Read Poumei Naga ISAIAH 59 Bible Online

ISAIAH 59 - Poumei Naga bible

ISAIAH 59

¹MAPAO nou neletaoye soukha peilou hoe tea tsüchoso, moyuma neletao nou kuyu paisü choulou hoe touso!

²Sübümoe, neletao vei mah sünou Ramai ae neletaoye sü soura laiwure, ae neletao nou mah souyu donou neletao hinou puh zhu sü pokuwure, südonou puhnou neletao pai sü choupei more.

³Daiolouzü neletao bah sü zhe napoa sheemore ae neletao bahtoutu hisü zhe taore; neletao vei mü hinou dayu chi paowe, ae neletao vei mali hinou hashi khesü lapaiwe.

⁴Mai ali koute-a chikuyu hisü cheche-a velou moe, maili koute-a le shee-a nou chiku peimoe. Neletao hai dahrührüa baiwe; südonou neletao hai ashi nah hrüloua mah sü nakou louwe.

⁵Vah ashi soulai tea neletao nou tsüchoda khaitouyu khesü tu shishoyu nghou vei jü büa baie. Nghou vei jü nasü dakhopa louzü nghou pa-a bailai! Ana neletao nou ashi vah soulai tea tsüchoda khaitouyu khesü neletaoye donou haveih ali-a soupeilai moe — sükhesü hrairara ranou poa sah soukhai touyu büa hamako bailai.

⁷Neletao nou ashi vah soure hio teih thashore, ae mah soumoyu maiye southayuo thashowe. Neletao nou tayu buliki hai soushi peiyu ae souka peiyu sü baie.

⁸Ae neletao nou buyu buh hisü kaonayu hae, ae neletao nou kaozü moyu ludu hisü ta-a baie; neletao vei ludu sü makhukükou-a baie alia maitaralia ludu sühi tayu maisü kaozhou aveih daolai moe.

⁹Maikhe mainou paoe, “Chuo Ramai nou Eletaoye daisounou khailupa peimoe touyu sü süloure. Etao nou teiva hinou talai tea phoue, ana tei sü zhitei-a baire.

¹⁰Etao hai nghichayu mai büa bah nou nghoupoa ta-a laire, Etao hea nou tayuma khei büa phi süloua baire, ae khouko buyu mai hrohinou Etao hai athai mai büa baire.

¹¹Etao sü ngaopire ae choha-a leveare. Etaoye mai ashi mai bah hinou ae kaozhou ashi hinou Ramai nou vupapei shulai tea nou kho-e, ana khailupa peire nasü Etao hinou doushoa buloure.

¹²“MAPAOwo, Etao nou soucho soulayu sü ne nghoujü nou poulere, Eh khemai vei mah khesü Etao pei hi bure, Etao nou Etao vei mah khesü süloure.

¹³Etao nou ne chi zümoa neye malaiwure, ae ne thaifüa tamore. Etao nou mai kukhe maiye sü souvea souchoro peiwure, ae Etao nou kaomo zümoyu tsücho-a chipao lako ashi khesü paopawure.

¹⁴Kaozü nasü hulaiwure, ae acheche nasü veloulou hore. Checheyu nasü maisou ludu hinou kaodu tare, ae aveih nasü buh hare.

¹⁵Acheche touyu sü hare, alia ashi hinou tavai talouyu maikhesü rako shiyu mai soua baire.” MAPAO nou hai khesü ngaoloure, ae kaozü nasü hayu donou leva more.

¹⁶Veaholai maiye mai linoua soukha peire hayu sü puhnou ngaoloua khupare, südonou puh lah puhvei khouko nou puletaoye sü khailupa loure ae veilouyu sü soulai.

¹⁷Puhnou acheche sünou khaokhayu nasü soua thouloulai, khailupa peiyu sünou peirü soua pfüloulai, khüngu phouyu sünou sahba soua baloulai, alia lekha rarou sünou pei phuyu sah soua phuloulai.

¹⁸Puhye ngaobayu maitao, kadou sho-a hrüa buyuma, puletao nou soupfü khaitouyu na thaifüa puhnou puletaoye paoh sü khapeilai.

¹⁹Teinghi palova nou poa teinghi loulova koute hrüa buyu mai hrülai nou puhye sü ngaopilai ae puhvei khouko ava nasü tsükhoulai. Teikhai teirü shisho-a veyu büa puh hai velai.

²⁰MAPAO nou puhvei maitao hi paoe, “Enou Jerusalem hisü veloua mahmo souyu hisünou leda louyu mai hrülaiye vupa peilai alia khailupa peilai.

²¹Alia Enou neletaoye koa vo soulai: Avei khouko ae achipao khesü teisa panou neletao vei soure donou neletao hi peilai. Südonou chu nou poa neletao nou achi zülai ae neletao vei nahmai hi sükhesü doupeilai, alia vere teitei hie neletao nou achi züa neletao vei nahmai ae tyaosholea hisü achi zülo tea doupeio.”