Read Poumei Naga ISAIAH 8 Bible Online

ISAIAH 8 - Poumei Naga bible

ISAIAH 8

¹Süthaisü MAPAO nou ahi paoe, “Larücha rüthou khaire donou chuh ali polo ae süva hisü chadu tyanou haibüa rüthoulo, ‘Ma-her-Shal-al-hash-baz’ (thashoa shaolouyu, ae thashoa potayu).

²Louchelou veiyu mai ahai, napao Uriah alia Jeberechiah nahpoutu Zekharia ye panou shaki soure donou salouo.

³Phazütou thaisü akhapfü nou nahpoutu ali naloue. MAPAO nou nahtai na zhih sü ‘Ma-her-shal-al-has-baz’ tea salo teanou paopeie.

⁴Daiolouzü nahtou nasü dupa ‘Pfü’ ae ‘Puo’ tea kuloumo jünou Damaskas hi kini khe ae Samaria hi shaolouyu nakhesü Assaria hi veo nou potalai.”

⁵MAPAO nou ahi haibüa paopue,

⁶“Maikhe mainou kaonaphi-a kükou peiyu Shiloah reidzü sü malaiwua veo Razin ae Ramaliah nahpoutu veo Pekah ye ngaopi shoyu donou,

⁷MAPAO nou chuo Judah teidei hisü Assaria hi veo alia puhvei reihmaitaoye sü panou reidzü duveyu phaki reipe teitei hia dzü nou pa küyu büa küvelai.

⁸Sübüa küveyu sünou Judah teidei teitei sü naolaiwulai, alia puletao ngu jünou la-a ae na buyu veishi sü phoutao loulai.” Ramai nou Etaoye koa bupeilai! Puhvei shouh nou teidei sü vupeilai.

⁹Tyahrü khemaitao, nuh teidei kadoukou nou hrüa buyu maitao, keilo, neletao nou soureih soure donou tudalou, ana ngaopilo; reih soure donou soudalo, ana pilo.

¹⁰Neletao nou kabüa vah soulai touyu khesü tsüchodah khailo, ana vete khailou laimoe; neletao nou chi sü paolai, ana hamako bailai, daiolouzü Ramai nou Eye koa salai peilai.

¹¹MAPAO nou Eye chih shoa nou maikhe mainou tayu ludu hinou taso tea haibüa paoe,

¹²“Maikhe mainou vah ashi soulai tea sou-a buyu hisü ne louzhoso, ae puletao nou ngaopi buyu khesü ne piso.

¹³Khoukhoulai MAPAO E hai sheewe touyu sü sülo, Eye likhei nenou khuhao-a tsükhoulai alia ngaopi bailai.

¹⁴E hai sheesha touyu donou maikhe mainou chuh linou phi sülouyu büa ahinou sülouwe ae sorüh hinou mulouyu büa Israel ae Judah hi maitao alia Jerusalem hi maitao hai muloulai.

¹⁵Mai alaosou phi süloulai; ae puletao sü kaotalai alia petalai, puletaoye sü muloulai alia satawulai.”

¹⁶Avei rozümaitao Ramai nou ahi paopeilai touyu chitao soutaosou pokhai toulo,

¹⁷MAPAO louzü puhvei maitao hinou puh pah pfüku tare, ana Ewo louzü puhye louchewe alia avei areih sü puh hi bue.

¹⁸Ewo louzü hai hinou MAPAO nou ahi peikhai touyu nahmaitaoye koa bue, Khoukhoulai MAPAO vei vebuh hai Zion deichi hinou bue, ae puhnou Etaoye Israel mai hi hriyu chipao panou soure donou seive khaitoue.

¹⁹Ana maikhe mainou ve neletao hisü “Thaimai hinou ae keingumai hinou noukhaio” tea polai. Puletao nou haibüa paolai, “Daiolouzü maikhe mai hai thaimai hinou ae neletao hinou hria buyu maitao thaosoua daie velai touyu sü nouyu kaomowu?”

²⁰Neletao nou puletao hisü haibüa chila peilai, “MAPAO nou Eletao hi doupeiyu khesü keilo! Keingumai ae thaimai ko pola-apei maitao nou paoyu sü keiso, puletao nou paopeiyu hinou haveih ali koute-a palai moe.”

²¹Maikhe mainou veahosho-a alia houzüa nou teidei teitei hisü takou-takhelai. Puletao houzüyu ae lekhararou hinou puletao vei veo alia Ramai ye chaalai. Puletao nou ratei hi zhukheyuma,

²²ae deiphao hi zhuyuma puletao nou hali-a ngaolai moe, ana veahoyu ae zhiteiyu likhei ngao-a bailai, zhitei touyu buh hisü puletaoye laithouwulai.