Read Poumei Naga ISAIAH 66 Bible Online

ISAIAH 66 - Poumei Naga bible

ISAIAH 66

¹MAPAO nou paoe, “Raki hai avei vebue-e, ae deiphao hai Enou phi taiyu bue. Kabüyu ki tyanou neletao nou Eye donou soupeilai touwe, ae kabüyu buh hisünou Eye panou hrülai touwe?

²Teideiphao teitei sü Enou soupeie! Tainoutou soua ae ledalouyu maitao, ae Eye ngaopi-a achi züa buyu maitaoye sü Enou zhu peilai.

³“Maikhe mai hai lahkuku nou jüpayu hisü tare. Puletao nou chode ali dathaloua posheela peiyu moyuma maiye dathaloua posheelayu mai sü raibüa baie; zhaotu ali poa sheelayu moyuma sei ali ngu rashaloua posheelayu na-a kheihao baie; mai ali nou thoudzü vei posheela peiyu na ae vo zhe nou poa sheelayu na-a zhotou baie; kainüvei pou nou licho loure donou poa sheelayu na ae bashara hi veachi paoyu na-a zhobütoua baie. Puletao nou sheemoyu vah khesü soua rathoyu nasü jüpa tare.

⁴Südonou puletao nou ngaopi-a buyu veahoyu khesü Enou puletao hi pove peilai, daiolouzü Enou puletaoye kuyu phaki mailinoua Eye chila peimore, Enou puletao hi chi paoyu phaki puletao mai linoua keipei moe, ana puletao nou anghingao hisünou vah ashi sü soure, ae Enou jüpa moyu nasü doloure.”

⁵MAPAO ye ngaopi-a puh chi züa buyu maitao, puhnou chi paoyu sü keilo: “Neletao nou achi züa buyu donou neletao thaihou jürai kamai nou neletaoye ngaoralai, ae neletaoye ngaophou moa haibüa konüa paolai, ‘MAPAO ye panou puhvei aduso nasü pongao khaio, ae neletaoye khailupa peikhaio, sükulouzü neletao nou vasa-a buyu sü Etao nou ngaoloulai.’ Ana puletaoye sü panou hraongu ngao-a bailai.

⁶Nuhdu hinou pai chisho-a rayu ae Rathoki hinou shusoua raoyu paisü kei khaio! Pai sükhesü MAPAO nou puhye ngaobayu maitaoye tudee laiyu MAPAO vei pai kho-e.

⁷“Avei sheeyu nuhdu nasü naotumai ali nou nah nare teile vemo jünou ae khya soukhai moa nou nah nalouyu büa bailai.

⁸Mai taralia sübüyu sü ngaoho ngaomo hie ae chouho choumo hie? Zion hai phasho-a vealai more, honapai nou tyahrü ali nakou peilaire.

⁹Enou avei maitaoye panou nah nare teile ngheikou khaitoua panou nah sü nalou paimoe tea neletao tsü choso” tea MAPAO nou paoe.

¹⁰Jerusalem ye koa asa zholo; honapaiye leshi-a buyu mai hrülai, honapai vanou savalo! Honapai donou dopfüa buyu mai hrülai; honapaiye koa asalo!

¹¹Nahmaitou ali nou pfü naodzü naoyu bütoua neletao nou honapai hinou sava-a hrülai.

¹²MAPAO nou paoe, “Enou neletaoye sü panou vasho-a hrülai; tyahrü kukhe maitao vei kini khesü thekhai toumoa küa buyu reidzü büa panou neletao hi küve loulai. Neletaoye sü pfü nou nahmaitouye leshi shopoa nakephao hinou daopo peiyu büa kiko peilai.

¹³Pfümai ali nou nahmaiye sousava peiyu büa Enou neletaoye sü Jerusalem hinou sousava peilai.

¹⁴Neletao nou haibüyu khesü vepayu ngaolouyu phaki asasholai; ae neletao nou dusho palai. Süthaisü MAPAO Enou achi züa buyu maiye sü soukha peilai, anou Eye ngaobayu maitao hisü avei lekha rarou nasü bue touyu neletao nou süloulai.”

¹⁵MAPAO nou lekha-a rarouyu maitao hisü mei koa velai, ae puhnou rheiluki nasü teikhai teirü ashi koa pfüloua velou puletaoye sü tudee peilai.

¹⁶Puhnou mei ae khoche nou poa deiphao hi mah souyu mai hrülaiye sü tudeelai, alia mai taoliye sü southawulai.

¹⁷MAPAO nou paoe, “Cheche moyu raye thore donou soushee khaitoua buyu maitao, süü chuh thore donou tayu maitao, alia sheemoyu touso (vosou ae zhaosou) toua buyu maitao vei teile akhai soure sü ngheire.

¹⁸Enou puletao vei vah haso ae tsüle sü süwe. Enou tyahrü hrülaiye save jüloure donou velai. Puletao nou tave jülouyu phaki, puletao nou avei khouko sü ngaolai,

¹⁹alia Enou puletaoye tudeere donou vewe touyu sü süloulai. “Ana Enou puletao hrohinou kamai-a khailupa peilai, ae puletaoye panou avei zhih choumoa buyu maitao hi, ae avei khouko ngaomoa kadou sho-a buyu tyahrütao: Spain, Libia ae Leidia, voulou poveih shoyu maitao, Tubal ae Grees maitao hi avei zhih ae khouko khesü panou paosü peilai.

²⁰Süthaisü Israel mainou thoudzü vei posheelayu nasü sheeyu bvü hinou MAPAO vei ki hi pove peiyu büa tyahrütao hinou neletao vei thaihou-jürai mai hrülaiye sü MAPAO hi posheela peiyu ali soua rhei phaonou, rheiliki hinou, rheisüh phao hinou ae racho phao hinou pfüa avei sheeyu deichi Jerusalem hisü veloulai.

²¹Enou puletao kamai-a panou napao mai soulai ae kamai-a panou Levi mai soulai.

²²“Enou soupeiyu raki ae deiphao ashu nasü büa neletao vei tyaosholea ae neletao vei zhih sü anghoujünou bukou telai.

²³Khouh Ashu vei khonüh sasü ae Soteithe sasü deiphao mai hrülai nou Jerusalem haihi tave Eye tholai” tea MAPAO nou paoe.

²⁴“Puletao nou vakou tapayu phaki Eye khaityayu maitao vei thaiphao sü ngaolai. Puletaoye touyu shikhao khesü thaikhai toulai moe, ae puletaoye deiyu mei sü nghikhailai moe. Puletaoye sü maikhe mainou ngaoloua ngaora sholai.”