Read Poumei Naga ISAIAH 9 Bible Online

ISAIAH 9 - Poumei Naga bible

ISAIAH 9

¹Haibüa veahoyu phaki puletaoye donou tupa lure ludu ali-a bulai moe. Zebulun ae Naphtali khü nou hrüyu teidei hai raichokio mainou ngaolou moe, ana vere teile hiolouzü vakou mainou hrüyu Galilee nuhdu, teinghi palova buyu Meditaranian zai hinou poa Jordan hi koute hai mainou pa tsükhou shoyu teidei ali soupeilai.

²Azhi hinou ta-a buyu maitao hai dushoyu ava ali ngaoloure; puletao hai zhitei touyu teidei hinou hrüa bue, ana chuo ava sünou puletao hisü vapoa bure.

³MAPAO nou puletao tyahrü sü souduso papeie, ae puletaoye sü savayu hai-a peie. Maikhe mainou chachi buyu phaki asayu büa ae saolouyu kini khesü zha zhipayu phaki lesayu büa puletao hai sashoa bure.

⁴Raichoki nenou Midia mai hinou veilouyu büa nenou puletaoye souveayu phaodao nasü souphe peiwure, ae puletaoye da-a buyu süüru nasü sousha peiwure.

⁵Soureih souyu hinou shaolouyu kinitao, ae zhe nakhai touyu sabanü khesü süü büa mei hi pothou deiwulai.

⁶Daiolouzü Etao hi nahtou ali napeie; Nahpoutu ali Etaoye peie! Ae puhnou Etao pei khopu soulai. Puh zhih sü “Khupa shoyu Soukha-apeio,” “Khoukhoulai Ramai,” “Teisa ahri Puo,” “Kaonayu Veo nahpoutu” tea kulai.

⁷Nuh teidei khasa-a hrülai puhvei khouko sü dupupalai; puhvei vedei sü teisa nou kaona-a bulai. David veo vei tyaosholea sou-a Puhnou vebuh hi bulai, chunou poa akhai koute acheche hinou ae kaozü hinou puhnou khasa-a hrülai. Khoukhoulai MAPAO nou hai teitei sü haibüa soulai tea le lawure.

⁸MAPAO nou Israel maivei vedei, Jakob vei tyaosholea hisü tudeire donou paopawure.

⁹Israel mai hrülai, Ephraim ae Samaria nuhdu hinou hrüyu mai hrülai nou haisü puh nou souwe touyu sülaie. Chuo puletao nou haibüa khaophu soua paoe,

¹⁰“Naichuh nou soukhai touyu ki nasü khaotare, ana Etao nou chuh veitya nou daoloua ki sü soushupuloua bailai; ki kakhaiyu sycomor süü khesü jüde laima, Etao nou veikayu sedar süü nou thouloua bailai.”

¹¹Südonou MAPAO nou puletao pei hisü ngaoba maiye panou soureih souvere donou soupeiwure.

¹²Sairia maiye panou teinghi palova nou ae Philistin maiye panou teinghi loulova nou Israel maiye nütou loure donou puletao mü sü ngepoa bure. Haibüa soupeiyu thai-a MAPAO vei lekha rarou nasü akhai mohie; chukoute-a puletaoye tudeipure donou puh bah la poa buhie.

¹³Haibüa soupeiyuma Israel mai hai leda moe, alia Khoukhoulai MAPAO nou puletaoye tudei pei-a buyuma puh hisü dakhai velou moe.

¹⁴Südonou MAPAO nou Israel maiye sü pei hinou poa phi koute teithe ali levai nou souhawulai.

¹⁵Tsümai ae khuhao-a buyu maitao hai pei-e alia dayu hinou dou-apei rachipaola maitao nou mi-e.

¹⁶Daiolouzü mai khemaiye süthai-apei maitao nou süthai mah peiwure alia maikhe maiye soubürarou laiwure.

¹⁷Südonou MAPAO nou nahle mai hrülai, pfüpuo hamai (vearou nahmai) ae meamaipfü ali koute-a panou tupalou laimoe, daiolouzü mai hrülai nou Ramai ye louche more alia vah ashi souyu maikhai baire, ae ashi chipao khaikho pao-a baire. Haibüa MAPAO nou puletao hi tudei peiyu nanou puhvei lekha rarou nasü akhai mo hie, puletaoye tudeipure donou puh bah sü la poa buhie.

¹⁸Maikhe maivei vah ashi sü mei deiyu phaki pounghou ae shube khesü deiyu büa dei-a bure, alia süsü himei taoyu büa meikhao sü tei hi khaopare.

¹⁹Khoukhoulai MAPAO vei lekha rarou sünou teidei sü mei dei-a bure, mei deiyu phaki süü pothou deiyu büa maikhe maiye sü meidei khailai, mai ali koute-a shokhai peilai moe.

²⁰Maikhe mainou teidei sühi ngaoyu touso teitei sü tarasoua nou toulai, ana rukhayu sü ngaolai moe. Puletao nou lah vei nahmai koute-a toulai.

²¹Manaseh maitao nou Ephriam maiye dulai, ae Ephriam mainou Manasseh pei hi reih soulai, alia puhai koa Judah mai pei hi reih huloulai. Haibüa veahoyu peiyu hai-a MAPAO vei lekha sü khaita mohie, puh vei bah sü la poa puletaoye tudeire donou buhie.