Read Poumei Naga LEVIMAI LARÜBVÜ 13 Bible Online

LEVIMAI LARÜBVÜ 13 - Poumei Naga bible

LEVIMAI LARÜBVÜ 13

¹MAPAO nou Moses ae Aaron hi zhai haitao hai peie.

²Hakinou mai ali vei vasou hinou maapa-a moyuma cho paloua puhvei va hisü soushi data laire tea bulouzü, puhnou napao Aaron moa puh nahpoutu mai ali hi pfüve ngaolai.

³Napao nou puh va zhimü sü soutaosoua zhulai, ae zhimü hisü mai hai ka-a tsüpa louzü ae zhimü hai souhee jünou la-a soutare toulouzü, napao nou soutaosoua zhuloua haina sü sou ashi loukhaora soure tea süloure touyu thai, puh hai sheemore tea napao nou paosüpa peilai.

⁴Ana sou nasü zhimü hi ka-a buyuma souyu nasü hee jünou la-a soutamo louzü ae sühinou paopayu maitao hai ka-a paopamo louzü, napao nou souyu mainaye sü teithe anai koute hai buh tyakua nou pokhaiwulai.

⁵Napao nou puhye sü teithe anai zhou hai ve zhupulai, ae puhnou zhuyu phaki sou nasü soutapuyu ngaomo louzü, napao nou puhye sü buh tyakua nou teithe anai hai khaipulai.

⁶Napao nou puhye teithe anai shohai zhupu khailai, ae sou nasü veiloua soutapumo louzü napao nou puhye sü shee-a baie tea paosüpa peilai, haina sü tsüke pa-a baie. Süthaisü puhnou puhvei sabanü hai dzüshao loulai, ae puh sü shee-a bailai.

⁷Ana sou zhimü nasü puhnou napao hi ngao-a napao nou puhye shee-a baie tea paosüpa peiyu thainou soupapu louzü, puhnou napao hisü pove ngaopu khailai.

⁸Napao nou puhye sü zhupu khailai, ae sou nasü soutapu louzü, napao nou puhye sü sheemore tea paosüpa peilai, hai nasü latalou veiyu sou ashi loukhaora soure.

⁹Mai tarali nou loukhaora sou louzü puhye sü napao mai hi save ngaolai,

¹⁰ae napao nou puhye sü soutaosou zhulai. Hakinou sou zhimü hisü ka louzü ae sühi mai hai ka-a nou paopa louzü ae zhimü hi ha palouzü,

¹¹puhvei sou hai maiye lalou veiyu loukhaora soure, ae napao nou puhye sü sheemore tea paosüpa peilai, anou puhye buh tyakua khailai moe, daiolouzü puh hai shee more.

¹²Hakinou loukhaora nou puhvei pfüphao veishi hi, pei hinou poa phi hi khoute hai bua napao nou ngaolouzü,

¹³napao nou puhye sü zhupulai, ae napao nou puhvei pfüphao teitei hinou payu sü ngaolouzü, napao nou puhye sü naanou hinou shee-a baie tea paosüpa peilai. Puhvei vasou veishi nou kaphayu vanou puh hai shee-a baie.

¹⁴Ana vasou tarali hinou tsüke paopare toulouzü puh hai shee more.

¹⁵Napao nou puhye sü zhupu khailai, ae puhnou puh vasou hi tsüke payu sü ngaoloure touyu thaio, puhnou puhye sü sheemore tea paosüpa peilai. Tsüke payu thaio puhsü shee more, daiolouzü haisü maiye lalou veiyu loukhaora taore.

¹⁶Ana tsüke payu nasü veiloua puhvei vasou veishi hai kapha toupu louzü, puhnou napao hisü pove ngaopulai,

¹⁷ae napao nou puhye sü zhupulai. Tsüke payu nasü veiloua vasou hai kaphare touyu thaio, puh hai naanou hinou sheere tea napao nou paosüpa peilai.

¹⁸Mai tarali hia cho pa-a veilouyu thai,

¹⁹veilouyu zhimü hinou kapha tea maapa louzü moa homara-a kapha pare toulouzü, süsü napao mai hi pfüve ngaolai.

²⁰Napao nou puhye sü soutaosoua zhulai, ae süna hai zhimü jünou soupoa lata louzü alia sühi mai paopayu hai ka-a paopa louzü, napao nou puhye sü sheemore tea paosüpa peilai. Hai nasü cho payu zhimü hinou maiye latalou veiyu loukhaora sü soupare.

²¹Ana napao nou puhye zhuyu phaki, puhvei zhimü hi mai paopayutao hai ka-a paopamo louzü ae zhimü hinou la-a soutamo louzü, napao nou puhye sü teithe anai hai buh tyakua nou khaiwulai.

²²Hakinou puhvei sou zhimü hai dupupa louzü, puh hai souyu thaifüa napao nou puhye sü shee more tea paosüpa peilai.

²³Ana puhvei zhimü nasü soutapu moa raibütoua bubaire toulouzü, hai nasü cho payu zhimü baie, südonou napao nou puhye sü shee-a baie tea paosüpa peilai.

²⁴Hakinou mai ali hai mei deiwua puhvei zhimü hinou kapha palouzü moa horairai palouzü,

²⁵napao nou puhye sü soutaosoua zhulai. Hakinou zhimü hi mai paopayutao hai ka louzü, ae hee jünou la-a souta louzü, süsü loukhaora loure, ae mei deikhai touyu hinou soupare, südonou napao nou puhye sü sheemore tea paosüpa peilai.

²⁶Ana sühi mai paopayutao hai kamo louzü ae zhimü buyu pehao hi latamo louzü, ana zhimü hi zhai hai tyakuphoua bailouzü, napao nou puhye sü teithe anai hai buh tyakua khaiwulai.

²⁷Napao nou puhye sü teithe anai zhou hai zhupulai, ae sou hai dupapu louzü, haisü maiye latalou veiyu loukhaora soure, südonou napao nou puhye sü sheemore tea paosüpa peilai.

²⁸Ana souyu nasü zhimü hinou dupapumo louzü, ae zhai hai datamo louzü, hai nasü loukhaora more, südonou napao nou puhye sü naanou hinou shee-a baie tea paosüpa peilai, daiolouzü haisü meideikhai touyu zhimü baie.

²⁹Naotumai moyuma poutumai alinou puh pei hinou moa khou hinou sou palouzü,

³⁰sünasü napao nou zhulai, ae hai nasü hee jünou la-a souta louzü ae sühi mai paopayutao hai vazhao-a paopa louzü, napao nou puhye sü shee more tea paosüpa peilai, daiolouzü hai nasü pei hinou moa khou hinou loukhaora souyue.

³¹Hakinou napao nou puhye zhuyu phaki, sou nasü hee jünou la-a soutamo louzü, ana sühi mai paoyutao hai teimo louzü, napao nou puhye sü teithe anai hai buh tyakua nou khaiwulai.

³²Napao nou puhvei sou hai teithe anai zhou sü zhupulai, ae puhvei sou hai soutapumo louzü ae mai hai vamore toulouzü, alia souyu sü hee jünou la-a soutamo louzü,

³³souyu mai nanou pei hai saiwulai, ana souyu zhimü hiolouzü sailai moe. Napao nou puhye sü teithe anai hai buh tyakua nou khaiwulai.

³⁴Teithe anai zhou sü napao nou puhvei sou nasü zhupulai, ae sou nasü soutapumo louzü ae hee jünou la-a soutamo louzü, napao nou puhye sü naanou hinou shee-a baie tea paosüpa peilai. Süthaisü honanou puhvei sabanü hai dzü shaowulai ae puh hai shee-a bailai.

³⁵Ana napao nou puhye shee-a baie tea paosüpa peiyu thainou soutapure toulouzü,

³⁶napao nou puhvei souyu nasü zhulai, ae puhvei sou nasü soutapure toulouzü, napao nou puh vasou hi mai hai vaho vamoe touyu hai zhupulai moe.

³⁷Ana napao nou zhuyu phaki, sou zhimü na hai soupu moa sühisü mai hai veisho-a paopa louzü, ae zhimü hai veire touyu thaio, napao nou puhye sü naanou hinou shee-a baie tea paosüpa peilai.

³⁸Naotumai moa poutumai taliva hinou zhimü hai ka-a nou palouzü,

³⁹napao nou mai sünaye sü zhulai. Hakinou zhimü süna hai sübüa hee hinou ka-a buyu likhei bailouzü, süsü hee hinou chaatao-a baie, mai süna hai naanou hinou shee-a baie.

⁴⁰Mai ali hai hakinou puhvei dou hinou moa pu hinou peishu paita louzü, puhsü peiki-a baie, süna vanou puhsü sheemore tea polou shie.

⁴¹

⁴²Ana peikiyu hinou homara poa soupa louzü, haisü maiye lalou veiyu loukhaora soure.

⁴³Napao nou puhye zhuyu phaki, puh hi homara poa zhimü bure toulouzü,

⁴⁴napao nou puhye sü shee more tea paosüpa peilai, daiolouzü haisü maiye lalou veiyu loukhaora hai puhvei peikiyu hinou soupare.

⁴⁵Loukhara souyu mai nanou sabanü hai payu tyanou banoulai, pei kulai moe, puh pah hai dali holoua haibüa shapaolai, “Shee moe, shee moe!”

⁴⁶Puhnou soua buyu koute hai puhsü shee moe, südonou puh sü mai bumoyu buh fühao vakou nou hrülai.

⁴⁷Loukhaora nou sabanü tarali hia taolouzü, süsü soumai sah hiho moa deizüzüyu sah hia,

⁴⁸moa deizüzüyu moa soumai sah tarali hia moa souhee nou soukhai touyu na tarali hia,

⁴⁹daizhao-a palouzü moa homara-a palouzü süsü latalou veiyu loukhaora taore, südonou sünasü napao hi pove ngaolai.

⁵⁰Napao nou sünasü zhuloua teithe anai hai na kukhe hinou buh tyakua khaiwulai.

⁵¹Napao nou teithe anai zhou hai na sünasü zhulai, ae loukhaora taoyu na hai dupapure toulouzü na süna hai shee more.

⁵²Napao nou na sünasü mei deiwulai, daiolouzü na süna hi hai latalou veiyu loukhaora taoyu donou mei hinou deihawulai.

⁵³Ana napao nou zhupuyu phaki, loukhaora taoyu nahai dupapu molouzü,

⁵⁴napao nou na sünasü dzü shaowua teithe anai hai buh tyakua khaiwuo tea kharochi peilai.

⁵⁵Süthaisü napao nou na sünasü zhupulai, ae hakinou loukhaora taoyu nahai dupapu moyuma zhai hai datamo louzü, na sünasü shee more; na sünasü thailova moyuma nghoujülo nou buyuma mei deiwulai.

⁵⁶Ana napao nou na süna hai zhupuyu phaki, loukhaora taoyu nahai hata louzü, puhnou fü sühisü paipha laiwulai.

⁵⁷Süthaisü loukhaora hai papua nou ngaolouzü, na paopu nou sünasü mei deilaiwulai.

⁵⁸Hakinou dzü shaowua loukhaora taoyu nasü hata louzü, puhnou na süna hai dzü shaopulai, ae na sünasü naanou hinou shee-a bailai.

⁵⁹Sabanü tarali hia, süsü soumai sah moa deizüzüyu sah, moa souhee nou soukhai touyu na tarali hia loukhaora taore toulouzü chikha haibüa talai, ae na sünasü naanou hinou shee-e moyuma shee more tea süloure sü haibüa soulai.