Read Poumei Naga ISAIAH 62 Bible Online

ISAIAH 62 - Poumei Naga bible

ISAIAH 62

¹Zion nou veilouyu sü teithepayu büa ae Jerusalem ye khailupa peiyu nasü meivabvü büa valou mo koute, honapaiye donou E ngasou bulai moe.

²Oh Jerusalem, tyahrü kukhe taonou nenou veilouyu sü ngaolai, ae veo maitao nou nevei kathe sü ngaolai. Neye sü zhih ashu ali nou kulai; MAPAO nou zhih sapeiyu nasü nou kulai.

³Ne hai veishoyu vepeirü ali büa MAPAO vei bah hinou bulai.

⁴Neye sü “Thaowua tayu pai” tea sapulai moe, moyuma neye “Hulaiyu pai” tea kupulai more, ana neye sü “Asah sü honapai-e,” ae nevei füdei sü “Shanghi soulouyu Pai,” tea kulai. Daiolouzü MAPAO nou neye jüpa-e, alia nevei füdei nasü puhnou maipu ali büa khopeilai.

⁵Khemainah ali nou loumainah aliye nalouyu büa neye Sou-apeio nou neye naloulai, alia shilaiyu nanou nghilaiyu naotupaiye donou asayu büa nevei Ramai MAPAO nou neye donou asalai.

⁶Oh Jerusalem, nevei kivo vahi Enou reihkhaomai khaipei khaitoue, puletaoye sü panou hea-khei-a ngasou buso. MAPAO hinou buyu maitao, thaokhai toumoa vah soua bulo, asosouo.

⁷Alia Jerusalem hai soushupu loua panou deiphao maiye paoshomo koute puletaoye panou asosouo.

⁸MAPAO nou haibüa chaachou souwure, ae puhvei khouko nou haibüa soulai: “Neletao vei shinamara khesü panou neletaoye ngaobayu maitaoye toupu khailai more, alia vakou maiye panou neletao nou teroua soukhai touyu thoudzü khesü toupulai more.

⁹Ana hai khesü soupfüa pojü khaitouyu maikhe mainou toulai, ae MAPAO ye paosholai; alia hai khesü pove jükhai touyu maitao nou avei Rathoki hinou tousolai.”

¹⁰Jerusalem hi maitaore, nuhdu hinou vakou tapalo, maikhe maiye panou dakhai vere donou ludu sü soukhaio! Ludu adu sü soulou khaio, ludu hi buyu chuh khesü soushee-o, mai khemaiye panou süloure donou ludu hi shee ali soukhai peio.

¹¹MAPAO nou deiphao kainghou adai hi haibüa shapaowe: “Jerusalem hi hrüyu maitao hi haibüa paopeio, MAPAO nou neletaoye khailupa peire donou laire, puhnou khailupa peikhai touyu maitaoye sü koa salaire.”

¹²Neletaoye sü “Ramai vei Sheeyu Maitao,” ae “MAPAO nou khailupa peiyu maitao” tea kulai. Jerusalem ye sü “Ramai nou Leshiyu Nuhdu” ae “Ramai nou Thaolai moyu Nuhdu” tea nou kulai.