Read Poumei Naga ISAIAH 58 Bible Online

ISAIAH 58 - Poumei Naga bible

ISAIAH 58

¹MAPAO nou paoe, “Shusoua pai chilou süyu koute pai chi-a shakhaio! Avei Isreal maitao hi puletao vei mah khesü shapao peikhaio.

²Puletao nou teithe tsü Eye phouwe ae aludu süyu donou asawe. Puletao hai checheyu tyahrü aliye alia sheeyu Ramai vei chikhatao sü züyu zhai souwe. Südonou puletao nou acheche hisünou chiku peio tea ahi nou kho-e; ae Eye thoyu sü jüpawe tea paoe.”

³Maikhe mainou nou-e, “MAPAO nou ngaomoyu thaio Etao daisounou lüh-a veachi paolai? MAPAO nou süpei moyu thaisü Etao daisounou khüa tainoutou soua bulai?” MAPAO nou puletao hi paoe, “Zhukhaio, neletao nou lüh-a buyu teithe hi koute-a neletao hai lah kabüa sava laisa tea phoua baiwe, ae lelou hoyu maiye sü pira-a souvea peia baiwe.

⁴Neletao hai zü-veilai ae bahzü züpoa taidalai tea lüh-a baie. Neletao nou sübüa lüh-a veachi paoyu pai sü Enou keipei laiwu?

⁵Neletao nou lühyu phaki, neletao hai lahnou lahvei pfüphao souveawe; pounghou nou deiphi kouyu büa neletao nou pei pfünakou khurüe, ngulousah banouloua ae vonai naloua nou souwe. Sübüa souyu hai neletao nou lühwe tea kuwu? Sübüa souyu sü Enou jüpa shulai tea neletao tsüchovu?

⁶“Neletao nou lühyu phaki Enou jüpayuwo louzü: kaozü moyu ae lelouho maiye pira-a souveayu raiphu nasü phipa peiyu, alia mai khenou veasho-a buyu maitaoye panou lahdosou louyu,

⁷houzü laimaiye touso peiyu, ki ha-a vealai maiye panou neletao ki hinou buchao louyu, sabanü hayu maiye sabanü peiyu, alia lah neletao vei kityarai maiye leshilo.

⁸“Sükulouzü Enou neletaoye teithe payu büa panou vapha loulai, ae neletaoye thasho-a nou souvei peilai. Neletaoye sü Enou teisa nou koa salai peilai ae vupa peilai.

⁹Süthaisü neletao nou veachi paoyu phaki Enou keinou peilai, neletao nou Eye kuyu phaki Enou khe peilai. “Neletao hrohi maiye souvea souchoroyu bailouzü, ae maiye bahtou nou raopoa chilako ashi paoyu khaita louzü,

¹⁰ae touha sohayu maiye neletao nou touso peilouzü alia veaho laiyu maiye rukha soupei louzü, süthaisü neletao hi azhi buyu khesü hea büa valai.

¹¹Alia Enou neletaoye teisa nou süthaisa-a tapeilai, ae neletao jüpa nasü ngaoche loulai. Enou neletaoye panou sava-a ae khouchi-a bulai. Neletaoye sü panou dzü züpei koute-a buyu kipei ali railai, ae themoyu dzüla ali büa panou bukoute loulai.

¹²Raichoki soushi khaitouyu nuh teidei khesü neletao vei maikhe mainou soushu dakhai loulai. Neletaoye pepo tayu kivo soushu dakhai louyu maitao, ae soushi khaitouyu kitao soudakhai louyu maitao tea panou kulai.”

¹³MAPAO nou paoe, “Neletao nou Soteithe zhou hai sheeyu teithe-e tea nou süzhou teithe hai neletao jüpayu vah soumoa shamea louzü, ae süzhou teithe savayu ae sheeyu teithe soua tsükhou pei-a neletao nou lah jüpa vah soumo louzü ae komoyu chipha-a teile souhamoa bulouzü,

¹⁴süthaisü neletao nou avei kuvah souyu hisü nou savayu sü ngaoloulai, Enou neletaoye sü deiphao mai hrülaiye panou tsükhou peilai, alia Enou neletao puopao Jakob hi peikhai touyu teidei hisünou vasa-a hrülai. Haisü MAPAO Enou paowe.”