Read Poumei Naga LEVIMAI LARÜBVÜ 1 Bible Online

LEVIMAI LARÜBVÜ 1 - Poumei Naga bible

LEVIMAI LARÜBVÜ 1

¹MAPAO nou Moses ye veloujüa buyu Sahpao hinou kuloua puh hi chikha haitao hai

²Israel mainou posheela peiyu phaki zhai haitao hai panou soupfüre donou paopeie. Mai taralinoua hrikhaona poa sheelalai toulouzü, sünasü puhvei cho khome moa zhaotu moa nghitu khome hinou pove peilai.

³Puhnou puhvei kikhaorü hai meidei-a posheela peilai toulouzü, chaa hayu de/pou nou pove peilai. MAPAO ye panou puhvei posheela nasü popei loure donou puhnou sünasü MAPAO nou buyu Sahpao vei bomü hi pove khaipeilai.

⁴Meidei-a posheelare kikhaorü na pei hi puhnou bah deiloulai, sübüa puhvei mahmo khesü hai nanou pota peiwure tea poloulai.

⁵Puhnou chode nasü buh sühinou datha loulai, ae Aaron vei tyaosholea napao maitao nou zhe sü poloua Sahpao bomü hinou buyu posheelabu kainghou adai teitei hisü lazü peilai.

⁶Süthaisü puhnou souhee laopaloua soutao hai daode sasa khaipeilai,

⁷ae napao maitao nou posheelabu hisü mei deire süü hai soudaloua nou mei soupa peilai.

⁸Puletao nou sou vakhai touyutao hai, soupei ae southa noupu koa posheelabu phaova nou meidei peilai.

⁹Puhnou soulesou ae phi ahai sü dzütha peilai, ae napao nou sütao teitei poloua posheelabu hinou meideiwulai. Haibüa meidei-a posheela peiyu kai nüvei nasü MAPAO nou jüpa-e.

¹⁰Mai talinou puhvei zhaotu moa nghitu hai posheela peilai toulouzü, süsü chaatao moyu pou/de noulai.

¹¹Puhnou sünasü posheelabu reilova nou datha loulai, ae napao maitao nou zhe sü poloua posheelabu kainghou veishi hisü lazü peilai.

¹²Puhnou sou sü vapeilai, ae napao nanou sou sütao hai pei ae southeatao noupu koa meidei peilai.

¹³Puhnou lesou ae phitao hai dzü thapeilai, ae napao nou sütao hai MAPAO hi posheela peiwua posheelabu hinou meidei khaiwulai. Haibüa meidei-a posheela peiyu hai MAPAO nou jüpa-e.

¹⁴Mai ali nou raohou nou meidei-a posheela peilai toulouzü, sünasü khao moyuma rahou noulai.

¹⁵Napao nou sünasü posheelabu hi pokouloua pei hai dewulai, ae posheelabu hinou meidei peilai, alia zhe hai posheelabu pehao hi zhaokhai peilai.

¹⁶Puhnou lesoutao ae raohoumai taosü posheelabu vei teinghei palova vounai lakhaiyu buh hisü lapawulai.

¹⁷Puhnou shouh ahai hinou pailoua pfüro hai paikho loulai, ana shouh louzü paide laimoe. Süthaisü napao nanou sütao hai poloua meidei peilai. Haibüa meidei-a posheelayu hai MAPAO nou jüpa-e.