Read Poumei Naga LEVIMAI LARÜBVÜ 14 Bible Online

LEVIMAI LARÜBVÜ 14 - Poumei Naga bible

LEVIMAI LARÜBVÜ 14

¹Loukhaora soua veilouyu mai ali nou naanou soua sousheere zhai haitao hai soulo tea MAPAO nou Moses hi kharochi peie. Puhye sheere tea paosüpa peire teithe zhou hai puhye napao hi savelai,

³ae napao nou puhye fühao hinou vakou sapaloua puhye zhulai. Hakinou puh hai veiloure toulouzü,

⁴napao nou puh hinou chaa hayu raohou ahai, sedar süüpo ali, pha hoyu ke ali ae loube tya pove-o tea kharochi peilai.

⁵Süthaisü napao nou raohou ali hai dzünghou hinou dzü pove khaitouyu nailee pei hinou dathalo tea paopeilai.

⁶Puhnou raohou ali nahai sedar süü, pha homarayu ke ae loube nasü koa nou poloua southa khaitouyu raohou vei zhe hinou polou süloulai.

⁷Puhnou loukhaora souyu maina hisü zhe nou kasho anai koupeilai, ae puhye sü chuo sheere tea paosüpa peilai. Süthaisü puhnou hria buyu raohou nasü panou zhaotawulai.

⁸Veilouyu maina nou puhvei sabanü hai dzü shaowulai, puh vasou hi mai buyu veishi hai sailaiwulai, ae dzü khüloulai. Süthaisü puh hai naanou hinou shee-a bailai. Puhnou fühao hi taloua bailai, ana teithe anai koute hai puhnou puhvei kijü hinou bua bailai.

⁹Teithe anai zhousü puhnou puh peih, khoumai, nghimai, ae puh vasou hinou buyu mai veishi hai saiwulai; puhnou puhvei sabanü khesü dzü shaoloulai ae dzü khüloulai, süthaisü puh hai naanou hinou shee-a bailai.

¹⁰Teithe acha zhou sü puhnou chaalia hayu zhaotu pou/de ahai, po ali payu zhaokü ali, oliv theadzü thouhrüloua sou hai sühcho asü ae oliv theadzü sühchovou zha asü hinou zha ali pha hai pove peilai.

¹¹Napao nou mainaye sü puhnou pove peiyu posheela natao nou koa MAPAO nou buyu Sahpao bomü hisü sakou loulai.

¹²Süthaisü napao nou zhaotu ali hai poloua oliv theadzü litar ali hinou zha asü soukhai touyu nasü koa mah vei posheela soua posheela peilai. Puhnou hainasü MAPAO hi veisho-a sapeina ali soua napao maitaoye donou peilai.

¹³Puhnou zhaotu hainasü mah vei posheela peiyu ae meidei-a posheela peiyu soua sheeyu buh hinou datha loulai. Puhnou hai nasü mah vei posheela peiyu büa paokha peiyu vei posheela hai soulai, daiolouzü hai nasü napao mai vei-e ae haisü sheesha toue.

¹⁴Napao nou souzhe sü poloua naanou hinou soushee peire tea paosüpa peire maina vei noubeipha zhoulova hi, bahke zhoulova hi, ae phike zhoulova hi napeilai.

¹⁵Napao nou oliv theadzü hai poloua nou puh bah nalova hi lathou loulai,

¹⁶ae puh bah toutu zhoulova nou süloua MAPAO vei nghoujü hinou puhye sü bakha anai hai kavu peilai.

¹⁷Napao nou puh bah hinou theadzü buyutao hai poloulai, ae zhaotu zhe daotu hai poloua naanou hinou soushee peire tea paosüpa peire mai navei noubei zhoulova pei hi, bahke zhoulova hi, ae phike zhoulova hi napeilai.

¹⁸Puh bah hinou lia buyu theadzütao hai puhnou maina pei hi pokou napeilai. Hai zhai büa sousheeyu vei naanou hai soupeilai.

¹⁹Süthaisü napao nou mah vei posheela peiyu nasü posheela peilai ae sousheeyu vei naanou hai-a soupeilai. Süthai hai puhnou meidei-a posheelare hrikhaona nasü datha loulai,

²⁰ae haina sü thoudzü vei posheela peiyu koa posheelabu hinou posheela peilai. Hai zhai büa napao nou soushee peiyu naanou hai soupeilai, ae mainaye sü naanou hinou soushee peire tea paosüpa peilai.

²¹Hakinou maina nou touhayu donou haitao hai peilou hore toulouzü, puhnou zhaotsü ali hai pove mahmo paokhayu vei posheela soua puhye khaipeire donou MAPAO hi napao maitao vei soure donou posheela peilai. Puhnou sou sühcho ali hai theadzü thouhrüloua thoudzü vei posheela peire donou ae oliv theadzü sühchovou zha asü hinou ali hai pove peilai.

²²Süpei hinou puhnou khao ahai moa rahou ahai hai mah vei posheelare donou ae meidei-a posheela peire donou pove peilai.

²³Teithe acha zhou puhye soushee peire donou haitao hai napao mai hi Sahpao vei bomü hi pove peilai.

²⁴Napao nou zhaotu ae oliv theadzü nasü poloua MAPAO hi haisü napao maitaoye donou posheela peilai.

²⁵Puhnou zhaotu nasü datha loulai, ae zhe daotu poloua honavei noubeipha zhoulova hi, bahke zhoulouva hi ae phike zhoulova hi napeilai.

²⁶Napao nou theadzü daotu li hai puh bah nalova lathou loulai,

²⁷ae puh bah toutu zhoulova nou theadzü sü süloua bakha anai hai puh va hi MAPAO vei nghoujü hinou kavu peilai.

²⁸Napao nou puh bah hi theadzü buyu hisü souzhe daotuli thoupuloua soushee peire maina vei noubei zhoulova pei hi, bahke zhoulova hi ae phike zhoulova hi napeilai.

²⁹Puh bah hinou lia buyu theadzütao hai puhnou maina pei hisü napeilai, haibüa soushee peire naanou nasü soulai.

³⁰Süthaisü napao nou khao moa rahou ali hai poloua

³¹mah vei posheela soua sheela peilai, ae kukhe ali na hai thoudzü vei posheela peiyu koa meidei-a posheela peilai. Hai zhaibüa napao nou soushee peiyu vei naanou hai soupeilai.

³²Loukhaora soua veilouyu mai ali nou hai zhaibüa soushee louyu vei naanou soulai, ana maisou nou soua buyu zhai hinou posheela peilou hoyu mai-a sousheeyu vei naanou hai soulai.

³³MAPAO nou Moses ae Aaron hi chikha haitao hai ki hi loukhaora loure toulouzü talai tea kharochi peie. (Zhai haitao hai Israel maiye MAPAO nou puletaoye kikaa soua peilai tea paokhai touyu Kanaan teidei hi puletao nou talou polouyu thai talai.) Hakinou MAPAO nou puletao vei ki hi loukhaora seive peire toulouzü, puhnou taho napao mai hi paongaolai.

³⁴

³⁵

³⁶Napao nou tave loukhaora nasü zhumo jünou ki hi buyu na veishi hai vakou popakhaio tea kharochi peilai; daiolouzü hakinou ki hai loukhaora loua shee more tea paosüpa louzü ki hi buyu na veishi hai shee moa bailai. Süthaisü napao nou ki hisü veloua

³⁷loukhaora buhayu sü zhulai. Napao nou kihikha talou zhuyu phaki, kivo va hi daizüzüyu moa horairaiyu tao-a buyu ngaolouzü,

³⁸puhnou kijü tapaloua ki nasü teithe anai hai kikhu ta-a khaiwulai.

³⁹Teithe anai zhou sü napao nou dakhaive ki nasü zhupulai. Hakinou ki nasü loukhaora loua dupayu hai ngaoloure toulouzü,

⁴⁰loukhaora tao-a buyu chuhtao hai popaloua nuhdu vei vakou sheemoyu buh hi poho lai-o tea kharochi peilai.

⁴¹Süthaisü kivo hi naihü teitei-a dakholoua nuhdu vei vakou sheemoyu buh hi poho laikhai toulai.

⁴²Süthaisü chuh polai khaitouyu thaosü chuh kukhe nou pove thouloulai, ae kivo hai-a shitho nou mealoulai.

⁴³Hakinou chuh polaiwua chuh shitho ae kivo shitho soukhai touyu hia loukhaora hai papu louzü,

⁴⁴napao nou ki nasü taho zhupulai. Hakinou loukhaora hai papure toulouzü, ki sünasü shee more.

⁴⁵Puhnou ki sü hralaiwulai, ae chuh, süü, kivo nayu nai veishi hai poloua nuhdu hinou vakou sheemoyu buh hi poho shilaiwulai.

⁴⁶Mai taralia ki khukhai toua buyu teile hinou kikha taloure toulouzü, puh hai süzhou koukhe koute shee laimoe.

⁴⁷Mai talinoua ki sühinou talou züyu moa ha touyu maina sü puhvei sabanü hai dzü shaowulai.

⁴⁸Hakinou ki soupuyu thai, napao nou tave zhuyu phaki, kivo meapukhai touyu hi loukhaora hai taopa pumo louzü, puhnou ki nasü naanou hinou sheere tea paosüpa peilai, daiolouzü loukhaora taoyu nahai polaikhai laire.

⁴⁹Ki hai sousheere donou ki paopu nou raohou ahai, sedar süü daotu, pha hoyu ke ali, ae loube tea nou pove peilai.

⁵⁰Puhnou raohou ali hai dzünghou hinou dzü pove khaitouyu nailee peih hinou southa loulai.

⁵¹Süthaisü puhnou sedar süü, loube, pha hoyu kena, ae hria buyu raohou nasü poloua southa khaitouyu raohou vei zhe ae dzü hinou polou süloulai, ae puhnou ki nasü bakha anai hai kavu peilai.

⁵²Haibüa puhnou ki nasü raohou zhe, dzü, hriyu raohou, sedar süü, loube ae pha hoyu ke ali nou poa soushee peilai.

⁵³Süthaisü puhnou hriyu raohou nasü panou nuhdu vei vakou hinou zhaotawulai. Haibüa ki nasü puhnou soushee peilai, ae ki nasü shee-a bailai.

⁵⁴Loukhaora souyu, va thoyu, tsüke paoyu, cho payu, maa payu, ae sabanü hi moa ki hinou loukhaora taoyu hi soupfüre zhaitao sü haitao-e.

⁵⁵

⁵⁶

⁵⁷Chikha hai nanou sheewe ae sheemoe touyu sü panou süloure donou soupei khaitoue.