Read Poumei Naga ISAIAH 64 Bible Online

ISAIAH 64 - Poumei Naga bible

ISAIAH 64

¹Ne daisounou ratei sü souphaloua nou takou peimoe? Nenou sübüa takou peilouzü deichi khenou ngaoloua ne nghoujü nou pingulai,

²ae puletao sü mei pei nou dzü shaoka khaitouyu nasü mei southou deitutu peikhai-e, dzü kotaotaoyu büa pingulai. Südonou tave nevei khouko sü nevei ngaoba maitao hi ngaopei khaio, ae tyahrütaoye ne nghoujünou pa ngaopi-a ngukhaio!

³Etao nou ne vere vuzhi moa buyu teile hinou nenou tave ngaopiyu ae khupayu vah haso khesü soupei khaie, deichi khenou ngaoloua ngaopi shore.

⁴Daoh nou zhou koute hai neye louche-a nevu reih-a buyu maitao hi haibüa vah haso soupeiyu Ramai kukhe ali-a ngaomo hie ae chou-a choumo hie.

⁵Acheche nasü sounü pfünüa buyu mai ae nenou jüpayu ludu hi tanüa tayu maiye sü nenou soukha peie. Ana Etao nou mahmo sü soua laiyu donou nenou Etaoye lekhare, anou nenou rarou-a buyuma Etao sü daoh raichoki nou zhou koute sü kaomo zümoyu vah haso khesü soukhaikhai-a bubaire.

⁶Etao mai hrülai nou sheemore, ae Etao nou acheche vah souyu teitei-a sheemoyu sah ali büre. Etao mai hrülai sü süünghou ali büa paitare, ae Etao vei mahmo sünou Etaoye sü teikhai nou süünghou hülaiyu büa hüpoa tare.

⁷Mai linoua ne zhih sü kumore, ae mai linoua ne hisü tave soukha peio tea paomore, daiolouzü nenou Etaoye sü mahmo souyu donou thaokhaiwua tuchü tare.

⁸Sübüyuma, Oh MAPAOwo, nenou Etao vei puo sü baie, Etao louzü konai baie, ne sü nailee souyu nasüe. Etaoye sü nenou soupeia baie.

⁹Südonou Oh MAPAOwo, Etao pei hi rarou peisou baio, ae Etao vei mah sü teisa nou licho peiso. Etao sü nevei mai baie, Etaoye zhuvea peio.

¹⁰Nevei sheeyu nuhdu khesü radeiki vitare; Jerusalem hai soushi khaiwua mai pahatare.

¹¹Etao vei sheeyu ae hüvei shoyu Rathoki, raichoki Etao poupaoh maitao nou neye paoshoyu ki nasü mei nou deihawure. Etao nou sava-a nou jüpa-a buyu buh veishi sü souhawure.

¹²Oh MAPAOwo, haibüa buyuma ne ngasoua bulai hivu? Ne Etaoye donou halia soupei moa panou Etaoye veahopu laihivu?