Read Poumei Naga LEVIMAI LARÜBVÜ 10 Bible Online

LEVIMAI LARÜBVÜ 10 - Poumei Naga bible

LEVIMAI LARÜBVÜ 10

¹Aaron vei nahpoutu Nadad ae Abihu nou poa sheelayu meibvü sü poloua sheemoyu meithou nou vüthou loure, ae poukai nüvei sü thoudei loua MAPAO hi posheela peire. Ana mei haina sü shee moe, daiolouzü MAPAO nou sübüa soulo tea kharochi hai pei moe.

²Süteile bü hinou MAPAO nou mei seikou puhaiye sü MAPAO vei nghoujü hinou deithawure.

³Süthaisü Moses nou Aaron hi paoe, “MAPAO nou hai vanou ahi haibüa paoe, ‘Avei kuvah souyu mai hrülai nou avei sheeyu nasü tsükhoulai, ae Enou avei maitao hisü avei kathe nasü pongao peilai.’ ” Ana Aaron nou raokhai moa bua baie.

⁴Süthaisü Moses nou Aaron puo thaihou Uzziel nahpoutu Mishael ae Elzaphan ye kuloua nou paoe, “Ne hai vei thaihou-jürai soua buyu thaiphao nasü sheeyu Sahpao hinou poloua fühao vei vakou popa khaipeio.”

⁵Südonou puhai nou thaiphao sü talou poloua Moses nou kharochi peikhai touyu büa fühao vei vakou popa khaiwure.

⁶Süthaisü Moses nou Aaron ae puhvei nahpoutu Eleazar ae Ithamar hi paoe, “Neletao vei peishu hai kutoulou moa taso, moa neletao vei sabanü hai dopfüyu vei shee soua paiphaso. Neletao nou sübüa soulouzü, neletao-a thai-a bailai, ae MAPAO nou maisouye rarou shulai. Ana Israel maisou louzü MAPAO nou mei seikou deitha khaitouyu puhaiye donou dopfüa kra-a bailai.

⁷Neletao louzü Sahpao vei kibomü hinou tala taso, molouzü neletao hai thai-a bailai, daiolouzü neletaoye MAPAO nou puhvei kuvah panou soure donou theadzü napeiwure.” Moses nou paoyu thaifüa puletao nou soupeie.

⁸MAPAO nou Aaron hi paoe,

⁹“Ne alia nevei nahpoutu maitao nou tou-sozhi louyu thai, Enou buyu Sahpao hisü talou laimoe, hakinou taloure toulouzü neletao hai thai-a bailai. Chikha haina sü vere teile teitei hia nevei tyaosholea maitao nou züa talai.

¹⁰Neletao nou haitao hai Ramai vei-e ae haitao hai maisou vei-e touyu sü sükulo, alia naanou hinou sheeyu ae sheemoyu khesü sülo.

¹¹Enou Moses hi peikhai touyu chikha teitei sü neletao nou Israel mai hi paodou peilai.”

¹²Moses nou Aaron ae puhvei nahpoutu Eleazar ae Ithamar hi paoe, “MAPAO hi thoudzü vei posheela peikhai touyu hinou lia buyu touso taosü polo, ae sütao hai kheih thoumoa raokhao souloua posheelabu hinou toulo, daiolouzü sütao hai sheesha touwe.

¹³Sütao hai sheeyu buh hinou toua bailai; sütao hai MAPAO ye thoudzü vei posheela peikhai touyu hinou ne ae nevei nahpoutu maitao vei zha-e. Sünasü MAPAO nou ahi kharochi peikhai toue.

¹⁴Ana sou khaorao ae souphi louzü ne alia nevei kihikha maitao nou sheeyu buh tarali hinou toua bailai, daiolouzü sütao hai Israel mainou chavei lathao-a hrüloure donou posheela khaitouyu hinou napao maitao vei zha soua MAPAO hi posheela peiwure.

¹⁵Puletao nou khaorao ae souphi hai thoudzü vei posheela soua southeatao pove MAPAO hi peiyu teile hinou pove peilai. Sütao hai MAPAO nou kharochi peikhai touyu thaifüa teisa nou nevei ae nevei nahmaitaoye donou-e.”

¹⁶Moses nou mah vei posheela peikhai touyu nghitu vanou chi nouyu phaki, süna hai poa meideiwure tea süloure. Haina vanou Moses nou lekha loua Eleazar ae Ithamar hi paoe,

¹⁷“Daisounou ne hai sheeyu buh hinou mah vei posheela khaitouyu sou nasü toulou moe? Haina sü sheesho-e, ae maisou mah pota loure donou MAPAO nou hai nasü neletao hi peiwure.

¹⁸Hai navei souzhe hai sheeyu buh hi polou moyu thaifüa, Enou kharochi peikhai touyu büa posheela khaitouyu sou nasü neletao nou sheeyu buh hinou toua bailai.”

¹⁹Aaron nou chila peie, “Zhou teithe maikhe mainou mah vei posheela peikhai touyu ae meidei-a posheela peikhai touyu soutao hai Enou tou louzü, MAPAO nou Eye aetou-a popei laivu? Ana hai khesü zhou teithe apei hisü vere.”

²⁰Moses nou chipao hai chouloua rukhare.