Read Poumei Naga ISAIAH 61 Bible Online

ISAIAH 61 - Poumei Naga bible

ISAIAH 61

¹Khoukhoulai MAPAO nou puhvei rako sü ahi thoupeiwure, touhalai mai hi ko aveih paopeire donou; levea-a dopfü laiyu maiye souveih peire donou, vakou nüpoa tayu maitaoye phapeire pao sü peire donou, MAPAO nou Eye doloure alia Eye seitawe.

²MAPAO nou aetou peiyu mapo, ae Ramai nou khüngu phou peire teithe sü shapao peire donou, ae levea-a dopfülai maiye sousava peire donou,

³Zion hinou dopfü buyu maitao hi vounai thaosü pouparaizhao peire donou, levea-a buyu na thaosü savayu pove peire donou, dopfüa buyu thaosü paoshoyu pove peire donou MAPAO nou Eye doloua seitawe. Puletao hai MAPAO nou shokhai touyu süübe ali bülai, puletao nou acheche nasü soulai, alia MAPAO nou soukhai touyu vahtao donou puhye sü paosholai.

⁴Daoh nou soushi khaitouyu nuhdu khesü puletao nou soushu dakhai loulai.

⁵Avei maitaore, vakou mainou neletao vei kuvah sü soulai. Puletao nou neletao vei zhaokhome sü khopeilai, ae neletao vei dou, lao alia kipei khesü soupeilai.

⁶Alia neletaoye sü MAPAO vei napao maitao, Ramai vei kilai maitao tea nou sülai. Tyahrütao vei kini khesü neletao nou toulai, ae puletao vei nangi khesü neletao vei kathe soulai.

⁷Neletao nou hraongu ngaoyu sü akhai soulaire. Neletao nou lah neletao vei teidei hisü hrülaire. Neletao nou kini sü deida ngaopu loulai, ae neletaoye sü teisa panou sava-a hrülai.

⁸MAPAO nou paoe, “Enou kaozü nasü jüpa-e, ana taidayu ae maiye souvea souchoroyu nasü ngaora-e. Enou avei maitao hisü louchelou veiyu buu nasü peilai, ae puletaoye koa teisa vei soure donou vo soupeilai.

⁹Puletaoye panou tyahrütao hrohinou zhih takayu mai nasü panou soulai. Maitara linoua puletaoye ngaoyu maiye sü panou puletao hai MAPAO nou hra peikhai touyu maitao-e tea panou süloulai.”

¹⁰MAPAO zhih hinou E asa sholai, avei hrümai teitei nou poa Ramai hinou asalai, daiolouzü shinghire maiye poupatou ae sabanü aveih thoupeiyu büa MAPAO nou Eye khailupa peiyu sabanü noupeie, ae acheche sabanü nou banou peie.

¹¹Daiolouzü dei hinou vupou paopayu büa, ae kipei hi taimou thoukhai touyu sü paopayu büa Ramai MAPAO nou puhvei maitaoye khailu peilai, alia tyahrü hrülai nou puhye sü paosholai.