Read Poumei Naga ISAIAH 7 Bible Online

ISAIAH 7 - Poumei Naga bible

ISAIAH 7

¹Uzziah tyao, Jothan nahpoutu Ahaz nou Judah hi veo soua buyu teile hinou Sairia hi veo Rezin ae Israel hi veo Remaliah nahpoutu Pekah nou Jerusalem hi soureih souloue, ana puletao nou reih sü hulou louhoa baire.

²Judah teidei hi reih souloure donou Sairia mai nou Israel maiye chavei loure she touyu ko chouve loukhaie, veo Ahaz alia puhvei mai hrülai nou pinguyu hai teikhai nou süübe hülüyu büa lüre.

³Süthaisü MAPAO nou Isaiah hi paoe, “Ne nahpoutu Shear Jashub ye saloua ve veo Ahaz ye daotawo. Ne hai puonah nou puhye sü sabanü dzüsao mai dou ludu hilo kouyu dzükhao reilova hinou dzü popayu buh akhai hinou bua ngaolai.

⁴Puh hi haibüa paopeio, ‘Leikei-a bulo, nasei tea bubaio, piso, moyuma hobvü haibvüa leavea buso, daiolouzü veo Rezin ae puhvei Sairia maitao alia Remaliah nahpoutu veo Pekah vei lekha-rarou nasü nenou ngaopire hai mei deiyu süüpotao jünou ngaopi pure halia hae.

⁵Daiolouzü Sairia nou Israel mai ae Remaliah nahpoutu ye koa neye haibüa soushilai touwe,

⁶Khe, Judah teidei hi reih hulou Etao nou polou laishe, alia Tabeel nahpoutu ye panou veo soulou laikhe.’ ”

⁷Ana MAPAO Enou puletaoye sü panou haibüa soulou laimoe touyu sü paopawe.

⁸Daiolouzü Sairia jünou Damaskas-a dupu hie, ae Damaskas jünou veo Rezin-a khoupu hie. Alia po rairoungou levai hinou Israel maiye sü panou peposasa-a hrüyu tyahrü ali soupeilai.

⁹Israel jünou Samaria dupu hie, Samaria jünou veo Pekeh-a khoupu hie. “Neletao nou lülouche loumore toulouzü, neletao lalou hoa bailai.”

¹⁰MAPAO nou veo Ahaz hi paopue,

¹¹“Nevei Ramai MAPAO hinou shee ali kholo, sünasü nenou thousho-a buyu thaimai buh hinou laiho moyuma kusho-a buyu raki hinoulai.”

¹²Ahaz nou chila peie, “Enou shee nasü kholai moe, daiolouzü MAPAO ye louche moa kabü laisa tea Enou zhulai moe.”

¹³Süthaisü Isaiah nou paoe, “Oh veo David vei kihikha maitaore, haihai keilo. Neletao nou maiye souchoroyu hai taile hie tea Ramai ye souchoro peipulai hie tea chovu?

¹⁴Südonou MAPAO nou neletao hi shee ali peilai, süolouzü loumainah ali nou nah hrüloua nahpoutu ali naloulai, ae puh zhih sü Immanuel tea salai.

¹⁵Nahtou sünanou dupa aveih ashi sükulouyu phaki, maikhe mainou chonaodzü ae leivudzü toua bulai.

¹⁶Ana sübüyu teile koumo jünou neletao nou ngaopi-a buyu veo ahai vei teidei khesü soushi khaia panou mai ali-a bumoa bailai.

¹⁷“MAPAO nou ne hi, nevei maitao pei hi, alia nevei kihikha maitao pei hisü daoh Judah hinou Israel maitao nou ratayu nou poa zhou koute vepakhai moyu veahoyu sü pove peilaire — puh nou Assaria hi veoye sü neletao hi seithou peilai.

¹⁸“Süzhou teithe sü MAPAO nou ka dousho-a buyu Ejipt maiye panou khaomai zhaoveyu büa velai, alia Assaria maiye panou laivoutu büa velai.

¹⁹Puletao nou velou deichi deirao, alia poube shube buyu dei teitei hisü panou phoutao loulai.

²⁰“Süzhou teithe MAPAO nou Assaria mai vei veo hinou pei soumaiye ngaloua panou neletao vei peishu, mümai ae khoumai khesü bipeilai.

²¹“Süzhou teithe tatamai ali nou cholou ali ae nghikü ahai likhei bubaiyuma,

²²puletao nou rukhalou süyu chonaodzü sü ngaoloulai. Daiolouzü teidei sühi shokhai touyu maitao nou chonaodzü ae laivoudzü tou-a bulai.

²³“Süzhou teithe, veishoa buyu darkha kipei, darkhabe thethe bua muh paohao louhoa buyu buh khesü shube ae poube khenou paopa phoutsüa bailai.

²⁴Buh sükhe hisü mainou kha-sou phoutouyu buh soutawulai, alia teidei teitei nou poube ae shube nou paopa phoutao-a bailai.

²⁵Shinamara daothou toua buyu deichi khesü shube süübe khenou paopaloua mai ali-a velai moe. Buh sükhesü soukhaona khenou pou touyu buh souwulai.”