Read Poumei Naga ISAIAH 56 Bible Online

ISAIAH 56 - Poumei Naga bible

ISAIAH 56

¹MAPAO nou paoe, “Kaozü ae acheche nasü soulo, daiolouzü Enou khailupa peire sü nghire.

²Soteithe soutaosoua reiyu mai ae hainaye souzhai moyu mai alia kaomo zümoyu vah ashi soumoyu maikheye sü Enou shiha peilai.”

³MAPAO vei maitao hi shetumai nou velou koa hrüzho-a bulouzü puhye sü panou haibüa paoso, “MAPAO nou Eye sü puhvei maitaoye koa panou rathozho paimoe.” Alia jütou khaitouyu maiye panou “Esü kitayu süübe ali büa baie, Esü tou-dzü ngaolou hore” tea paoso.

⁴Daiolouzü MAPAO nou haibüa paowe, “Neletao nou avei Soteithe nasü reitoua bulouzü, ae Enou jüpayu vah haso soua bulouzü, alia avei chikha khesü soutaosoua thaifü louzü,

⁵Enou puletaoye sü avei Rathoki hinou ngailai moyu zhih, nahpoutu ae nah naotumai buyu maitao jünou veipua halai moyu zhih aveih nasü puletao hi peilai.”

⁶Shetumai nou MAPAO ye jüpa-a puhvei kilai soulai tea MAPAO vei maitao hi louzho louyu maitao, ae Soteithe reitoua buyu maitao alia puhnou vo soukhai touyu nasü soutaosoua zütoua buyu maitao hi MAPAO nou haibüa paoe,

⁷“Enou neletaoye sü sheeyu avei Zion deichi hi save peilai, veachi paoyu avei ki hisünou neletao vasa-a hrülai, alia neletao nou Eye posheelayu khesü Enou popeilai. Avei Rathoki nasü tyahrü veishi nou veachi paoyu ki tea kulai.”

⁸Hukhamai soua vakou nüpoa tayu Israel maitaoye pove jüpeiyu Ramai MAPAO nou paoe, pove jüpei khaitouyu maitao likhei baimoa mai kukhe maia save jüpu peilai.

⁹MAPAO nou tyahrü kukhe maitaoye rekhaona ali büa tave puhvei maitaoye nütoulo tea paopeie.

¹⁰Puhnou paoe, “Süthai-apei mai hrülai hai nghithou chakhai toure, puletao hai halia sümore; dao moyu sei ali büre, puletao sü zhi-a memu-a bubaire, ae zü-zhiyu sü puletao nou jüpa-e.

¹¹Puletao hai tounghou shiyu sei büa rukhayu sü ali-a ha-e. Zhaokhomai haitao hai aveih ashi sükulou süyu tsü hare. Puletao mai hrülai nou lahkuku jüpayu hisü ta-a baire ae puletao mai hrülai nou lahkuku vei koyu nasü phouta-a baire.

¹²Puletao nou ‘Etao zhaoh veitya nou phouloua solai she! Dosho-a zhou büa bailai, alia zhou jünou-a veipu lai hi-e’ tea pao-a bubaire.”