahi sakhai-a dakhai ve laimoe, ana Enou tsüchoyu khesü soupeilai, ae Enou seitayu vah khesü souloua dakhai velai.

¹²“Neletao nou Babilon sü asah shopoa thaowua tapalai, ae kaonaphi-a neletaoye nuhdu hinou süthaisa-a tapeilai. Neletao nghoujü nou deichi khenou lou soulai, ae süübetao-a asah soua bah taolai.

¹³Poudai nou hrüa buyu hiphao hisü haosüübe nou pahpa hrüloulai, shube khenou hrüa buyu hisü vaobe, chasüübe nou hrüloulai. Haina nou ngailou hoyu teisa vei shee, ae MAPAO Enou haisü soupeie touyu licho loure donou shee alisoua khaipeilai.”