Read Poumei Naga ISAIAH 57 Bible Online

ISAIAH 57 - Poumei Naga bible

ISAIAH 57

¹Acheche mai sü thaire, anou mai linoua leloua tsücho peimoe; ae mai aveih maiye sü potare, puletaoye sü vere teikhai teirü ashi hinou poa tare touyu maikhe mainou sükulou more.

²Acheche hinou hrüyu mai sü kaonayu ngaoloulai, ae vah aveih soua hrüyu mai sü kaona-a züphao hinou soyu ngaoloulai.

³Mah souyu maitao, chikure donou haihi takoulo! Neletao hai hraomai, maipfü nahmaiye sapayu mai ae khakha-a chaozülai mai jünou veipu moe.

⁴Neletao thaoye konüwe? Neletao nou mü hepoa thaoye chawe, ae neletao vei mali sü daivanou thaipawe? Neletao hai mahmo souyu ae dahrührüa buyu maitao vei tounah maitao movu?

⁵Neletao süübe kinou tou-dzü hrüre donou ratho-a khulou vah soumovu, ae chuhlea phi kinou neletao vei nahmai sü southaloua poa sheela mowu?

⁶Neletao nou deikho sühinou chuh phouveih shoyu khesü poloua süna hisü neletao nou zhaoh nghoupeiwe, ae neletao nou thoudzü vei posheela nakhesü pove peiwe, neletao nou sübüa souyu khesü Enou jüpa shulai tea neletao tsüchovu?

⁷Neletao hai deichi kuyu vahi taopaloua khulou vah souwe, ae sühi sünou posheela khesü sheela peiwe,

⁸Neletao nou kikhu thailo ae dekatao hi sheemoyu zhurai khesü pokhaiwe, ae Eye thaowua neletao hai leshi paiye sazü sabu tare. Sübüa neletao vei ke-zhe jüpa nasü rukha soutare.

⁹Neletao nou Molek rahye thore donou theadzü ae kainüvei pou khesü naloua phoutawe. Neletao nou puhye thore donou kopomaiye holo hailo seitawe, alia thaimai nou hrüyu buh hi koute-a seitawe.

¹⁰Rah kukheye thore donou phouhaopoa tayu donou neletao hai veahore, ana neletao nou thao ba-e. Neletao hai sheemoyu basharatao nou neletao hi pfüchi peiwe tea tsücholoua baire, südonou neletao hai lelouho moe tea bubaire.

¹¹MAPAO nou paoe, “Neletao ramai kataoye ngaopi loua ahi madawe ae Eye ngaiwe? Neletao Eye tsükhoumo tayu sü Enou neletao hi teile phasho-a chakhai toumoa nasha tea buyu donouvu?

¹²Neletao nou soua pfüyu vahtao hai macha-e tea neletao hai tsücholouwe, ana Enou neletao vei vah haso khesü popa ngaopeilai. Süphaki neletao vei basharatao nou neletaoye soukha peilou laimoe.

¹³Neletao nou kra-a soukha khoyu phaki, neletao vei basharaye panou neletaoye khailu peiyu sü soulo! Teikhai nou puletaoye sü hüpoa ta-a bailai. Ana Eye loucheyu maitao sü teidei sühi hrülai, ae avei Rathoki hinou Eye tholai.”

¹⁴MAPAO nou paoe, “Avei maitaoye panou ahi tavelo. Puletao vei ludu hi khu-a buyu veishi sü polai peio! Ludu sü souta khaio, ae souda peio.

¹⁵“E sü kuyu ae Sheeyu Ramai-e, alia teisa nou bure nasüe. E hai kuyu ae sheeyu buh hinou bue, anou leda louyu mai hi ae tainou soua laiyu mai hi-a E bue, sübüa puletaoye sü Enou sousava peilai ae puletao hi areih sü peilai.

¹⁶Enou avei maitaoye sü hrirai peie, südonou puletao hisü Enou mah duka peipu khailai more alia raroupu khailai moe.

¹⁷Puletao nou mah souyu donou ae dutounüyu donou E rarou-e, südonou Enou puletaoye sü tudee peie ae thaowua Enou tavai peie. Ana puletao hai maichi züba-a lahdodo soua ta-a baie.

¹⁸“Puletao nou soupfüa buyu vah khesü Enou ngaore, ana Enou puletaoye sü souvei peilai; Enou puletaoye sü süthaisa-a tapeilai ae kra-a dopfüyu maikhe maiye sü Enou sousava peilai.

¹⁹Enou kaonayu sü mai hrülai hi peilai! Enou avei maitaoye sü souvei peilai.

²⁰Ana mai ashimai hai zai hi dzü nou thaokhai toumoa lüa nou haoro shitya ae konai hai vakou houpayu bütoua soupeilai.

²¹Mai ashimaiye donou kaonayu sü ha-e,” tea MAPAO nou paoe.